Kitobni o'qish: «Акафисты Богу. Хвала и благодарение»

© Оформление. ООО «Издательство «Эксмо», 2026

* * *

Акафист Рождеству Христову

Конда́к 1

Избра́ннии от всех племе́н и наро́дов в язы́к свят, ца́рское свяще́ние, сы́нове Све́та и насле́дницы Ца́рствия, прииди́те, возра́дуемся Го́сподеви и Спаси́телю Бо́гу, в Вифлее́ме ро́ждшемуся и нас ра́ди пелена́ми повива́емому, с волхвы́ и па́стыри поклони́мся, а́нгельскую вси в весе́лии пою́ще песнь: Сла́ва в вы́шних Бо́гу и на земли́ мир, в челове́цех благоволе́ние!

И́кос 1

А́нгелом недове́домую, пресла́вную та́йну Твоего́ смотре́ния на коне́ц веко́в открыва́я, Христе́, я́ко Младе́нец в я́слех безслове́сных возлежи́ши и во убо́зем верте́пе ми́ру явля́ешися, Сло́ве Бо́жий, безнача́льне. О́ле стра́шнаго та́инства! О́ле Бо́жия снизхожде́ния! Тем у́бо со стра́хом и ра́достию взира́юще на неисповеди́мое истоща́ние Твое́, си́це Тебе́ зове́м:

Сла́ва Тебе́, Све́те Ти́хий, от Де́вы ми́ру возсия́вый;

сла́ва Тебе́, А́нгелов Ра́досте, во страну́ пла́ча прише́дый.

Сла́ва Тебе́, Нача́льниче ми́ра, спасе́ние благовести́вый;

сла́ва Тебе́, Сы́не Бо́жий, Собо́ю то́е устро́ивый.

Сла́ва Тебе́, Сия́ние О́тчия сла́вы;

сла́ва Тебе́, от тьмы в чу́дный Твой свет челове́ки призва́вый.

Сла́ва Тебе́, Иису́се, Сы́не Единоро́дный, на зе́млю снизше́дый;

сла́ва Тебе́, Иису́се, восхо́д земноро́дным на Не́бо устро́ивый.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 2

Ви́дев нищету́ и поги́бель ро́да челове́ческаго, всемогу́щее светоза́рное Сло́во Бо́жие, ти́хому молча́нию содержа́щу вся и но́щи преполовля́ющейся, с Небесе́, от Престо́ла Ца́рскаго, во юдо́ль земну́ю поги́бельную сни́де, во спасе́ние пою́щих Ему́: Аллилу́ия.

И́кос 2

Разуме́в ду́хом проро́к Авваку́м прише́ствие Твое́, ужа́сся вопия́ше: Го́споди, услы́шах слух Твой и убоя́хся, разуме́х дела́ Твоя́ и ужасо́хся! Мы же сбытие́ та́йны сея́ зря́ще, Вифлее́м честву́ем и я́слем Твои́м покланя́емся, зову́ще:

Сла́ва Тебе́, Бо́жия Прему́дросте и Си́ло;

сла́ва Тебе́, омраче́нную не́мощь на́шу посети́вый.

Сла́ва Тебе́, повива́ющему мгло́ю зе́млю и не́бо о́блаки;

сла́ва Тебе́, нас ра́ди пови́тому пелена́ми.

Сла́ва Тебе́, одева́яй красото́ю кри́ны се́льныя;

сла́ва Тебе́, наготу́ на́шу облеки́й во оде́жду нетле́ния.

Сла́ва Тебе́, зрак раба́ прие́мый;

сла́ва Тебе́, от ра́бства страсте́й нас свободи́вый.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 3

Си́лы Небе́сныя ве́лиим гла́сом восхвали́ша Тя, све́тлое Со́лнце Сла́вы, восходя́щее от де́вственнаго О́блака и просвеща́ющее мир за милосе́рдие безме́рное, и в весе́лии воспе́ша: Аллилу́ия.

И́кос 3

Име́яй престо́л не́бо и подно́жие зе́млю, ме́ста ни еди́на обре́те во оби́тели, те́мже Чи́стая Де́ва, Ма́ти Твоя́, сокрыва́ет Тя от хла́да нощна́го в худе́м верте́пе и во я́слех ско́тиих полага́ет Тя, Сокро́вище го́рняго ми́ра и Зижди́теля вся́ческих. Дивя́щеся милосе́рдию Твоему́, си́це Тебе́ зове́м:

Сла́ва Тебе́, по нам неизрече́нно обнища́вый;

сла́ва Тебе́, неизче́тно нас обогати́вый.

Сла́ва Тебе́, на́шу не́мощь восприе́мый;

сла́ва Тебе́, нас си́лою Твое́ю облеки́й.

Сла́ва Тебе́, хлад нощны́й претерпе́вый;

сла́ва Тебе́, теплото́ю Твоея́ любве́ мир согре́вый.

Сла́ва Тебе́, не име́вый, где главы́ подклони́ти на земли́;

сла́ва Тебе́, преклони́вый небеса́ схожде́нием Твои́м.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 4

Бу́рею сумни́тельных помышле́ний мяте́тся И́род и вся Иерусали́ма с ним; ца́рие же восто́чнии Тебе́, Царю́ царе́й, да́ры избра́нныя прино́сят. С ни́миже и нас сподо́би Тебе́ кла́нятися ду́хом и и́стиною и приноси́ти Тебе́ ве́ру я́ко зла́то, чи́стое житие́ я́ко лива́н, любо́вь же я́ко сми́рну, зову́ще: Аллилу́ия.

И́кос 4

Слы́шав Ада́м первозда́нный глас Го́спода сла́вы, ходя́щаго в раи́, стра́хом скры́ся, убоя́вся лица́ Твоего́. Ны́не же Ты, Спа́се, сокрыва́еши под бре́нным покро́вом стра́шную сла́ву Твоего́ Божества́ и низхо́диши на зе́млю, зрак Ада́мов нося́, взыска́ти поги́бшаго, вопию́ща Тебе́:

Сла́ва Тебе́, с Небесе́ до́лу низше́дый;

сла́ва Тебе́, челове́ка горе́ вознесы́й.

Сла́ва Тебе́, беззако́ния моя́ на Себе́ возложи́вый;

сла́ва Тебе́, я́звою Твое́ю мя исцели́вый.

Сла́ва Тебе́, приобщи́выйся моея́ пло́ти;

сла́ва Тебе́, приобща́яй мя Твоего́ Божества́.

Сла́ва Тебе́, сту́дную наготу́ челове́ков ри́зою Твоея́ сла́вы покры́вый;

сла́ва Тебе́, глад души́ утоля́яй сла́достию трапе́зы Твоея́.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 5

Боготе́чная звезда́ с высоты́ показу́ет Тя, изда́вна предвозвеще́нную мы́сленную Звезду́, от Иа́кова возсия́вшую. Сподо́би и нас, ко убо́гому верте́пу со звездосло́вцы прите́кших, узре́ти очище́нными очесы́ души́ па́че звезд и со́лнца просия́вшую сла́ву Твоего́ Божества́ и воспе́ти Тебе́: Аллилу́ия.

И́кос 5

Прови́дев издале́ча день Твой, Христе́, пра́отец Твой Авраа́м возра́довася ду́хом; мы же ви́дяще Тя, Све́та невече́рняго, на рука́х Де́вы, Ма́тере Твоея́, я́ко на престо́ле почива́юща, ра́достно срета́ем Тя пе́нии си́ми:

Сла́ва Тебе́, млеко́м Неискусому́жныя пита́емый;

сла́ва Тебе́, пита́яй вся́ческую тварь.

Сла́ва Тебе́, Сы́не Де́вы, Емману́иле, Отроча́ мла́до;

сла́ва Тебе́, Бо́же Преве́чный, О́тче бу́дущаго ве́ка.

Сла́ва Тебе́, на плещу́ херуви́мов носи́мый;

сла́ва Тебе́, нас ра́ди во я́сли возлеги́й.

Сла́ва Тебе́, на земли́ младе́нствуяй;

сла́ва Тебе́, нас ча́да Бо́жия содева́яй.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 6

Пропове́дует ми́ру ми́лостивое Твое́ прише́ствие проро́к Илия́ Фесви́тянин, тому́ бо на Хори́встей горе́ яви́л еси́ ти́хое сия́ние Твоея́ сла́вы; и́бо не в бу́ри, ни во огни́ ниже́ в трясе́нии, но во гла́се хла́да то́нка соше́л еси́ на зе́млю, Го́споди, просвеща́я и спаса́я вся зову́щия: Аллилу́ия.

И́кос 6

Возсия́ иногда́ свет Небе́сный па́стырем вифлее́мским, творя́щим стра́жу нощну́ю о ста́де свое́м и бдя́щим, те́мже и мы в нощи́ жития́ сего́ ле́ности сон отрясе́м, в моли́тве трезвя́щеся, да с па́стырьми зри́телие сла́вы Спа́са ро́ждшагося яви́мся и та́ко Ему́ воззове́м:

Сла́ва Тебе́, Хле́бе живо́тный, всех ду́ши пита́яй;

сла́ва Тебе́, от гла́да сме́ртнаго мир избавля́яй.

Сла́ва Тебе́, Гро́зде Боже́ственный, вино́ но́вое источа́яй;

сла́ва Тебе́, жа́жды грехо́вныя мир изыма́яй.

Сла́ва Тебе́, све́тлое Со́лнце Пра́вды и Све́те И́стины;

сла́ва Тебе́, теплото́ю Ду́ха зе́млю животворя́яй.

Сла́ва Тебе́, Небе́сный Дождю́, ороша́яй лице́ земли́;

сла́ва Тебе́, ве́сну благода́ти ми́рови да́руяй.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 7

Хотя́ испра́вити горды́ню первозда́ннаго челове́ка, смири́л еси́ Себе́ Сама́го, Сло́ве Бо́жий, до я́слей и сме́рти кре́стныя, о́браз нам дая́, да вси, обраща́ющии сердца́ своя́ к Тебе́, облеку́тся в ца́рское одея́ние смире́ния Твоего́ и возоблада́ют над страстьми́ и похотьми́, Тебе́, Царю́ вся́ческих, зову́ще: Аллилу́ия.

И́кос 7

Ди́вную та́йну воплоще́ния смири́вшагося Бо́га воспева́юще днесь, прииди́те, возвы́симся от земны́х страсте́й, чи́стою мы́слию присту́пим и припаде́м Богомладе́нцу, в я́слех лежа́щему, во умиле́нии зову́ще:

Сла́ва Тебе́, на земли́ рожде́йся;

сла́ва Тебе́, ми́ру дарова́вый возрожде́ние.

Сла́ва Тебе́, повеле́нием ке́саревым написа́выйся с рабы́;

сла́ва Тебе́, в Кни́гу живота́ на Небеси́ имена́ ве́рных Свои́х вписа́вый.

Сла́ва Тебе́, Соде́телю, Ему́же горе́ слу́жат со́нми А́нгел;

сла́ва Тебе́, послужи́ти прише́дый всеро́дному Ада́му.

Сла́ва Тебе́, Не́бо с земле́ю соедини́вый схожде́нием Твои́м;

сла́ва Тебе́, Бо́га с челове́ком примири́вый Рождество́м Твои́м.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 8

Стра́нна и прише́льца Бо́га ви́дяще на земли́, устрани́мся су́етнаго ми́ра и взы́щем всеме́рно Небе́снаго на́шего Оте́чества, благода́ть, и мир и ми́лость всем прише́льствующим на земли́ у Сы́на Бо́жия прося́ще и воспева́юще Ему́: Аллилу́ия.

И́кос 8

Весь был еси́ до́лу в я́слех, непостижи́ме Го́споди, горе́ на Престо́ле со Отце́м седя́й. А́нгели воспева́ху Тя я́ко Преве́чнаго Бо́га, челове́цы же зря́ху Младе́нца пови́та, мы же убо́зии прино́сим Ти сле́зы умиле́ния, си́це глаго́люще:

Сла́ва Тебе́, недр Оте́ческих не отступи́вый;

сла́ва Тебе́, с до́льними челове́ки неизрече́нно пожи́вый.

Сла́ва Тебе́, непристу́пную сла́ву Твоего́ Божества́ сокры́вый;

сла́ва Тебе́, приступа́ющия к Тебе́ гре́шныя не отри́нувый.

Сла́ва Тебе́, Исто́чниче чистоты́ и свя́тости;

сла́ва Тебе́, с мытари́ и гре́шники вечеря́вый.

Сла́ва Тебе́, блу́дная ча́да, издале́ча зря, с любо́вию срета́яй;

сла́ва Тебе́, вся с покая́нием приходя́щия в лик друго́в Твои́х вчиня́яй.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 9

Вся земля́ бога́тство любве́ Твоея́ позна́, Иису́се Всецарю́, егда́ Себе́ Сама́го я́ко Младе́нца гре́шному ми́ру во очище́ние дарова́л еси́ и в Же́ртву предугото́вал еси́. Сего́ ра́ди ро́ды родо́в, спасе́ннии прише́ствием Твои́м, во ве́ки благода́рственне зову́т Ти: Аллилу́ия.

И́кос 9

Вети́и многовеща́ннии недоуме́ют воспе́ти недомы́слимое и неизрече́нное Рождество́ Твое́: кий бо язы́к, а́нгельский или́ челове́ческий, возглаго́лет сию́ бе́здну ми́лости Твоея́, Спа́се? Приими́ у́бо благода́рныя сле́зы земноро́дных, искупле́нных Твое́ю Кро́вию, Тебе́ припа́дающих и вопию́щих:

Сла́ва Тебе́, изобреты́й всяк путь худо́жества;

сла́ва Тебе́, соедини́вый с челове́ки Божество́.

Сла́ва Тебе́, стра́нно во Своя́ прише́дый;

сла́ва Тебе́, устра́ншихся от Бо́га на Не́бо призыва́вый.

Сла́ва Тебе́, верте́п оби́тель Себе́ избра́вый;

сла́ва Тебе́, Небе́сныя оби́тели лю́дем угото́вавый.

Сла́ва Тебе́, грех ми́ра взе́мляй и обремене́нныя к Себе́ призыва́яй;

сла́ва Тебе́, не́мощи челове́ческия исцеля́яй и тружда́ющияся упокоева́яй.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 10

Спасе́ние соде́лал еси́ ми́ру стра́нным истоща́нием Твои́м и врата́ милосе́рдия Бо́жия и вы́шнее Ца́рствие отве́рзл еси́ соше́ствием Твои́м: отны́не бо сы́нове челове́честии о́бщницы А́нгелом быва́ют и ра́дующеся ле́гкою стезе́ю в Небеса́ восхо́дят, немо́лчно зову́ще: Аллилу́ия.

И́кос 10

Царю́ Преве́чный, рожде́йся на земли́ челове́ка ра́ди, Христе́ Бо́же! Покажи́ ны досто́йны Твоего́ осия́ния, даждь нам во вся дни живота́ на́шего помина́ти Твоя́ благодея́ния и чи́стым се́рдцем воспева́ти Тебе́ сицева́я:

Сла́ва Тебе́, Царю́ веко́в, вы́шнее Ца́рство ве́рным отверза́яй;

сла́ва Тебе́, Па́стырю до́брый, заблу́ждших ове́ц на па́жить цветоно́сную призыва́яй.

Сла́ва Тебе́, Имы́й ключ Дави́дов, Еде́ма врата́ нам отве́рзый;

сла́ва Тебе́, Ключу́ Боже́ственный, отверза́яй сердца́ к прия́тию благода́ти.

Сла́ва Тебе́, Ма́нно Небе́сная, в пусты́ни жития́ сего́ пита́ющая;

сла́ва Тебе́, Иису́се Бо́же, Но́вый Изра́иль в зе́млю обетова́нную вводя́й.

Сла́ва Тебе́, А́гнче Бо́жий, на закла́ние в мир прише́дый;

сла́ва Тебе́, сме́ртию Твое́ю живо́т нам дарова́вый.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 11

Песнь благодаре́ния приими́ от нас, Сло́ве Бо́жий, и сподо́би нас, до́льних, сре́сти чи́стыми дея́ньми и подъя́ти Тя, Христа́, пло́тию младе́нствующа, Христа́, во́лею обнища́вша, Христа́, нас ра́ди на зе́млю низше́дша, Его́же горе́ пою́т непреста́нно А́нгели Бо́жии, зову́ще: Аллилу́ия.

И́кос 11

Све́том одея́йся, я́ко ри́зою, безсла́вен и наг в мир сей вхо́дит, и Бо́жие Сло́во, нося́щее вся глаго́лом си́лы Своея́, немотству́ющий Младе́нец зри́тся на земли́, Ему́же покланя́ющеся вси глаго́лем:

Сла́ва Тебе́, Сло́ве, во я́слех немотству́яй;

сла́ва Тебе́, добро́те молча́ния и сло́ва науча́яй.

Сла́ва Тебе́, Животе́, пови́тый пелена́ми;

сла́ва Тебе́, плени́цы сме́ртныя разреши́ти гряды́й.

Сла́ва Тебе́, благовести́ти ни́щим прише́дый;

сла́ва Тебе́, сокруше́нныя се́рдцем исцели́вый.

Сла́ва Тебе́, пропове́дуяй слепы́м прозре́ние;

сла́ва Тебе́, отпуща́яй сокруше́нныя во отра́ду.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 12

Благода́ть спаси́тельная всем челове́ком яви́ся и всех избавле́ние приспе́: сла́вы бо Госпо́дь низхо́дит на зе́млю ми́лости ра́ди. Го́ры и хо́лми, поля́ и де́бри, челове́цы и А́нгели, вся́кое дыха́ние и тварь, весе́лия Боже́ственнаго исполня́еми, воскли́кните срета́юще Того́: Аллилу́ия.

И́кос 12

Пою́ще ве́лие та́инство Твоего́ вочелове́чения, Го́споди, мо́лим Тя, раби́ Твои́, егда́ прии́деши па́ки на зе́млю с си́лою и сла́вою мно́гою, поми́луй и спаси́ всех, чту́щих Твое́ е́же от Де́вы неизрече́нное Рождество́ и любо́вию зову́щих Ти:

Сла́ва Тебе́, на земли́ воплоти́выйся благовести́ти заблу́ждшим;

сла́ва Тебе́, до а́да снизше́дый взыска́ти па́дших.

Сла́ва Тебе́, сокро́вища благода́ти Твоея́ открыва́яй;

сла́ва Тебе́, удо́бен путь к Небеси́ показу́яй.

Сла́ва Тебе́, вода́ми Креще́ния естество́ челове́ческое обнови́вый;

сла́ва Тебе́, Боже́ственными Та́йнами сие́ обожи́вый.

Сла́ва Тебе́, ве́рныя по исхо́де от жития́ в Ца́рствие Твое́ вводя́й;

сла́ва Тебе́, весе́лие Иерусали́ма го́рняго во ве́ки веко́в подава́яй.

Сла́ва в вы́шних Бо́гу и на земли́ мир, в челове́цех благоволе́ние!

Конда́к 13

О неизсле́димая и неизглаго́ланная Бе́здно Любве́ и Щедро́т, младе́нствуяй пло́тию Иису́се! Приими́ приноси́мое Тебе́ убо́гое сие́ моле́ние и не возгнуша́йся возлещи́ в я́слех безслове́сныя души́ моея́. О Све́те ми́ра незаходи́мый! Просвети́ мя сия́нием Твои́м, прииди́ и оби́тель в се́рдце мое́м сотвори́, да во ве́ки пою́ Ти: Аллилу́ия.

Этот конда́к читается трижды, затем и́кос 1-й и конда́к 1-й

И́кос 1

А́нгелом недове́домую, пресла́вную та́йну Твоего́ смотре́ния на коне́ц веко́в открыва́я, Христе́, я́ко Младе́нец в я́слех безслове́сных возлежи́ши и во убо́зем верте́пе ми́ру явля́ешися, Сло́ве Бо́жий, безнача́льне. О́ле стра́шнаго та́инства! О́ле Бо́жия снизхожде́ния! Те́м у́бо со стра́хом и ра́достию взира́юще на неисповеди́мое истоща́ние Твое́, си́це Тебе́ зове́м:

Сла́ва Тебе́, Све́те Ти́хий, от Де́вы ми́ру возсия́вый; сла́ва Тебе́, А́нгелов Ра́досте, во страну́ пла́ча прише́дый.

Сла́ва Тебе́, Нача́льниче ми́ра, спасе́ние благовести́вый; сла́ва Тебе́, Сы́не Бо́жий, Собо́ю то́е устро́ивый.

Сла́ва Тебе́, Сия́ние О́тчия сла́вы; сла́ва Тебе́, от тьмы́ в чу́дный Тво́й све́т челове́ки призва́вый.

Сла́ва Тебе́, Иису́се, Сы́не Единоро́дный, на зе́млю снизше́дый; сла́ва Тебе́, Иису́се, восхо́д земноро́дным на Не́бо устро́ивый.

Сла́ва в вы́шних Бо́гу и на земли́ ми́р, в челове́цех благоволе́ние!

Конда́к 1

Избра́ннии от все́х племе́н и наро́дов в язы́к свя́т, ца́рское свяще́ние, сы́нове Све́та и насле́дницы Ца́рствия, прииди́те, возра́дуемся Го́сподеви и Спаси́телю Бо́гу, в Вифлее́ме ро́ждшемуся и на́с ра́ди пелена́ми повива́емому, с волхвы́ и па́стыри поклони́мся, а́нгельскую вси́ в весе́лии пою́ще пе́снь:

Сла́ва в вы́шних Бо́гу и на земли́ ми́р, в челове́цех благоволе́ние!

Моли́тва

О Сладча́йший Иису́се, Сло́ве Бо́жий, Сы́не Де́вы, Тебе́ нас ра́ди на земли́ я́вльшагося вся тварь испове́да бы́ти Творца́ и Влады́ку вся́ческих, во́лны морски́я смиря́хуся под но́зе Твои́, умолка́ху ве́тры Твои́м повеле́нием, ме́ртвии сло́вом Твои́м возстава́ху, со́лнце Тебе́ умира́ющу поме́рче, земля́ о Тебе́ потрясе́ся, не́бо Тебе́ восходя́щу отве́рзеся. Тем у́бо и ны́не мо́лим Тя, раби́ Твои́, Влады́ко, ути́ши вся на́ша помышле́ния и чу́вства серде́чная, запрети́ волне́нию страсте́й, возста́ви ны от сме́рти грехо́вныя, сотвори́, да пред све́том любве́ Твоея́ поме́ркнут нам вся сла́вная и кра́сная су́етнаго ми́ра, да потрясу́тся тре́петом ду́ши на́ша и отве́рзутся сердца́ прия́ти Тя Невече́рняго Све́та, просвеща́ющаго вся́каго челове́ка, гряду́щаго в мир. Сподо́би ны́не изы́ти любо́вию в сре́тение Тебе́, низходя́щему на зе́млю нас ра́ди, и в день исхо́да на́шего от вре́меннаго жития́ сего́ усря́щи нас, восходя́щих от земли́, милосе́рдием Твои́м, приими́ в Небе́сная Твоя́ селе́ния и сотвори́ прича́стники сла́внаго Ца́рствия Твоего́, да со А́нгелы святы́ми пое́м и сла́вим Тя, Спа́са душ на́ших, со Безнача́льным Твои́м Отце́м и с Пресвяты́м Ду́хом, Еди́наго в Тро́ице Бо́га, Ему́же подоба́ет вся́кая сла́ва, че́сть и поклоне́ние, во ве́ки веко́в. Ами́нь.

Утвержден Священным Синодом Русской Православной Церкви 26.12.2019 (журнал № 163).

Акафист Божественным Страстям Христовым

Конда́к 1

Взбра́нный Воево́до и Го́споди Небесе́ и земли́, Тебе́, Царя́ Безсме́ртнаго, зря́щи на Кресте́ ви́сяща, вся́ тва́рь измени́ся, не́бо ужасе́ся, основа́ния земли́ восколеба́шася. Мы́ же, недосто́йнии, благода́рственное поклоне́ние Твоему́ на́с ра́ди страда́нию принося́ще, с разбо́йником вопие́м Ти́:

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

И́кос 1

А́нгелов ликостоя́ния восполня́я, не от А́нгел восприя́л еси́, но мене́ ра́ди, Бо́г сы́й, челове́к бы́в, челове́ка уме́рша грехми́ животворя́щим Те́лом и Кро́вию Твое́ю оживи́л еси́; те́мже, толи́цей любви́ Твое́й благода́рни су́ще, вопие́м Ти́:

Иису́се Бо́же, Любы́ Предве́чная, та́ко о на́с, земноро́дных, возблаговоли́вый;

Иису́се, ми́лосте безме́рная, к челове́ком па́дшим до́лу низше́дый.

Иису́се, в пло́ть на́шу оболки́йся, и сме́ртию Свое́ю сме́рти держа́ву разруши́вый;

Иису́се, Боже́ственными Твои́ми Та́йнами на́с обожи́вый.

Иису́се, страда́ньми и Кресто́м Твои́м ве́сь ми́р искупи́вый;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 2

Ви́дев Тя́ А́нгел в вертогра́де Гефсимани́йстем до по́та крова́ва в моли́тве подвиза́ющася, предста́в укрепля́ше Тя́, егда́ я́ко бре́мя тя́жкое грехи́ на́ши отяготе́ша на Тебе́: ты́ бо, Ада́ма поги́бшаго на ра́мо восприи́м, Отцу́ предста́вил еси́, прекло́нь коле́на моля́ся. О се́м у́бо с ве́рою и любо́вию пою́ Тебе́: Аллилу́иа.

И́кос 2

Ра́зума неуразуме́нна во́льнаго Твоего́ страда́ния не уразуме́ша иуде́е: сего́ ра́ди егда́ в нощи́ со свети́льники и́щущим Тя́ ре́кл еси́: А́з е́смь, а́ще и падо́ша на земли́, но по се́м связа́вше Тя́, ведо́ша на суди́ще; мы́ же на се́м пути́, припа́дающе к Тебе́, с любо́вию зове́м:

Иису́се, Све́те ми́ра, от ми́ра лука́ваго возненави́денный;

Иису́се, живы́й во Све́те Непристу́пнем, от о́бласти те́мныя я́тый.

Иису́се, Сы́не Бо́жий Безсме́ртный, от сы́на поги́бели на сме́рть ука́занный;

Иису́се, в Не́мже льсти́ не́сть, от преда́теля ле́стию лобза́нный.

Иису́се, ту́не Себе́ все́м подава́яй, за сре́бреники про́данный;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 3

Си́лою Божества́ Твоего́ проре́кл еси́ трикра́тное отверже́ние ученику́. О́н же посе́м, а́ще и отрече́ся Тебе́ с кля́твою, оба́че, егда́ узре́ Тя́ во дворе́ архиере́йстем, Го́спода своего́ и Учи́теля, умили́вся се́рдцем, изше́д во́н пла́кася го́рько: «При́зри у́бо и на мя́, Го́споди, и порази́ жесто́кое се́рдце мое́, да слеза́ми мои́ми омы́ю грехи́ моя́, поя́ Тебе́: Аллилу́иа».

И́кос 3

Име́яй вои́стинну вла́сть по чи́ну Мелхиседе́кову, я́ко Архиере́й во ве́ки, ста́л еси́ пред беззако́нным первосвяще́нником Каиа́фою, Влады́ка и Госпо́дь все́х; от Твои́х у́бо рабо́в прия́вый муче́ние, приими́ от на́с сицева́я:

Иису́се безце́нный, цено́ю ку́пленный, стяжи́ мя в Твое́ ве́чное насле́дие;

Иису́се, жела́ние все́х, от Петра́ стра́ха ра́ди отве́рженный, не отве́ржи мя́, гре́шнаго.

Иису́се, А́гнче незло́биве, от лю́тых ве́прей терза́емый, изми́ мя от вра́г мои́х;

Иису́се, Архиере́ю, Свое́ю Кро́вию вше́дый во Свята́я Святы́х, очи́сти мя́ от скве́рн плотски́х.

Иису́се свя́занный, име́яй вла́сть вяза́ти и реши́ти, разреши́ моя́ тя́жкая прегреше́ния;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 4

Бу́рею христоуби́йства ды́шуще иуде́е, послу́шавше гла́са отца́ лжи́ и человекоуби́йцы искони́, диа́вола, отверго́ша Тебе́, пра́вый Пу́ть, И́стину и Живо́т; мы́ же Тя́, Христа́, Бо́жию си́лу, в Не́мже вся́ сокро́вища прему́дрости и ра́зума сокрове́на су́ть, испове́дующе, вопие́м: Аллилу́иа.

И́кос 4

Слы́ша Пила́т кро́ткия Твоя́ глаго́лы, а́ки досто́йнаго сме́рти предаде́ Тя на пропя́тие, а́ще и са́м свиде́тельствоваше, я́ко ни еди́ныя вины́ обре́те в Тебе́: ру́це у́бо свои́ умы́, но се́рдце оскверни́; мы́ же, чудя́щеся та́йне во́льнаго страда́ния Твоего́, со умиле́нием зове́м:

Иису́се, Сы́не Бо́жий и Сы́не Де́вы, от сыно́в беззако́ния уму́ченный;

Иису́се, пору́ганный и обнаже́нный, дая́й ле́поту кри́ном се́льным и одева́яй не́бо о́блаки.

Иису́се, насыще́нный ра́нами, пятию́ хле́бы пя́ть ты́сящ насы́тивый;

Иису́се, Царю́ все́х, вме́сто да́ни любве́ и благодаре́ния жесто́кия му́ки прие́мый.

Иису́се, на́с ра́ди ве́сь де́нь я́звленный, уврачу́й я́звы ду́ш на́ших;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 5

Богото́чною Кро́вию Твое́ю ве́сь обле́клся еси́, одея́йся све́том, я́ко ри́зою. Ве́м, вои́стину ве́м со проро́ком, почто́ червле́ны ри́зы Твоя́: а́з, Го́споди, а́з греха́ми мои́ми уязви́х Тя́: Тебе́ у́бо, мене́ ра́ди уя́звленному, благода́рственно зову́: Аллилу́иа.

И́кос 5

Прови́дев Тя́ в ду́се Богоглаго́ливый Иса́ия, безче́стием и ра́нами испо́лненна, ужа́сся вопия́ше: «Ви́дехом Его́, и не име́яше ви́да, ни добро́ты»; мы́ же, зря́ще Тя́ на Кресте́, с ве́рою и удивле́нием зове́м:

Иису́се, безче́стие терпя́й, челове́ка сла́вою и че́стию венча́вый;

Иису́се, на Него́же А́нгели зре́ти не мо́гут, по лани́тома зауше́нный.

Иису́се, по главе́ тро́стию ударе́нный, преклони́ во смире́ние главу́ мою́;

Иису́се, све́тлая Твоя́ очеса́ кро́вию омраче́нная име́вый, отврати́ о́чи моя́, е́же не ви́дети суеты́.

Иису́се, от но́г до главы́ не име́вый це́лости, всего́ це́ла и здра́ва сотвори́ мя́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 6

Пропове́дник Твоего́ незло́бия я́влься Пила́т, показа́ наро́ду ничто́же бы́ти в Тебе́ досто́йно сме́рти; но иуде́е, я́ко зве́рие ди́вии кро́вь узре́вше, скрежета́ху на Тя́ зубы́ свои́ми, «распни́, распни́ Его́», вопию́ще; мы́ же, лобыза́юще пречи́стыя я́звы Твоя́, зове́м: Аллилу́иа.

И́кос 6

Возсия́л еси́ в позо́р и удивле́ние А́нгелом и челове́ком глаго́лющу о Тебе́ Пила́ту: «Се́, челове́к». Прииди́те у́бо, пору́ганному на́с ра́ди Иису́су поклони́мся, вопию́ще:

Иису́се, Тво́рче и Судие́ все́х, от тва́ри Своея́ суди́мый и му́чимый;

Иису́се, прему́дрости Пода́телю, отве́та безу́мным не да́вый.

Иису́се, Врачу́ уя́звленных грехми́, да́ждь ми́ врачевство́ покая́ния;

Иису́се, Па́стырю пораже́нный, порази́ бесо́в, искуша́ющих мя́.

Иису́се, пло́ть имы́й сокруше́нну, сокруши́ се́рдце мое́ стра́хом Твои́м;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 7

Хотя́й челове́ка от рабо́ты вра́жия изба́вити, смири́л еси́ Себе́ пред враги́ Твои́ми, Иису́се, и, я́ко а́гнец безгла́сен на заколе́ние веде́н бы́л еси́, везде́ я́звы терпя́й, да всего́ исцели́ши челове́ка, зову́ща: Аллилу́иа.

И́кос 7

Ди́вное показа́л еси́ долготерпе́ние, егда́ во́ини, руга́ющеся Тебе́, по глаго́лу непра́веднаго судии́, люте́йшими ра́нами уязвля́ху Пречи́стое Те́ло Твое́, я́ко обагри́тися ему́ от но́г до главы́ кро́вию. Сего́ ра́ди со слеза́ми вопие́м Ти́:

Иису́се человеколюби́вый, от челове́к те́рнием увенча́нный;

Иису́се, Божество́м безстра́стный, стра́сти терпя́й, да на́с от страсте́й свободи́ши.

Иису́се, Спа́се мо́й, спаси́ мя, пови́ннаго все́м му́кам;

Иису́се, все́ми оста́вленный, Утвержде́ние мое́, утверди́ мя.

Иису́се, от все́х оскорбле́нный, Ра́досте моя́, возвесели́ мя:

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 8

Ди́вно и стра́нно яви́стася Тебе́ Моисе́й и Илия́ на Фаво́ре, глаго́люща о исхо́де Твое́м, его́же ны́не скончава́еши во Иерусали́ме. Та́мо у́бо ви́девша сла́ву Твою́, зде́ же спасе́ние на́ше узре́вше, зову́т: Аллилу́иа.

И́кос 8

Везде́ от иуде́й гони́мый, мно́гия, ра́ди мно́жества грехо́в мои́х, претерпе́л еси́ поноше́ния и му́ки: еди́ни бо Тя́ проти́вна бы́ти ке́сарю глаго́лют, друзи́и я́ко злоде́я осужда́ют, ини́и же: «Возми́, возми́ и распни́», – вопию́т. От все́х у́бо осужде́нному, и на пропя́тие ведо́мому, Тебе́, Го́споду, из глубины́ души́ глаго́лем:

Иису́се, непра́ведно осужде́нный, Судие́ на́ш, не осуди́ на́с по дело́м на́шим;

Иису́се, изнемога́яй на пути́ под Кресто́м, си́ло моя́, в ча́с ско́рби и озлобле́ния моего́ не оста́ви мене́.

Иису́се, взыва́яй о по́мощи ко Отцу́, Подвигополо́жниче мо́й, в не́мощи мое́й укрепи́ мя;

Иису́се, безче́стие прие́мый, Сла́во моя́, от Сла́вы Твоея́ не отри́ни мене́.

Иису́се, О́бразе Пресве́тлыя Ипоста́си О́тчия, преобрази́ мое́ нечи́стое и мра́чное житие́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 9

Все́ естество́ смяте́ся, зря́ Тебе́ на Кресте́ пове́шена, на небеси́ со́лнце лучи́ своя́ скры́, земля́ потрясе́ся, заве́са хра́ма раздра́ся, ка́мение распаде́ся, а́д уме́рших изве́рже: мы́ же покланя́емся на ме́сте, иде́же стоя́сте пречи́стеи но́зе Твои́, пою́ще: Аллилу́иа.

И́кос 9

Вети́я многовеща́ннии, а́ще и мно́го глаго́лют, но не мо́гут досто́йнаго благодаре́ния возда́ти Боже́ственным страсте́м Твои́м, Человеколю́бче: на́ша же душа́ и те́ло, се́рдце и вся́ соста́вы, со умиле́нием к Тебе́ взыва́ют:

Иису́се, пригвожде́йся на Кресте́, пригвозди́ и упраздни́ рукописа́ние грехо́в на́ших;

Иису́се, ру́це со Креста́ простира́яй ко все́м, привлецы́ и мя́, заблу́ждшаго.

Иису́се, Две́ре овца́м, в ре́бра прободе́нный, введи́ мя я́звами Твои́ми в черто́г Тво́й;

Иису́се, Пло́тию распя́тый, распни́ пло́ть мою́ со страстьми́ и похотьми́.

Иису́се, скончава́яйся в му́ках, да́ждь ми́, да се́рдце мое́ не су́дит и́но что́ ве́дети, то́чию Тебе́ ра́спята;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 10

Спасти́ хотя́й ми́р, слепы́х, хромы́х, прокаже́нных, немы́х и глухи́х исцели́л еси́, духо́в лука́вых отгна́л еси́; неразу́мнии же иуде́е, зло́бою ды́шуще и за́вистию му́чими, пригвозди́ша Тя́ ко Кресту́, не ве́дуще пе́ти: Аллилу́иа.

И́кос 10

Царю́ Преве́чный, Иису́се, ве́сь стра́ждеши за мое́ невоздержа́ние, да всего́ мя́ чи́ста сотвори́ши, во все́м о́браз на́м подая́й, да после́дуем стопа́м Твои́м, зову́ще:

Иису́се, Любы́ неизсле́димая, распе́ншим Тя́ греха́ не поста́вивый;

Иису́се, с во́плем кре́пким и со слеза́ми в вертогра́де моля́йся, научи́ и на́с моли́тися.

Иису́се, вся́ проро́чествия о Тебе́ испо́лнивый, испо́лни во благи́х жела́ния се́рдца на́шего;

Иису́се, ду́х Тво́й в ру́це Отцу́ преда́вый, в ча́с исхо́да моего́ приими́ ду́х мо́й.

Иису́се, ри́зы Твоя́ раздели́ти не возбрани́вый, кро́тко ду́шу мою́ от те́ла отдели́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 11

Пе́ние всеумиле́нное приноша́ше Тебе́ Всенепоро́чная Ма́терь Твоя́, глаго́люще: «А́ще и стра́ждеши на Кресте́, но ве́м Тя́ из чре́ва пре́жде денни́цы от Отца́ рожде́нна, ви́жду бо, я́ко тва́рь вся́ состра́ждет Тебе́; предае́ши ду́х Тво́й Отцу́, и Мо́й ду́х приими́ и не оста́ви Мене́, зову́щую: Аллилу́иа».

И́кос 11

Я́ко светоприе́мная свеща́, у Креста́ Твоего́ горя́ще любо́вию к Тебе́, и Ма́тернею Де́ва Пренепоро́чная обдержа́шеся боле́знию, заходя́щу Тебе́ во гро́б и́стинному Со́лнцу Пра́вды, с Не́юже и се́рдца на́шего моли́твы приими́ сицевы́я:

Иису́се, вознесы́йся на дре́во, да на́с, па́дших, совознесе́ши ко Отцу́ Своему́;

Иису́се, де́вственнику Присноде́ву в Ма́терь дарова́вый, да на́с де́вству и чистоте́ научи́ши.

Иису́се, Тебе́, Бо́га Сло́ва ро́ждшей, ученика́ Богосло́ва вручи́вый, вручи́ и на́с все́х Ея́ Ма́тернему заступле́нию;

Иису́се, ми́ра и а́да победи́телю, победи́ неве́рие, го́рдость жите́йскую и по́хоть оче́с, в на́с живу́щия.

Иису́се, сме́рти держа́вы разруши́телю, ве́чныя сме́рти изба́ви мя́;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 12

Благода́ть Твою́ пода́ждь мне́, Иису́се, Бо́же мо́й, приими́ мя, я́коже прия́л еси́ Ио́сифа с Никоди́мом, да, я́ко чи́стую плащани́цу, ду́шу мою́ принесу́ Тебе́ и воня́ми доброде́телей пома́жу Пречи́стое Те́ло Твое́, и, я́ко во гро́бе, в се́рдце мое́м име́ю Тя́, зовы́й: Аллилу́иа.

И́кос 12

Пою́ще Твое́ во́льное распя́тие, покланя́емся страсте́м Твои́м, Христе́, ве́руем с со́тником, я́ко вои́стинну Бо́жий Сы́н еси́, приити́ име́яй на о́блацех с си́лою и сла́вою мно́гою; тогда́ у́бо не посрами́ на́с, Кро́вию Твое́ю искупле́нных и та́ко вопию́щих:

Иису́се многострада́льный, рыда́нием Де́вы Ма́тере Твоея́ ве́чнаго пла́ча исхити́ ны;

Иису́се, от все́х оста́вленный, не оста́ви мя́ еди́наго в ча́с сме́рти моея́.

Иису́се, с Магдали́ною нога́м Твои́м каса́ющася, приими́ мя;

Иису́се, с преда́телем и распе́ншими Тя́ не осуди́ мя.

Иису́се, с разбо́йником благоразу́мным в ра́й введи́ мя;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 13

О Иису́се Христе́, А́гнче Бо́жий, взе́мляй грехи́ ми́ра, приими́ ма́лое сие́ от всея́ души́ на́шея приноси́мое Тебе́ благодаре́ние и исцели́ ны спаси́тельными Твои́ми страда́ньми от вся́кия боле́зни душе́вныя и теле́сныя, огради́ ны Кресто́м Твои́м от вра́г ви́димых и неви́димых и при кончи́не живота́ на́шего не оста́ви на́с, да сме́ртию Твое́ю изба́вльшеся ве́чныя сме́рти, вы́ну зове́м Тебе́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1

А́нгелов ликостоя́ния восполня́я, не от А́нгел восприя́л еси́, но мене́ ра́ди, Бо́г сы́й, челове́к бы́в, челове́ка уме́рша грехми́ животворя́щим Те́лом и Кро́вию Твое́ю оживи́л еси́; те́мже, толи́цей любви́ Твое́й благода́рни су́ще, вопие́м Ти́:

Иису́се Бо́же, Любы́ Предве́чная, та́ко о на́с, земноро́дных, возблаговоли́вый;

Иису́се, ми́лосте безме́рная, к челове́ком па́дшим до́лу низше́дый.

Иису́се, в пло́ть на́шу оболки́йся, и сме́ртию Свое́ю сме́рти держа́ву разруши́вый;

Иису́се, Боже́ственными Твои́ми Та́йнами на́с обожи́вый.

Иису́се, страда́ньми и Кресто́м Твои́м ве́сь ми́р искупи́вый;

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Конда́к 1

Взбра́нный Воево́до и Го́споди Небесе́ и земли́, Тебе́, Царя́ Безсме́ртнаго, зря́щи на Кресте́ ви́сяща, вся́ тва́рь измени́ся, не́бо ужасе́ся, основа́ния земли́ восколеба́шася. Мы́ же, недосто́йнии, благода́рственное поклоне́ние Твоему́ на́с ра́ди страда́нию принося́ще, с разбо́йником вопие́м Ти́:

Иису́се, Сы́не Бо́жий, помяни́ на́с, егда́ прии́деши во Ца́рствии Твое́м.

Моли́тва

На Кресте́ пригвожде́нный за ны́, Иису́се Христе́, Единоро́дный Бо́га Отца́ Сы́не, ми́лости, любве́ и щедро́т неизчерпа́емая бе́здно! Ве́м, я́ко грехо́в ра́ди мои́х, от неизрече́ннаго человеколю́бия, Кро́вь Твою́ пролия́ти на Кресте́ изво́лил еси́, ю́же а́з, окая́нный и неблагода́рный, досе́ле скве́рными мои́ми де́лы попира́х и нивочто́же вменя́х. Те́м у́бо из глубины́ беззако́ния и нечистоты́ моея́ у́мныма очи́ма на Распя́таго Тя́ на Кресте́ Искупи́теля моего́ воззре́в, со смире́нием и ве́рою во глубину́ я́зв, Твоего́ милосе́рдия испо́лненных, себе́ поверга́ю, грехо́в проще́ния и скве́рнаго жития́ моего́ исправле́ния прося́. Ми́лостив бу́ди мне́, Влады́ко и Судие́ мо́й, не отри́ни мя́ от лица́ Твоего́, но всеси́льною Твое́ю руко́ю Са́м мя́ к Тебе́ обрати́ и на пу́ть и́стиннаго покая́ния наста́ви, да отны́не положу́ спасе́ния моего́ нача́ло. Боже́ственными страда́ньми Твои́ми укроти́ моя́ плотски́я стра́сти; излия́нною Твое́ю Кро́вию очи́сти моя́ душе́вныя скве́рны; распя́тием Твои́м распни́ мя ми́ру с собла́знами его́ и похотьми́; Кресто́м Твои́м огради́ мя от неви́димых вра́г, ловя́щих ду́шу мою́. Прободе́нными нога́ми Твои́ми от вся́каго пути́ лука́ваго возбрани́ нога́м мои́м; прободе́нными рука́ми Твои́ми ру́це мои́ от вся́каго неуго́днаго Тебе́ де́ла воздержи́. Пригвожде́нный пло́тию, пригвозди́ стра́ху Твоему́ пло́ть мою́, да уклони́вся от зла́, творю́ бла́го пред Тобо́ю. Преклони́вый главу́ Твою́ на Кресте́, к земли́ смире́ния приклони́ вознесе́нную мою́ горды́ню; венце́м Твои́м терно́вым огради́ моя́ ушеса́, во е́же не слы́шати неполе́знаго; же́лчь уста́ми вкуси́вый, положи́ хране́ние нечи́стым усто́м мои́м; отве́рстое копие́м име́яй се́рдце, се́рдце чи́сто во мне́ сози́жди; все́ми Твои́ми я́звами, всего́ мя сла́дце в любо́вь Твою́ уязви́, да Тебе́, Го́спода моего́, возлюблю́ все́ю душе́ю, все́м се́рдцем, все́ю кре́постию и все́м помышле́нием. Да́ждь ми́ Себе́ стра́нна и неиму́ща, где́ главы́ подклони́ти; да́ждь ми́ Себе́ Всеблага́го, избавля́ющаго ду́шу мою́ от сме́рти; да́ждь мне́ Себе́ Всесла́дкаго, услажда́ющаго мя́ в ско́рбех и напа́стех Свое́ю любо́вию, да Его́же пе́рвее ненави́дех, прогневля́х, от себе́ изгоня́х и ко Кресту́ пригвожда́х, сего́ ны́не возлюблю́, ра́дуяся прииму́ и сла́дце Кре́ст Его́ до конца́ жи́зни мое́й понесу́. Не да́ждь отсе́ле, о всеблаги́й Искупи́телю мо́й, ни еди́ной мое́й во́ле соверша́тися, поне́же зла́ е́сть и непотре́бна, да не па́ки впаду́ в тя́жкую рабо́ту ца́рствовавшаго во мне́ греха́; но Твоя́ во́ля блага́я, спасти́ мя хотя́щая, да соверша́ется во мне́ всегда́, е́йже мя́ вруча́я, Тебе́, Распя́таго Го́спода моего́, у́мным очесе́м моего́ се́рдца представля́ю и молю́ из глубины́ души́, да и в разлуче́нии мое́м от бре́ннаго моего́ те́ла, Тебе́ Еди́наго на Кресте́ Твое́м узрю́, в ру́це мя́ защище́ния Своего́ прие́млюща, и от возду́шных духо́в зло́бы храня́ща, вселя́юща же со гре́шники, покая́нием Тебе́ благоугоди́вшими. Ами́нь.

Текст акафиста имеет официальное церковное благословение.

Акафист Честному и Животворящему Кресту Господню

Конда́к 1

О всеспаси́тельный Кре́сте и всечестны́й, тебе́ покланя́емся ве́рнии и велича́ем, ра́дующеся боже́ственному твоему́ воздви́жению: но я́ко побе́ды зна́мение и оружие непреобори́мое, огради́ и покры́й твое́ю благода́тию тебе́ вопию́щия: Ра́дуйся, животворя́щий Кре́сте Госпо́день.

И́кос 1

А́нгели с небесе́ неви́димо окружа́ют Крест живоно́сный в стра́се, и светопода́тельную благода́ть оби́льно подаю́ща ны́не ве́рным ви́дяще, ужаса́ются и стоя́т вопию́ще к нему́ сицева́я:

Ра́дуйся, Кре́сте, вселе́нныя храни́телю;

ра́дуйся, Це́ркве прославле́ние.

Ра́дуйся, исцеле́ния изоби́льно источа́яй;

ра́дуйся, преде́лы ми́ра просвеща́яй.

Ра́дуйся, дре́во живоблагоуха́нное и чуде́с сокро́вище;

ра́дуйся, пречу́дный благода́тей пода́телю.

Ра́дуйся, я́ко еси́ подно́жие боже́ственное;

ра́дуйся, я́ко положе́н был еси́ всем на поклоне́ние.

Ра́дуйся, ча́ше, некта́ра испо́лненная;

ра́дуйся, свети́льниче го́рния све́тлости.

Ра́дуйся, и́мже вся тварь благословля́ется;

ра́дуйся, и́мже поклоне́ние Творцу́ возсыла́ется.

Ра́дуйся, животворя́щий Кре́сте Госпо́день.

Конда́к 2

Ви́дящи Еле́на в себе́ жела́ние обрести́ Крест, глаго́лет царе́ви дерзнове́нно: всевожделе́нное души́ твое́й удо́бнейше моему́ тща́нию явля́ется: и́щущи у́бо держа́внейшее ти побе́ды зна́мение, я́ко глаго́леши, зову́: Аллилу́ия.

И́кос 2

Ра́зум неразумева́емый пре́жде цари́ца разуме́вши, а́бие возопи́ к служи́телем: из боку́ земли́ извлещи́ вско́ре и пода́ти Крест потщи́теся, на него́же воззре́вши рече́ в стра́се, оба́че зову́щи си́це:

Ра́дуйся, ра́дости и́стинныя зна́мение;

ра́дуйся, кля́твы дре́вния искупле́ние.

Ра́дуйся, сокро́вище, в земли́ за́вистию сокрыва́емое;

ра́дуйся, явле́йся звезда́ми вообража́емый.

Ра́дуйся, Кре́сте четверолучео́гненный и огнеобра́зный;

ра́дуйся, ле́ствице высокоутвержде́нная, дре́вле предуви́денная.

Ра́дуйся, а́нгелов тихообра́зное чу́до;

ра́дуйся, де́монов многоплаче́вная я́зво.

Ра́дуйся, кра́сное сло́ва сокро́вище;

ра́дуйся, пла́мене пре́лести угаше́ние.

Ра́дуйся, предста́телю неиму́щих;

ра́дуйся, тве́рдый наста́вниче благотеку́щих.

Ра́дуйся, животворя́щий Кре́сте Госпо́день.

Конда́к 3

Си́ла дре́ва кре́стнаго яви́ся тогда́ ко увере́нию и́стинному всех, и безгла́сную и ме́ртвую к животу́ возста́ви, и се бы́сть тогда́ стра́шное виде́ние всем име́ющим жа́ти спасе́ние, во е́же пе́ти си́це: Аллилу́ия.

И́кос 3

Иму́щи Еле́на ору́жие непобеди́мое, востече́ к сы́ну своему́, той же а́бие возра́довася премно́го, позна́в Крест пресла́вный, и в весе́лии душе́внем вопия́ше к нему́ сицева́я:

Ра́дуйся, Кре́сте, све́та прия́телище;

ра́дуйся, Кре́сте, жи́зни сокро́вище.

Ра́дуйся, дарова́ний духо́вных пода́телю;

ра́дуйся, морепла́вателем необурева́емое приста́нище.

Ра́дуйся, трапе́зо, я́ко же́ртву нося́щая Христа́;

ра́дуйся, розго́, грозд иму́щая, вино́ та́инственное источа́ющий.

Ра́дуйся, я́ко ски́птры царе́й охраня́еши;

ра́дуйся, я́ко главы́ змие́в сокруша́еши.

Ра́дуйся, све́тлое ве́ры зна́мение;

ра́дуйся, всего́ ми́ра избавле́ние.

Ра́дуйся, сме́ртным Бо́жие благослове́ние;

ра́дуйся, к Бо́гу о сме́ртных хода́тайство.

Ра́дуйся, животворя́щий Кре́сте Госпо́день.

Конда́к 4

Ре́вность вну́трь боже́ственную Еле́на прие́мши, взыска́ и обре́те со тща́нием в земли́ Крест сокрыва́емый, и яви́вшийся на небеси́ царе́ви, его́же возвы́си, и ви́девше лю́дие ве́рою реко́ша: Аллилу́ия.

И́кос 4

Солнцезра́чен яви́ся Крест в ми́ре, и вси просвеще́ния испо́лньшеся и прите́кше я́ко ко звезде́, зрят сего́, я́коже до́брых вину́, рука́ма освяще́нныма воздви́жена, его́же пою́ще ре́ша:

Ра́дуйся, заре́ мы́сленнаго со́лнца;

ра́дуйся, исто́чниче неистощи́маго ми́ра.

Ра́дуйся, Ада́ма и Е́вы воззва́ние;

ра́дуйся, князе́й а́довых умерщвле́ние.

Ра́дуйся, я́ко воздвиза́емый ны́не нас совоздвиза́еши;

ра́дуйся, я́ко покланя́емый ду́ши на́ша освяща́еши.

Ра́дуйся, апо́столов ми́ру пропове́данная сла́во;

ра́дуйся, страстоте́рпцев благода́тнейшая кре́посте.

Ра́дуйся, Кре́сте, неве́рных обличе́ние;

ра́дуйся, ве́рных челове́ков похвало́.

Ра́дуйся, и́мже низве́ржеся ад;

ра́дуйся, и́мже возсия́ благода́ть.

Ра́дуйся, животворя́щий Кре́сте Госпо́день.

Конда́к 5

Богодарова́нное дре́во уви́девше, вси да прибе́гнем ны́не к покро́ву его́, держа́ще сие́ я́ко ору́жие, обрати́м в бе́гство полки́ враго́в, и косну́вшеся устна́ми подно́жия Неприкоснове́ннаго, воззове́м Ему́: Аллилу́ия.

И́кос 5

Ви́де све́т с небесе́ Константи́н Вели́кий, показу́ющий Креста́ зна́мение звезда́ми, и́мже и побежда́я враго́в мно́жество, потща́ся Дре́во яви́ти и возопи́ти к нему́ сицева́я:

Ра́дуйся, неизрече́ннаго сове́та исполне́ние;

ра́дуйся, рог люде́й благочести́вых.

Ра́дуйся, полки́ враго́в в бе́гство обраща́яй;

ра́дуйся, де́моны я́ко пла́мя сожига́яй.

Ра́дуйся, небе́сный ски́птре ве́рнаго царя́;

ра́дуйся, непобеди́мая побе́до христолюби́ваго во́инства.

Ра́дуйся, горды́ню вра́жию ниспроверга́яй;

ра́дуйся, о душа́х челове́ческих попече́ние прилага́яй.

Ра́дуйся, от мно́гих зол защище́ние;

ра́дуйся, вели́ких благ награжде́ние.

Ра́дуйся, и́мже христоно́сцы взыгра́ют;

ра́дуйся, и́мже распина́телие рыда́ют.

Ра́дуйся, животворя́щий Кре́сте Госпо́день.

Конда́к 6

Ле́ствица, до небе́с досяза́ющая, Крест Госпо́день бысть, вся возводя́ от земли́ к высоте́ небе́сней, с ли́ки а́нгельскими сообита́ти всегда́, оста́вльшия ны́не су́щая я́ко не су́щая, и ве́дущия пе́ти: Аллилу́ия.

И́кос 6

Возсия́в свет всем, Спа́се, су́щим во а́де, просвети́л еси́ до́лу лежа́щия: вра́тницы же а́довы, зари́ не терпя́ще твоея́, я́ко ме́ртви падо́ша. Изба́вльшиися же сих, ны́не зря́ще Крест вопию́т:

Ра́дуйся, уме́рших воскресе́ние;

ра́дуйся, пла́чущих утеше́ние.

Ра́дуйся, а́довых храни́лищ истоще́ние;

ра́дуйся, ра́йския сла́дости вкуше́ние.

Ра́дуйся, же́зле, во́инство еги́петское потопи́вый;

ра́дуйся, па́ки изра́ильския лю́ди напои́вый.

Ра́дуйся, одушевле́нное дре́во, разбо́йника спасе́ние;

ра́дуйся, ши́пок благово́нный, благочести́вых благоуха́ние.

Ра́дуйся, пи́ще а́лчущих духо́вно;

ра́дуйся, печа́те, ю́же прия́ша челове́цы.

Ра́дуйся, Кре́сте, та́инств отверзе́ние.

ра́дуйся, источа́яй боже́ственныя струи́.

Ра́дуйся, животворя́щий Кре́сте Госпо́день.

Конда́к 7

Хотя́щу Моисе́ови изба́вити лю́ди многострада́льныя от гони́теля, дан был еси́ ему́ я́ко жезл, но позна́лся от него́ я́коже Бо́жие зна́мение, сего́ ра́ди изумле́н бысть той могу́ществом Креста́ Госпо́дня и возопи́: Аллилу́ия.

И́кос 7

Зако́н да́вый иногда́ богови́дцу на Сина́и, пригвожде́н бысть во́лею ко Кресту́ за лю́ди беззако́нныя, и упраздни́ зако́на кля́тву дре́внюю, да вси мы, ви́дяще ны́не Креста́ си́лу, воззове́м ему́:

Ра́дуйся, па́дших челове́ков воста́ние;

ра́дуйся, ми́ру сему́ покланя́ющихся паде́ние.

Ра́дуйся, воскресе́ния Христо́ва прославле́ние;

ра́дуйся, мона́шествующих боже́ственное услажде́ние.

Ра́дуйся, дре́во благосенноли́ственное, и́мже покрыва́ются ве́рнии;

ра́дуйся, дре́во, проро́ки глаго́ланное, на земли́ насажде́нное.

Ра́дуйся, ца́рствию на враги́ поможе́ние;

ра́дуйся, христоимени́тому жи́тельству держа́вное предста́тельство.

Ра́дуйся, Судии́ Пра́веднаго явле́ние;

ра́дуйся, челове́ков согреша́ющих осужде́ние.

Ра́дуйся, Кре́сте, сиро́т засту́пниче;

ра́дуйся, Кре́сте, ни́щих богати́телю.

Ра́дуйся, животворя́щий Кре́сте Госпо́день.

Конда́к 8

Стра́нное чу́до ви́девше, стра́нное житие́ поживе́м, ум на не́бо возвыша́юще: сего́ бо ра́ди на Кресте́ Христо́с пригвозди́ся и пло́тию пострада́, хотя́ привлещи́ к высоте́ Ему́ вопию́щия: Аллилу́ия.