Zərif Ruhun İşığında

Qarşınızdakı kitab filologiya elmləri doktoru, professor, tanınmış estetik, yazıçı, pedaqoq və ictimai xadim Gülrux Əlibəylinin (1928-2016) çoxşaxəli yaradıcılığına və maraqlı, həm də mənalı həyat yolunun ayrı-ayrı məqamlarına həsr olunub. G.Əlibəyli zəhmətkeş, inadkar və məsuliyyətli tədqiqatçı olmaqla yanaşı, ictimai həyata, gerçəklikdə baş verən mürəkkəb proseslərə özünəməxsus tərzdə yanaşan, fikirlərini fəlsəfi-psixoloji cəhətdən ümumiləşdirilmiş formada təqdim etməyi bacaran incə hissiyyatlı bir qələm sahibidir. Onun müəllifi olduğu “Mənəvi çırpıntılar sorağında”, “Düşünən dünyamız”, “Çırpınan dünyamız”, “Dəyişən dünyamız”, “Dağılan dünyamız”, “Zamanımız və özüm haqqında” və d. kitabları, onlarca məqalə və essesi insan həyatının mahiyyəti və problemləri haqqında səmimi söhbətə köklənmiş fəlsəfi-bədii nümunələrdir.

Kitabda Gülrux xanımın əsərlərinə yazılmış resenziyalar, onun haqqında xatirələr, eləcə də bu orijinal şəxsiyyətə ünvanlanan məktublar yer almışdır (o cümlədən xarici ölkələrin tanınmış vətəndaşlarının məktubları – red.).

G.Əlibəyli hansı vəzifədə çalışmasından asılı olmayaraq, hər zaman humanizmi ilə fərqlənmiş, insanlara, onların prob­lemlərinə sosial ədalət prinsipləri əsasında yanaşmışdır.

Gülrux xanımın anadan olmasının 90 illiyi ilə əlaqədar çapdan çıxmış bu kitab, zənnimizcə, onun yaradıcılığı və şəxsiyyəti haqqında oxucularda kifayət qədər dol­ğun təəs­sürat yaratmaq, onlarda mənəvi dəyərlərin həmişə­ya­şarlığına inam hissini gücləndirmək, ümumiyyətlə estetik-tərbiyəvi məsələlərə və prinsiplərə həssas yanaşma haqqında düşünməyi təlqin etmək iqtidarındadır.