Kitobni o'qish: «Müdrikliyə ədalətə uğura 40 çağırış /müntəxabat/»

“Bilik biliyə ehtiyac yaradır”

fikri görkəmli Azərbaycan alimi

Xudu Məmmədova məxsusdur.

MƏHƏMMƏD PEYĞƏMBƏRDƏN ÇOX QİYMƏTLİ QAYDALAR

Peyğəmbərimiz özünə aid 3 şeydən çəkinirdi:

1. Mübahisə və çəkişmələrə girməkdən

2. Lazım olduğundan artıq söz söyləməkdən

3. Özünə aid olmayan işlərlə məşğul olmaqdan.

Başqaları ilə bağlı da 3 şeydən çəkinirdi:

1. Kimisə tənqid etməkdən.

2. Kimisə təhqir etməkdən

3. Başqalarının sirrini öyrənməkdən.

YOHANN VOLFQANQ GÖTE

Alman şair-dramaturqu, mütəfəkkiri və təbiətşünası Yohann Volfqanq Göte qədim alman ticarət şəhəri olan Frankfurt-Maynda, varlı bürger Yohann Kaspar Götenin (1710-1782) ailəsində dünyaya gəlib. Atası imperiya məsləhətçisi, keçmiş vəkil, anası şəhər zadəganının qızı olub. Göte evdə yaxşı təhsil alıb. 1765-ci ildə Leypsiq Universitetində təhsilini davam etdirib. 1770-ci ildə Strasburqda dissertasiya müdafiə edərək Hüquq elmləri doktoru elmi dərəcəsi alıb. Onun yaratdığı iki hissədən ibarət “Faust” dram-poeması dünya ədəbiyyatının ən gözəl nümunələrindən biri hesab olunur. Götenin yaradıcılığı sonralar ümumilikdə Avropa musiqisi, dramaturgiyası, poeziya və fəlsəfəsinin əsas ilhamverici qüvvəsinə çevrilir. Göte 22 mart 1832-ci ildə 82 yaşında dünyasını dəyişib. Həm də maarifçi olan Yohann Volfqanq Götenin təhsil və təhsilin önəmi haqqında çox qiymətli fikirləri var. Götenin təhsil haqda söylədiyi 20 fikri təqdim edirik:

1. İstedad şərtidir. Onun bacarığa çevrilməsi lazımdır. Əslində, bu, istənilən təhsilin əsas məqsədidir.

2. İnsanın təhsili üçün nəsə etmək istəyirsinizsə, onun təhsil və istəklərinin hansı yöndə olduğuna baxmaq lazımdır. Sonra onun seçimlərini qane edəcək, istəklərinə uyğunlaşacaq vəziyyətə gətirmək lazımdır. Beləcə, insanın səhv etmə ehtimalı varsa, vaxtında səhvinin fərqinə varsın. Və ya istəklərinə uyğun ixtisasa yiyələnibsə, ona daha da həvəslə bağlansın və daha əzmlə çalışsın.

3. Alicənab insan yetişməyini dar bir çevrəyə borclu ola bilməz. Həm yaşadığı ölkə, həm dünya onu təsirləndirməlidir. Həm şöhrətə, həm də tənqidə dözə bilməlidir. Həm özünü, həm də başqalarını tanımaq məcburiyyətində olmalıdır. Tənhalığın şirin sərxoşluğuna aldanmamalıdır.

4. Qarşılaşdığımız hər şey bizdə müəyyən izlər qoyur. Hər şey biz fərqinə varmasaq belə, dünyagörüşümüzə təsir edir. Ancaq bunlarla hesablaşmaq yenə də təhlükəlidir.

5. Tək tərəfli təhsil, təhsil deyil. Bir nöqtədən çıxmaq olar, amma müxtəlif yönlərə doğru getmək lazımdır.

6. Lazım olanda məktəblərimiz var, liseylərimiz, hətta dünyaca məşhur universitetlərimiz var. Ancaq insanın və xarakterinin yetişdirilməsi üçün heç nəyimiz yoxdur. Ona görə çoxumuz bu qədər xaraktersizik.

7. Yüz müxtəlif şeyi yarımçıq bilməkdənsə, bir şeyi tam bilib, həyata keçirmək insanı daha yaxşı yetişdirir.

8. İnsanın özü-özünə verə biləcəyi ən böyük mədəniyyət başqalarının onu axtarmadığından əmin olmaqdır.

9. Tək tərəfli olmamaq üçün insan öz sahəsinə uyğun olmayan şeylərlə də maraqlanmağı bacarmalıdır.

10. İnsan məcbur olduğu üçün (ciddi olaraq) ən yüksək şeyə çatmağa cəhd göstərirsə və istəyəndə də (zarafat olsun deyə) ən aşağıya enirsə, ancaq o vaxt çoxyönlüdür.

11. Özünün əfəndisi olmaq istəyən şəxs, özünə hakim olmağı bacarmalıdır.

12. İnsanı, özünün düşünmə və hiss etmə tərzi yaranmadan, xarici şərtlərin təsiri ilə, vəziyyətində baş verən böyük dəyişiklik qədər təhlükə qarşısında qoya biləcək başqa bir şey ola bilməz.

13. Nəcib bir nümunə ağır işləri də asanlaşdırır.

14. Həqiqi şagird bilinənin içindəki bilinməyəni inkişaf etdirməyi öyrənir və ustasına yaxınlaşır.

15. Dərsin xeyri çoxdur, amma həvəsləndirmənin də etdirməyəcəyi şey yoxdur.

16. Özünü bəyənməyən gənc özünü necə yetişdirə bilər? Bomboş təbiət, heç olmasa, özünə xarici görünüş verməyi bacaracaq. Çalışqan insan da, az sonra, xaricdən daxilə doğru özünü yetişdirməyi bacaracaq.

17. Şərtlər bütün insanları tərbiyə edir, nə edilir-edilsin, onlar dəyişdirilə bilməz.

18. Dəlilər və ağıllılar eyni dərəcədə zərərsizdir. Yarı dəlilərlə yarı ağıllılar isə çox təhlükəlidirlər.

19. Qartal havada havaya, zirvədə zirvəyə öyrəşir.

20. Müdriklik yalnız həqiqətdədir.

NİKOLAY BERDYAYEV

Rus filosofu Nikolay Berdyayevin “Azad xalq” əsəri 1917-ci ilin yayında yazılıb və əsərdə bir xalqın köləlikdən azadlığa doğru yolu təhlil olunur. Məqalə rus xalqı haqda yazılıb, amma filosofun mülahizələri ümumbəşəri xarakter daşıyır. Bu yazını oxuyanda təmsil etdiyimiz xalqın da tarixi inkişaf yollarını düşünüb fikri paralellər aparmamaq mümkün deyil.

Azad xalq

Rus xalqı uzun sürən tarixi köləlikdən çıxıb yeni, azad həyata qədəm qoyur. Rus xalqının dözümü çox olduğundan, əcnəbilərdə belə təsəvvür yaranmışdı ki, bu xalq qəlbən kölə bir xalqdır. İndi isə rus xalqı həqiqətən azad xalq olduğunu bütün dünyaya nümayiş etdirməlidir. Hər bir rus özünü idarə etməlidir və artıq hökm mənbəyi onun daxilindədir, xaricində yox. Azad insan kölədən onunla fərqlənir ki, o, özünü idarə etməyi bacarır, qəlbən kölə olan insan isə yalnız tabe olmağı və qiyam qaldırmağı bacarır. Qiyam köləliyin astar üzüdür. Azad insan inqilab edə bilər, amma qiyam qaldırmaz, çünki azad şəxs dövlətinin və vətəninin taleyi haqda düşünür. Yalnız kölə olaraq qalanlar öz dövlətinə və vətəninə yabançı münasibət bəsləyirlər. Xalq o zaman yetkinlik səviyyəsinə çatır ki, özünü idarə etməyi bacarır. Azadlıq ilk növbədə özünüidarə deməkdir. Başqalarını, bütün bir ölkəni yalnız o adamlar idarə edə bilər ki, özlərini, öz fikir və hislərini idarə etməyi bacarırlar. Ölkədə qayda-qanunu o kəslər yarada bilər ki, öz daxillərində qayda-qanun yaradıblar, öz iradələrini ülvi məqsədlərə yönəldiblər.

Azadlıq özbaşınalıq deyil, azadlıq o demək deyil ki, kimin ağlına nə gəlirsə onu da etsin. Azadlıq, ilk növbədə, insan şəxsiyyətinə hörmət deməkdir, insan hüquqlarını sözsüz tanımaq deməkdir. Qəlblərində anarxiya olan insanlar öz millətinə, vətəninə anarxiyadan başqa heç bir şey verə bilməyəcəklər.

Azadlıq özünüməhdudlaşdırma olmadan, nizam-intizam olmadan mümkün deyil. İnsan həqiqəti dərk etməsə azad ola bilməz. İncildə deyilir: “Həqiqəti dərk edərsiniz, o, sizi azad edər.” Bütöv bir xalq o zaman azad olur ki, həqiqəti dərk edir və ona qulluq edir. Əgər bir xalqda nizam-intizam, özünü ali məqsədlərə yönəltmə qabiliyyəti məhv olursa, o xalq vəhşi heyvan sürüsünə çevrilir.

Azad insan zor işlətmir, heç kimə qarşı çıxış etmir, hamıya azadlıq verir və hamının insan hüquqlarını təmin edir. Kim zorakılığa əl atırsa, deməli, hələ kölədir. Hər bir xalq öz ali məqsədinə yalnız öz dövləti çərçivəsində nail ola bilər. Millət öz dövlət qurumunu itirəndə başqa xalqların tabeliyinə düşür. Hər bir xalq öz dövlət qurumuna nail olmaq üçün uzun bir yol keçir və bu yolda ondan möhkəm iradə tələb olunur. Demokratiya hər bir xalqdan özünüidarə və yüksək keyfiyyətlər tələb edir. Xalq zorakılığa əl atırsa, deməli, o xalq hələ demokratiyaya hazır deyil.

Monteskye deyir ki, demokratiya mətanət və ümumi işə məhəbbət tələb edir. Bu mətanət yoxdursa və ümumi işə məhəbbət yoxdursa, deməli, demokratiya öz əksinə, yəni despotizmə çevriləcək.

Rus xalqı nədir və ümumiyyətlə xalq nədir? Xalq bir sinif sosial qrup, fəhlə sinfi və yaxud kəndlilər deyil. Xalqa bütün insanlar, bütün siniflər və qruplar daxildir. Xalq tarixdə minilliklər boyunca mövcud olan ulu bir tamdır və onu bugünkü sinfi mübarizə ilə və ya sosial qrupların münasibəti ilə təyin etmək olmaz. Xalqda uzaq tarixi keçmişlə uzaq tarixi gələcək birləşir. Xalq bu gün baş verən bütün hadisələrdən, əks mənafeli bütün siniflərdən daha dərindir. Xalqın tarixi taleyini bilmək üçün, tanımaq üçün kəndlini və mülkədarı, fəhləni və sahibkarı, taciri və ziyalını yox, onların daxilini, bütün zahiri sosial köynəklərindən dərin olan qəlbini öyrənmək lazımdır. Rus xalqı bütöv bir xalqdır və rus xalqı dünyada mövcud olan heç bir xalqa bənzəmir.

Vətən hissi hər bir xalqda sosial, sinfi fərqlərdən üstündür. Hər bir sağlam, azad yaşamağa qadir insanda bu hiss sinfi mənafe hissindən və sinfi çəkişmələrdən güclüdür. Birlik, milli mənsubiyyət hissi fransızlarda da, ingilislərdə də, almanlarda da var. Əgər bu hiss yoxdursa, xalq məhv olar.

Rus xalqı öz mənafeyini güdən ayrıca hissələrin mexaniki birliyi deyil, bütöv bir xalqdır. Rus xalqının dünyada öz siması var, o heç bir başqa xalqa bənzəməz. Bu xalqın öz tarixi, böyük keçmişi, böyük gələcəyi qarşısında dayanan vəzifələri var və bu xalq dünyada öz yerini, öz işini müdafiə etməlidir.

Hal-hazırda bizdə böyük bir keçid prosesi başlayır. Bu keçidin mahiyyəti yeni şüur və yeni, əsl vətənpərvərlikdir. Köhnə məhv olub, yeni isə hələ yaranmayıb.

Demokratiyaya keçid ilk növbədə özünüidarəyə keçiddir və burada sinfi fərqlərdən söhbət gedə bilməz. Demokratiya xalqın vətəndaş səviyyəsini büruzə verir. Demokratiyanı burjua sinfinə qarşı qoymaq olmaz, bu, ən azı nadanlıqdır. Demokratiya bütöv xalqın ali hakimiyyətidir. Demokratiya fəhlə və kəndli sinfinin hökmranlığı kimi başa düşülməməlidir. Proletariat diktaturası azlığın çoxluq üzərində hakimiyyətidir və bu diktatura məzmun etibarilə demokratiyaya ziddir, antidemokratikdir. Azad xalq heç bir sinfin diktaturasına dözməz.

Uzun illər boyu köləlikdə yaşayan bir xalqın demokratiyaya keçməsi ilk növbədə xalqın tərbiyəsi, şüurunun yüksəldilməsi kimi məsələləri ön plana çəkir. Əgər xalqda insan azadlığına hörmət yoxdursa və insan hüquqlarına hörmət edilmirsə, deməli, o xalq demokratiyadan hələ çox uzaqdır. Əgər inqilab edənlər zorakılığa əl atırsa, gələcəkdə onlara qarşı da zor işlədiləcək. Zor edənin bir zaman özünə də zor edəcəklər, bu, təbiətin qanunudur. Demokratiya insanın xüsusi bir mədəniyyətidir, yalnız azad insanlar azad, demokratik dövlət yarada bilərlər. Xalq o zaman azad və yetkin xalq adına layiq olur ki, o milli birliyini, vahidliyini dərk edir, həm öz dövləti daxilində, həm xaricində başqa dövlətlər və millətlər qarşısında. Xalq daxili hissələrə və bölümlərə parçalanırsa, öz bütövlüyünü, ləyaqətini qorumaq istəmirsə, o hələ azadlığa hazır deyil və kölə vəziyyətinə qayıdır.

Hər bir xalq ruhunun gücü və bütövlüyü ilə tarixdə yaşayır və böyük işlər görür. Xalqın ruhu pozulursa və zəifləyirsə, xalq geriyə çəkilir, tarix səhnəsindən çıxır və solur.

EYNŞTEYN: MƏN DÜNYANI NECƏ BAŞA DÜŞÜRƏM?

Həyatın mənası

İnsan həyatının və ya ümumilikdə üzvi həyatın mənası nədir? Bu suala cavab dinə işarə edir. Onda soruşa bilərsiniz ki, bu sualı verməyin bir mənası varmı? Cavab verirəm: öz həyatını və digər insanların həyatını mənasız hesab edən şəxs, sadəcə bədbəxt deyil, həm də həyat üçün yararsızdır.

Mən dünyanı necə başa düşürəm?

Biz fanilər çox qəribə biz vəziyyətdəyik. Hər birimiz burada müvəqqəti qonağıq, dünyaya nə üçün gəldiyimizi bilmirik, bəzən isə başa düşdüyümüzü zənn edirik. Çox dərinə getmədən gündəlik həyatımızda başqaları üçün, birinci növbədə, xoşbəxtliyimizin üzlərindəki təbəssüm və gümrahlıqdan asılı olduğu insanlar üçün, daha sonra isə, şəxsən tanımadığımız, amma talelərimizin sevgi ilə bağlandığı insanlar üçün mövcud olduğumuzu bilirik. Daxili dünyamın və xarici həyatımın ölü, yaxud diri, bütün digər insanların əməyindən asılı olduğunu, aldığım və hələ də almaqda olduğum hər şeyi eyni ölçüdə geri qaytarmalı olduğumu gündə yüz dəfə öz-özümə xatırladıram. Mən olduqca sadə həyat tərzi sürürəm, lakin tez-tez həmfanilərimin əməyini lüzumsuz istifadə etməyim fikri məni üzür. Cəmiyyətdə sinfi fərqin ədalətsizlik olduğunu və bunun əksər hallarda gücə əsaslandığını düşünürəm. Həm də əminəm ki, təvazökar həyat tərzi fiziki və əqli baxımdan, hamı üçün daha yaxşıdır.

Mən, ümumiyyətlə, insanın fəlsəfi mənada azadlığına inanmıram. Hər kəs yalnız xarici təzyiqlərin deyil, həm də daxili zərurətin təsiri altında hərəkət edir. Şopenhauerin “insan istədiyi hər şeyi edə bilər, lakin o, hər şeyi istəyə bilməz” sözü gəncliyimdən bəri mənə ilham vermişdir; həm öz həyatımdakı, həm də digərlərinin həyatındakı çətinliklər qarşısında daima bir ovuntu və tükənməz səbir mənbəyi olmuşdur. Bu düşüncə insanı asanlıqla iflic edə bilən məsuliyyət hissini mərhəmətli şəkildə yüngülləşdirir, özümüzü və digərlərini çox ciddi qəbul etməyimizin qarşısını alır və həyata yumorla baxmağımıza imkan yaradır.

İnsanın öz mövcudluğunun və ya hər hansı digər yaradılışın mənasını və ya məqsədini sorğulaması ümumilikdə, obyektiv baxımdan həmişə absurd görünüb mənə. Bununla yanaşı, hər kəsin səylərini və mühakimələrini yönləndirən müəyyən idealları var. Bu mənada mən heç vaxt rahatlıq və xoşbəxtliyə nəticə olaraq yanaşmamışam, belə bir əxlaqi zəmin daha çox donuz sürüsünə yaraşır. Yolumu işıqlandıran və mənə zaman-zaman həyatı sevinclə qarşılamaq cəsarəti verən ideallar Həqiqət, Mərhəmət və Gözəllik olmuşdur. Eyni düşüncəni paylaşdığım insanlarla həmrəy olduğumu hiss etməsəm, incəsənətdə və elmi araşdırmalarda əlçatmaz olan məqsədə doğru getməsəm, həyat mənə bomboş görünərdi. İnsani səylərin bəsit məqsədləri mal-mülk əldə etmə, yalançı uğur qazanma, dəbdəbəli yaşama həmişə məni diksindirib.

Mənim güclü sosial ədalət və sosial məsuliyyət hissim həmişə digər insanlar və cəmiyyətlərlə birbaşa təmasa olan ehtiyacım ilə qəribə şəkildə ziddiyyət təşkil edib. Mən yalnız insanam heç vaxt sözün əsl mənasında ölkəmə, evimə, dostlarıma və hətta ən yaxın ailə üzvlərimə ürəkdən bağlı olmamışam; həmişə bütün bu bağlara qarşı soyuqluq və illər keçdikcə artan yalnız qalmaq ehtiyacı hiss etmişəm. İnsan digər insanlarla qarşılıqlı anlaşma və rəğbət hissinin limitlərinin olduğunu təəssüflənmədən dərk edir. Şübhəsiz ki, bu zaman o, öz sadəlövhlüyü və laqeydliyindən nələrisə itirir; digər tərəfdən isə başqalarının fikirlərindən, mühakimələrindən və vərdişlərindən asılı olmur və öz daxili balansını belə etibarsız təmələ əsaslanmaqdan çəkindirir. Mənim siyasi idealım demokratiyadır. Hər kəs bir fərd olaraq hörmətlə qarşılanmalı, lakin heç kim bütləşdirilməməlidir.

Taleyin ironiyasıdır ki, mənim özüm insanlar tərəfindən hədsiz heyranlıq və hörmətlə qarşılanıram. Bu nə mənim günahımdır, nə də buna layiqəm. Bunun səbəbi yəqin ki, insanların cılız gücüm və sonsuz mübarizəm nəticəsində əldə etdiyim bir neçə ideyanı başa düşmək arzusudur.

Mən tamamilə əminəm ki, hər hansı təşkilatın məqsədlərinə çatması üçün tək bir nəfərin düşünməsi, idarə etməsi və ümumilikdə öhdəlik götürməsi lazımdır. Amma idarə edilənlər təzyiq altında olmamalıdır. İnsanlar öz liderlərini seçmək imkanına malik olmalıdırlar. Mənim fikrimcə zor tətbiqinə əsaslanan avtokratik sistem qısa müddətdə tənəzzülə uğrayır. Çünki güc, əxlaqı aşağı olan insanları özünə cəlb edir. Mən əminəm ki, dahi tiranları əclafların əvəz etməsi dəyişməz bir qaydadır. Bu səbəbdən də, hazırda İtaliya və Rusiyada gördüyümüz sistemlərə qarşı həmişə müxalif olmuşam. Bugün Avropada demokratik idarəetmə formasının gözdən düşməsinin səbəbi demokratiyanın ana ideyasında deyil, hökumət başçılarının qeyri-stabilliyi və seçki sisteminin şəxsləri ayrı-ayrı nəzərə almayan xarakterində axtarmaq lazımdır. Məncə, bu baxımdan Amerika Birləşmiş Ştatları doğru yolu tapıb. Onlar uzun müddət üçün seçilmiş məsuliyyətli prezidentə sahibdirlər və prezidentin öz məsuliyyətlərini yerinə yetirmək üçün kifayət qədər səlahiyyətləri var. Digər tərəfdən, bizim siyasi sistemimizdə xəstəlik və ya ehtiyac anında fərdə qarşı nümayiş etdirilən qayğını yüksək qiymətləndirirəm. İnsanlığın ehtişamında mənə görə doğrudan da dəyərli olan siyasi dövlət deyil, yaradıcı və düşüncəli şəxs şəxsiyyətdir; alicənab və əzəmətli olan odur, düşüncədə və hisslərdə küt olaraq qalan isə sürüdür.

Bu mövzu məni sürü həyatını yaşayan insanların ən pis təzahüründən, heç sevmədiyim hərbi sistemdən bəhs etməyə vadar edir. Əgər insan orkestrin sədaları altında cərgə ilə marş etməkdən zövq alırsa, bu, ondan zəhləm getməsi üçün kifayətdir. Ona baş beyin səhvən verilib; ona lazım olan ancaq onurğa beynidir. İnsan sivilizasiyasının bu “taun ləkəsini” qısa zamanda aradan qaldırmaq lazımdır. Əmrə əsaslanan qəhrəmanlıq, mənasız zorakılıq və vətənpərvərlik adlanan bu iyrənc cəfəngiyat bütün bunlara necə də nifrət edirəm! Müharibə mənim üçün rəzil və çirkin bir işdir. Belə bir çirkinlikdə iştirak etməkdənsə, parça-parça olmağı üstün tutaram. Bütün bunlara baxmayaraq, insan soyu haqqında yüksək fikrə sahibəm və inanıram ki, millətlərin sağlam düşüncəsi sənaye və siyasi dairələrin maraqları tərəfindən məktəblər və mətbuat vasitəsilə sistemli olaraq korlanmasaydı, bu kabus çoxdan yox olmuşdu.

Hiss edə biləcəyimiz ən gözəl təcrübə həyatın sirli tərəfidir. Bu fundamental emosiyalar əsl incəsənətin və əsl elmin beşiyidir. Bunu bilməyənlər heyran olmaq və valeh olmaq bacarığını itirmişlər ölü kimidirlər və onların gözləri görmür. Həyatın sirləri ilə qarşılaşma, qorxu hissi ilə qarışaraq dinləri yaratmışdır. Nüfuz edə bilmədiyimiz nəyinsə mövcud olduğunu bilmək, dərində olan səbəbləri və parlaq gözəlliyi ən ibtidai şəkildə də olsa qavrama cəhdlərimiz, məhz bu biliklər və bu emosiyalar əsl dini yaradır. Bu mənada və yalnız bu mənada mən dindaram. Mən öz yaratdıqlarını mükafatlandıran və cəzalandıran və ya bizim malik olduğumuz iradə ilə eyni iradəyə malik bir Tanrını təsəvvür edə bilmirəm. Fiziki ölümdən sonra həyatı da başa düşmürəm və başa düşmək istəmirəm; bu anlayışlar yalnız qorxmuş və zəif insanların absurd eqoizminə xasdır. Mən həyatın sonsuzluğundakı sirr və kainatın möcüzəli strukturunun dərk edilməsi, təbiətdə özünü büruzə verən Səbəbin cüzi bir hissəsinin başa düşülməsinə edilən cəhd ilə kifayətlənirəm.

UMBERTO EKONUN NƏVƏSİNƏ YAZDIĞI MƏKTUB

Mənim əziz nəvəm,

İstəməzdim ki, bu milad məktubu De Amicis sayağı səslənsin və bizim kimilərə, vətənə, dünyaya və bu qəbildən olan digər şeylərə sevgi bəsləməyi təbliğ etsin. Əks təqdirdə mənə qulaq asmazdın (sən artıq böyüksən, mən isə çox qoca), çünki dəyərlər sistemi o qədər dəyişib ki, mənim məsləhətlərim yersiz görünə bilər.

Beləliklə, iPad-i istifadə edərkən (iPad-dən istifadə etməməyi sənə rəva bilməməkdə məqsədim özümü çox danışan baba olmaqdan sığortalamaq deyil; sadəcə özüm də onu çox istifadə etdiyimdən bu məsələyə toxunmuram) belə əməl edə biləcəyin bir məsləhətin üzərində dayanmaq istəyirəm. Sənə maksimum bu məsləhəti verə bilərəm: əgər təsadüfən iPad-ində iki insan övladı arasındakı və yaxud bir insan övladı ilə bir heyvan arasındakı əlaqəni göstərən yüzlərlə pornosaytlardan birinə daxil olsan, çalış, seksin yalnız bundan ibarət olduğuna inanmayasan. Bundan əlavə, kifayət qədər monoton olan bu səhnəciklər, sənin çölə çıxıb həqiqi qızları görməməyin üçün təşkil olunub. Əvvəlcədən deyim ki, bu məsləhətimi sənin heteroseksual olduğunu düşünərək dilə gətirirəm, yox belə deyilsə, mənim tövsiyəmi öz mühitinə uyğunlaşdır: diqqətini məktəbdəki və yaxud oyun meydançalarındakı qızlara yönəlt, çünki həqiqi qızlar TV-də gördüyün qızlardan daha yaxşıdırlar və bir gün internetdəki qızlardan daha çox həqiqi qızlardan məmnun qalacağının şahidi olacaqsan. Səndən daha təcrübəli birinin sözlərinə inan (əgər mən ancaq kompüterdə seksə baxsaydım, sənin atan doğulmazdı, sən də kim bilir haralarda olardın, bəlkə heç olmazdın da).

Əslində mən sənə yuxarıda sadaladıqlarım barəsində deyil, sənin yaşıdlarının, səndən daha böyüklərin, bəlkə də onlar universitet tələbələridir, yoluxduğu bir xəstəlik – yaddaşın itirilməsindən danışmaq istəyirəm.

Bu danılmaz bir həqiqətdir ki, bir gün sənə Carlo Manyonun kim olduğunu və yaxud Kuala Lumpurun harada yerləşdiyini bilmək lazım gələrsə, bir düyməni basmağın kifayətdir ki, internet bunu sənə desin. Əgər təsadüfən sənə bunu bilmək yenidən lazım olarsa, məsələn, hər hansı ev tapşırığını edərkən, gör, öyrəndiklərini onları ikinci dəfə axtarmağa məcbur olmadan nə qədər yaxşı xatırlayırsan. Bunun pis cəhəti odur ki, kompüterin hər an sənə istədiyini deyə biləcəyini düşündüyündən, sən öyrəndiklərini yadda saxlamağın ləzzətindən məhrum olacaqsan. Bu, bir az da, bir küçədən digərinə avtobus və ya metro ilə getməyin (tələsəndə bu, doğrudan da, çox rahatdır) mümkün olduğunu biləndən sonra piyada gəzməyin lazımsız olduğunu hesab etməyə bənzəyir. Amma piyada gəzməyi dayandırsan, əlil arabasıyla hərəkət edən insana çevrilərsən. Əlbəttə, bədənini idarə etmək üçün idmanla məşğul olduğunu bilirəm, ona görə də gəl yenidən beyninə qayıdaq.

Yaddaş da ayaq əzələləri kimidir, əgər onu məşq etdirməsən, zamanla zəifləyər və sən (ağıl baxımından) əlil, yəni (açıq danışsaq) bir axmaq olarsan. Bundan əlavə hamımızın qocaldıqda Alzheimer xəstəsi olmaq (yaddaşı itirmək) təhlükəsi var və bu xoşagəlməz bəlanı önləməyin yollarından biri də yaddaşı inkişaf etdirməkdir.

Beləliklə, sənə öz reseptimi təqdim edirəm. Hər səhər bir beyt, qısa bir şeir və yaxud böyüklərimizin bizi öyrənməyə vadar etdiyi “La Cavallina Storna”nı, yaxud “İl sabato del vilaggio”nu öyrən. Hələ dostlarınla kimin yaxşı yadda saxladığı haqqında yarış da keçirə bilərsən. Əgər şeir xoşuna gəlmirsə, bunu klubların heyəti ilə də edə bilərsən. Amma Roma klubunun yalnız bu günkü heyətini yox, həm də digər klubların heyətini, klubların keçmişdəki heyətlərini öyrənməlisən (təsəvvür et ki, mən Torino klubunun bütün oyunçuları ilə birlikdə Superqada təyyarə qəzasına uğradığı zamankı heyətini hələ də xatırlayıram: Baçiqalupo, Ballarin, Marozo və digərləri). Bundan əlavə, dostlarınla “Kim daha yaxşı yadda saxlayır” yarışı da keçirə bilərsən, məsələn, oxuduğun kitablar haqqında (xəzinələr adasına yollanan İspanyolanın göyərtəsində kimlər var idi? Lord Treloni, Kapitan Smollet, Doktor Livsi, Con Silver, Cim ....). Bax gör dostların üç muşketyorun və D’Artanyanın nökərlərinin adlarını xatırlayırlarmı (Grimo, Bazen, Muşketon və Planşe). Yox, əgər “Üç muşketyor” əsərini oxumaq istəmirsənsə (bununla nə itirdiyini bilməsən də), belə bir oyunu, oxuduğun digər əsər əsasında et.

Bu, bir oyuna bənzəyir (zatən bir oyundur), amma başının personajlarla, hekayələrlə, müxtəlif xatirələrlə necə dolduğunu hiss edəcəksən. Soruşacaqsan ki, niyə vaxtilə kompüterlər elektron beyin adlandırılırdı. Çünki kompüterlər sənin (bizim) beyninin modeli əsasında düzəldilib. Amma bizim beynimiz kompüterdən daha çox əlaqələrə malikdir. Beyin həmişə səninlə olan kompüterdir və məşq etdirməklə onun imkanlarını genişləndirmək olar, masaüstü kompüterin isə bir müddət istifadə edəndən sonra sürətini itirir və bir neçə ildən sonra onu dəyişməli olursan. Məşq etdirəcəyin halda beynin sənə doxsan yaşına qədər də xidmət edə bilər və doxsan yaşında indikindən daha çox şey xatırlayacaqsan. Həm də bu xidmət pulsuzdur.

Bir də tarixi yaddaş var. Yəni, sənin indiki həyatına və oxuduqlarına deyil, sən doğulmazdan əvvəl baş verənlərə aid olan yaddaş.

Bu gün əgər bir filmə getsən, mütləq filmin əvvəlində zala daxil olmalısan. Və elə film başlayan kimi də kimsə, belə demək mümkündürsə, sənin əlindən tutur və orada baş verənləri sənə danışır. Bizim vaxtımızda isə zala hər dəqiqə, hətta filmin ortasında da daxil olub göstərilənlərə əsasən, filmin əvvəlində nələr olduğunu anlamağa çalışırdıq (sonra, film yenidən başlayanda, baxmadığımız hissələri düzgün başa düşmüşükmü deyə yoxlayardıq, film xoşumuza gələndə zalda qalıb ona bir də baxmaq olurdu). Bəli, həyat da bizim vaxtlarda kinonu seyr etməyə bənzəyir. Biz həyata yüz min illər ərzində baş vermiş hadisələrin ortasından daxil oluruq və bizdən əvvəl baş verənləri anlamağımız vacibdir. Bu, indi bu qədər çoxlu hadisələrin niyə baş verdiyini anlamaq üçün lazımdır.

Bu gün məktəbdə (sən öz oxuduqlarından əlavə) sənə sən doğulmazdan əvvəl baş verənlər haqqında öyrətməlidirlər, görünür, onlar bu işi yaxşı görmürlər. Çünki bəzi araşdırmalar göstərir ki, bu günün uşaqları, hətta universitetə gedən gəncləri, əgər 1990-cı ildə doğulublarsa, 1980-ci ildə nə baş verdiyini bilmirlər (bəlkə də bilmək istəmirlər). Bəzi statistikalara görə, əgər bəzilərindən soruşsaq ki, Aldo Moro kim olub, cavab verəcəklər ki, “Qırmızı Briqada”nın başçısı olub. Halbuki, Aldo Moro elə məhz “Qırmızı Briqada” tərəfindən öldürülüb.

“Qırmızı Briqadalar” siyasi səhnəni cəmi otuz il bundan əvvəl tərk etsələr də çoxları üçün sirr olaraq qalırlar. Mən 1932-ci ildə, İtaliyada faşistlər hakimiyyətə gələndən, on il sonra doğulsam da “Romaya Yürüş” zamanı kimin baş nazir olduğunu bilirdim. Bəlkə də faşistlərin dəyişdiyi bu baş nazir haqqında məlumatları mənə öyrətməkdə faşist məktəblərinin məqsədi onun (“qorxaq Fakta” – Luici Fakta) axmaq və pis nazir olduğunu göstərmək idi. Olsun, amma yenə də ən azından onun haqqında məlumatlı idim. Bundan əlavə, məktəb bir yana qalsın, mən doğumumdan iyirmi il əvvəl səssiz filmlərdə çəkilmiş Francesca Berlinini tanıdığım halda, bu günün gəncləri iyirmi il əvvəlki kino aktrisalarını tanımırlar. Bəlkə də, mən evimizdə köhnə əşyaların saxlandığı otaqdakı köhnə jurnalları vərəqləməyi sevdiyimdən bunları bilirdim. Yeri gəlmişkən, sənə də köhnə jurnalları vərəqləməyi məsləhət görərdim, çünki belə etməklə də sən doğulmazdan əvvəl baş verənləri öyrənə bilərsən.

Bəs keçmişdə olanları öyrənmək niyə bu qədər vacibdir? Çünki belə biliklər çox vaxt indiki hadisələrin gedişini anlamağa kömək edir və istənilən halda, futbol klublarının heyətlərini bilmək kimi, yaddaşımızı zənginləşdirir.

Nəzərə al ki, yaddaşını məşq etdirməyi yalnız kitab və jurnallarla yox, internet vasitəsiylə də edə bilərsən. Belə ki, sən internetlə yalnız dostlarınla deyil, dünya tarixi ilə də “çatlaşa” (belə demək mümkündürsə) bilərsən. Hetlər kimlərə deyilir? Komisard kimdir? Kolumbun gəmiləri necə adlanırdı? Dinozavrların nəsli nə zaman kəsilib? Nuhun gəmisində sükanın olması nə qədər mümkündür? Öküzlərin əcdadına nə deyilir? Yüz il əvvəllər də pələnglər mövcud idimi? Mali imperiyası haqqında nə bilirsən? Və bu haqda tarixə kim məlumat verib? Tarixdə ikinci Roma Papası kim olub? Mikki Maus nə zaman ekranlaşdırılıb?

Bu siyahını sonsuza qədər uzada bilərəm və hamısı da sənə gözəl araşdırma macərası olar. Və bütün bunları yadda saxlamaq sənin xeyrinə olar. Gün gələcək, sən də qocalacaqsan və sənə elə gələcək ki, minlərlə həyat yaşamısan. Sanki, sən də Vaterloo döyüşündə iştirak etmisən, Yuli Sezarın qatilinə köməklik etmisən və Bertoldo Şvarz qızıl hazırlamaq üçün müxtəlif maddələri qarışdıran zaman səhvən barıtı kəşf etdiyi və partladığı (elə ona haqq olub) yerin yaxınlığında olmusan. Öz yaddaşlarını zənginləşdirməyən digər dostların isə sadəcə bir həyat – öz həyatlarını yaşayacaqlar ki, bu da çox cansıxıcı və böyük emosiyalardan məhrum bir həyatdır.

Buna görə də öz yaddaşını zənginləşdir, elə günü sabahdan “La Vispa Teresa”-nı öyrən.

İtalyan dilindən tərcümə etdi: Abuzər Cəfərov

Bilmirəm indiki yeniyetmələrin böyümək imkanı hələ qalır, ya yox. Amma gözləri mobil telefonlara dikilmiş böyüklər həmişəlik itiriliblər.

U.Eko

T. CEFERSON SƏMƏRƏLİ KEÇƏN ÖMRÜN 10 ŞƏRTİNİN OLDUĞUNU QEYD EDİRDİ:

1. Bu günün işini sabaha qoyma.

2. Özün edə biləcəyin işi başqasına gördürmə.

3. Nə qədər ki, pul əlində deyil, onu xəyalən də olsa xərcləmə.

4. Sənə lazım olan şeyi, “ucuzdur” deyə dərhal alma, fikirləş.

5. Təşəxxüs, iddia bizə aclıq və soyuqdan baha başa gəlir.

6. Biz az yediyimizə görə heç vaxt peşman olmuruq.

7. Həvəslə görülən iş adamı bezdirməz.

8. Baş verməmiş, amma baş verə biləcək şeylərə görə nə qədər əzab çəkmişik.

9. Hər bir işin asan tərəfindən yapış.

10. Qəzəblənmisənsə, nəsə deməzdən əvvəl 10-a qədər, bərk qəzəblənmisənsə 100-ə qədər say.

HƏZRƏT ƏLİDƏN BEŞ HİKMƏT

Beş şey yaxşıdır, hər adamda ola. Amma sahibində olsa daha yaxşıdır: elm, ədalət, səxavət, səbir və həya. Elm alimlərdə, ədalət hakimlərdə, səxavət varlılarda, səbr kasıblarda, həya qız-gəlinlərdə. Elmsiz alim tavansız ev kimidir. Ədalətsiz hakim susuz arx kimidir. Səxavətsiz varlı meyvəsiz ağac kimidir. Səbirsiz yoxsul işıqsız lampa kimidir. Həyası olmayan qız-gəlin duzsuz təam kimidir.

Müsəlmanın boynunda beş haqq var: salamın cavabını vermək, çağırışa getmək, qonşuluqda sülh etmək, xəstəyə baş çəkmək, dəfndə iştirak etmək.

Elm beş şeydə cəmləşir:

Çox sual etmək, çox məşğul olmaq, pak işlər görmək, dahilərə xidmət etmək və Yaradandan kömək istəmək.

Beş şey böyük nemətdir: Can sağlığı, əmin-amanlıq, ruzi bolluğu, müvafiq munis (yaxın adam, sirdaş, ürək dostu), yaxşı övlad.

Beş şey insan üçün sirdir: Qiyamət nə vaxt olar, nə vaxt yağış yağar, hamilə qadının qız və ya oğlan doğması, sabahkı qazancının nə olacağı və nə vaxt öləcəyi.

Xeyirli meyvə beşdir: Nar, alma, heyva, üzüm, tər xurma.

Beş şey alqışlanar: öz ailəsinin qeyrətini çəkmək, səxavətli olmaq, yumşaq xasiyyətli olmaq, doğruçul olmaq, şücaətli olmaq.

Beş şey qəbahətdir: qoca adamın eşqə düşməsi, padşahın hiddətlənməsi, şərəfli adamın yalan danışması, dövlətlinin xəsisliyi, alimin tamahkarlığı.

Beş şeyin – zülm, təkəbbür, həsəd, xəyanət və hiylənin müştərisi beş nəfərdir: zülmün müştərisi padşahlar, təkəbbürün müştərisi obalarda tək yaşayanlar, həsədin müştərisi alimlər, xəyanətin müştərisi tacirlər, hiylənin müştərisi pis qadınlardır.

Dünyanın möhnəti beşdir: qərib yerdə xəstələnmək, qocalıqda yoxsulluq, gözlü ikən kor olmaq, ağıllı ikən dəli olmaq və cavan ölmək.

Beş şeyi öldürmək günahdır: meymunu, dəvəquşunu, şanapipiyi, bal arısını, qarışqanı.

Beş şeyi öldürmək günah deyil: qarğanı, çalağanı, ilanı, əqrəbi, quduz iti.

Ənuşirəvanın xəzinəsində tapılan bir lövhədə beş sətir yazılıbmış:

Hər kimin dostu yoxdur ünsiyyəti yoxdur, hər kimin qardaşı yoxdur arxası yoxdur, hər kimin arvadı yoxdur eşq-işrəti yoxdur, hər kimin malı yoxdur cəlalı yoxdur, hər kimin bu şeyləri yoxdursa, qəm-qüssəsi yoxdur.

HARVARD MƏZUNLARI UĞUR HAQQINDA

Harvard Universitetinin əməkdaşları və ən uğurlu məzunları arasında aparılan araşdırmanın nəticələrinə görə xoşbəxtlik və uğurun 7 şərti var:

1. Həyatdakı çətinliklərə qarşı mübarizə aparmaq və uyğunlaşmaq.

2. Təhsil.

3. Sevgi və sədaqətə əsaslanan evlilik.

4. Siqaretdən istifadə etməmək.

5. Spirtli içkidən həddən çox istifadə etməmək.

6. Məşq.

7. Sağlam bir çəkidə qalmaq.

QANUNİ SULTAN SÜLEYMAN ÖLƏRKƏN 3 ŞEYİ VƏSİYYƏT EDİB:

1) Qoy mənim tabutumu ən yaxşı həkimlər aparsın. Hamı bilsin ki, hətta onlar da ölümün qarşısında acizdirlər.

2) Qəbrə çatana qədər yolda hamıya qızıl paylayın. Qoy başa düşsünlər ki, nə sərvət qazanırsan qazan o, bu dünyada qalır.

3) Əllərim tabutdan çöldə qalsın. Qoy, hamı bilsin ki, Qanuni sultan Süleyman belə bu dünyadan əliboş getdi.

CORCİO ARMANİNİN BİZNES QAYDALARI

• Mən həmişə həddindən artıq məsuliyyətli olmuşam, başqa cür yaşamaq üsulu mənə bəlli deyil.

• Öz işinə həddindən artıq aludə olan, onu sevən istənilən insanın gələcək mərhələlərdə uğur qazanmaq şansı sadəcə tendensiyaları izləyən insanlarınkından daha çoxdur.

• Mən dəb yaratmıram, mən sadəcə insanları geyindirirəm.

• Mən heç zaman dizayn xətrinə dizayna inanmamışam. Mənim üçün ən vacibi odur ki, insanlar həqiqətən də mənim libaslarımı geyinə bilsin.

• İnsanlara özəllik hissi bəxş etmək xoşuma gəlir.

• Daha cavan olanda, demək olar ki, heç zaman gülmürdüm.

• Şəxsən mən hesab edirəm ki, kontrafaktların olması yaxşıdır, çünki onların mövcudluğu sübut edir ki, biz insanların surətini çıxarmaq istədiyi şeyləri yaradırıq.

• İşləyərək, mən ictimai sifarişləri təmin etmək üçün o qədər çox şey etmişəm ki… Belə bir öhdəlik artıq şəxsi həyatımı itirdiyimi göstərir.

• İlham mənbəyi yeganə deyil. Əsl mənbə mənim dünyagörüşüm və həyatımda rəhbər tutduğum prinsiplərdir.

• Qulaq asın, davamçım ilə bağlı son 15 ildə verilən suallar məni artıq bezdirib. Sual həmişə eyni cür səslənir və cavab da birdir: Nə qədər ki, mən burdayam, boss mənəm.

• Siz aradabir şübhə etməlisiniz Mənim çalışdığım əməkdaşlarım var. Mən əvvəlcə onları dinləyir, sonra qərar qəbul edirəm.

• Müstəsna bir şey yaratmaq üçün sizin idrakınız fasiləsiz olaraq ən xırda detalların üzərində cəmlənməlidir.

• Nəzərə alınmalı olan çoxlu şeylər var: iddialarınız, eqonuz, mətbuat, istehlakçılar. Siz yenidən zirvəyə qalxacağınıza heç vaxt əmin ola bilməzsiniz.

• Dözümlü insanlar qalib gəlir. Bu, o deməkdir ki, qələbə üçün hər hansı bir əqidə, dayaq lazımdır ki, ona söykənərək öz əməllərinizi gerçəkləşdirəsiniz.

• Siz düşündüyünüzdən daha çox bilirsiniz və bildiyinizdən daha çox bacarırsınız. 1985-ci ildə mənim biznes tərəfdaşım vəfat edəndə çoxları düşünürdü ki, mən kompaniyanı bağlayacağam. Bunun əvəzinə isə mən onun etdiyi işləri necə etməyi öyrəndim. Öz daxili qüvvənizə layiq olduğundan daha az qiymət verməyin, onu yetərincə dəyərləndirməmək olmaz.

• İş mənim həyatımın bir hissəsidir. Mən həyatımdan imtina edə bilmərəm!

• Əsl cah-cəlal düşündüyünü deyə bilməkdir.

NİZAMLI YAŞAMAQ

Ölçü-biçili yaşasan, səni sağlam və dinc həyat gözləyir. Amma elə yaşamaq asan deyil. Mütəxəssislərin fikrincə, ölçü-biçili həyatın sirri, «özümüzə düzgün suallar verməkdə və həmin sualları dürüst cavablandırmaqdadır». Bu, əlbəttə, çətindir, amma mümkünsüz deyil. Gərək sınamaqdan vaz keçməyəsən!

Düşüncə tərzinizi dəyişin

İngiltərə psixoloqları «Ölçü-biçili yaşamağın önəmi nədir?» və «Gündəlik həyatda ölçü-biçi balansı necə qorunur?» suallarına cavab axtarıblar. Görəcəyimiz işlərin upuzun siyahısı, təbii ki, bizi gərginlikdə saxlayır. Duyğularımızın basqısı da üstəlik. Bunlardan qurtulmaq üçün mütəxəssislər lap əvvəl düşüncə tərzini dəyişməyin vacibliyini vurğulayır, bəzi məsləhətlər verirlər. Öncə 2 məsləhətə diqqət yetirək:

– Hər işi dərhal bitirməyə can atmaqdansa, diqqətinizi önəmli saydıqlarınızın üzərində cəmləməyə çalışın;

– Görəcəyiniz işə yetəcək qədər vaxtınızın olduğuna əmin deyilsinizsə, məhz önəmli işləri düşünməyiniz, sizdə, yavaş-yavaş, «hər işi görməyə bol zamanım var» duyğusu yaradacaq.

Təbiət qoynunda olmağı unutmayın

Yorucu iş tempi və alıb-verəcəklərinizin basqısı altında olmaq indi ən böyük problemdir. Bu problemləri həll etmək üçün fikrinizi ancaq onlara yönəltməyin. Asanlıqla görəcəyiniz bir neçə şey həmin problemlərin də öhdəsindən gəlməyə kömək edəcək:

–Bir az təbiət qoynunda gəzişin. Sizə elə gəlməsin ki, həllinə çalışdığınız problemə bunun heç bir dəxli yoxdur. İnanın ki, bu zaman sizi rahat buraxmayan problemin çözülməsi üçün ağlınıza cürbəcür maraqlı variantlar gələcək;

– Eyni anda bir neçə məsələni düşünməyin. Yəni, fikrinizi bir şeyin üzərində cəmləyin. Daim məşğul görünsək də, diqqətimizi nadir hallarda bir şeyə yönəldirik;

– Görəcəyiniz işi mərhələlərə bölün-düzün və diqqətinizi hər dəfə birinci növbəli saydığınız məsələyə cəmləyin;

– Həyatınızı proqramlaşdırın və proqramınıza sadiq qalmağa çalışın. Elektron poçtunuzu yoxlamağa konkret vaxt ayırmağınız belə, sizə bir qədər zaman qazandıracaq. Ailənizlə keçirdiyiniz zamanı yalnız onlara həsr edin. Həmin müddətdə telefondan, TV-dən, başqa kommunikasiya vasitələrindən uzaq durun. Bu, hər hansı bir işi görərkən, sizi sanki «başqa işi görmək daha yaxşı olardı» hissindən qurtaracaq və fikrinizi əslində görməli olduğunuz işə yönəldəcək.

İşiniz çətinə düşəndə özünüzdən bunları soruşun

Sizə çox böyük bir problem kimi görünən məsələlərlə üzləşəndə, beyniniz qarma-qarışıq olanda və aciz qalıb nə edəcəyinizi bilməyəndə özünüzə bu sualları verin:

– «Yox» desəm, qorxduğum nə baş verər? Məndən üz çevirəcək, üstümə bağıracaqlar?

– Hansı sual, hansı duyğu və ya hansı düşüncə məsələyə baxışımı dəyişər? Doğrudan da önəmli olan nədir?

– Basqıdan qurtarmaq üçün, indi, heç olmasa yarım saat, diqqətimi nədə cəmləşdirə bilərəm?

– Görmək istəmədiyim, amma görmək məcburiyyətində qaldığım şeylərə «yox» deyə bilərəmmi?

– Bu işlə məşğul olmaq həyatımda hansı iz qoyur? Həyatıma məna qazandırır, təlaşlardan uzaqlaşdırır? Yoxsa «bu işi bacardım» qənaətinə gətirir?

Önümüzdəki 5 gün ərzində hal-hazırda məni üzən 5 xırda məsələnin nə olduğunu dəqiqləşdirə bilərəm? Bu 5 gündə hansı 5 xırda məsələni çözsəm, həyatımı daha dəyərli edəcək şeylərə zaman qazanaram?

Həmin suallara verdiyiniz hər bir dürüst cavab sizi özünüzə daha çox yaxınlaşdıracaq.

ABŞ-IN 16-CI PREZİDENTİ AVRAAM LİNKOLNUN OĞLUNUN MÜƏLLİMİNƏ YAZDIĞI MƏKTUB

Oğlum bu gündən məktəbdə oxumağa başlayır. Bir müddət bunların hamısı onun üçün qəribə və yeni olacaqdır. Ona mülayim yanaşmağınızı istərdim. Bu, onu qitələrə səyahətə çıxara biləcək bir macəra olacaq. Bəlkə bu macəraların tərkibində müharibə, faciə və dərd də olacaq. Bu həyatı yaşamaq inam, sevgi və cəsarət tələb edəcək.

Belə ki, əziz Müəllim, xahiş edirəm onun əlindən tutun və bilməli olduqlarını ona öyrədin, bacarsanız, mehribanlıqla. Ona öyrədin ki, hər düşmənin əvəzində bir dost var. O, bilməli olacaq ki, hamı dürüst və ədalətli deyil. Amma ona bunu da öyrədin ki, hər alçağa qarşı bir qəhrəman, hər əyri siyasətçiyə qarşı bir düz lider var.

Bacarsanız ona qazanılmış on sentin tapılmış bir dollardan qat-qat daha dəyərli olduğunu öyrədin. Müəllim, məktəbdə uğursuzluğa düçar olmaq kələk gəlməkdən daha şərəflidir. Ona nəzakətlə itirməyi də öyrədin, qazandığı qələbədən həzz almağı da.

Ona insanlarla mehriban olmağı da, sərt adamlarla sərt olmağı da öyrədin. Bacarsanız onu paxıllıqdan uzaq saxlayın və ona sakit gülüşün sirrini öyrədin.

Bacarsanız ona dərdli olanda gülməyi, göz yaşının isə utandırıcı olmadığını öyrədin. Uğursuzluqda şərəf, uğurda isə ümidsizliyin ola biləcəyini öyrədin. Həyasızlara istehza etməyi öyrədin.

Bacarsanız ona kitabların möcüzəsini öyrədin, amma göydəki quşların, gün işığında uçan arıların və yaşıl təpədəki güllərin fövqəladə sirrini düşünməsi üçün də vaxt verin. Ona, hamı “səhvdir” desə də, öz ideyalarına inanmağı öyrədin.

Oğluma kütlənin ardınca düşüb getməməyə yetəcək güc verməyə çalışın. Ona hər bir adama qulaq asmağı, amma, eyni zamanda, eşitdiklərini həqiqət ələyindən ələməyi və yalnız ondan keçənləri qəbul etməyi öyrədin.

Ona özünün bacarıqlarını və zəkasını ən yüksək qiymət təklif edənə satmağı, lakin ürəyinə və ruhuna heç vaxt qiymət yarlığı yapışdırmamağı öyrədin. Qoy dözməz olmağa yetəcək qədər cəsur, qəhrəman olmağa yetəcək qədər səbirli olsun. Ona özünə yüksək inama malik olmağı öyrədin, onda o, həmişə bəşəriyyətə və Tanrıya yüksək inam bəsləyəcək.

Müəllim, bu bir sifarişdir, daha yaxşı nə edə biləcəyinizə isə özünüz baxın. O, yaxşı oğlandır, həm də mənim oğlumdur.

APPLE ŞİRKƏTİNİN QURUCUSU STİV COBSUN STANFORD UNİVERSİTETİNDƏ ÇIXIŞI

Bu gün burada, dünyanın ən yaxşı universitetlərindən birini bitirməniz münasibəti ilə təşkil olunmuş tədbirdə iştirakımdan şərəf duyuram. Düzünü desəm, universitet məzunu olmamışam və ilk dəfədir ki, belə bir tədbirdə iştirak edirəm. Bu gün sizə həyatımdan üç hekayə danışmaq istəyirəm. Elə bu qədər, cəmi üç hekayə.

Birinci hekayə – nöqtələrin birləşməsi haqqında

Mən ilk altı aydan sonra Rid Universitetindəki (Reed College) təhsilimi atdım. Lakin tam üzülüşənə qədər, yəni on səkkiz ay ərzində mühazirələrə getməyi və tələbə şəhərciyində yaşamağı davam etdirdim. Mən təhsili niyə atdım?

Bu əhvalat mən doğulmamışdan əvvəl başlamışdı. Mənim bioloji anam – cavan, nikahsız, aspirant qadın məni övladlığa vermək qərarına gəlmişdi. O istəyirdi ki, məni ali təhsili olan insanlar övladlığa götürsünlər. Özü də məni bir hüquqşünas ailəsinin övladlığa götürməsi üçün hər şey hazır idi. Lakin gözlənilməyən bir şey baş verir. Mən doğulandan sonra onlar son anda qərara gəlirlər ki, qız övladı arzulayırlar. Adları siyahıda növbəti olan gələcək valideynlərimə gecə vaxtı zəng edib “Plandan kənar körpəmiz var. Oğlandır. Götürmək istəyirsiniz?” soruşurlar. Onlar da deyirlər ki, əlbəttə.

Bioloji anam sonradan öyrənir ki, gerçək anam heç bir universitet qurtarmayıb, atamın isə heç tam orta təhsili də yoxdur. O, tələb edilən olan son sənədləri imzalamaqdan imtina edir. Valideynlərim onu yalnız bir neçə aydan sonra dilə tuta bilirlər; söz verirlər ki, məni mütləq universitetə göndərəcəklər. Həyatım belə başlayır.

On yeddi il sonra universitetə getməyə başladım, amma seçdiyim universitet ən azı Stanford Universiteti qədər bahalı idi və mənim varlı olmayan valideynlərimin illərlə qazandığı pullar təhsilimə xərclənirdi. Altı ay sonra anladım ki, oxumağım mənasızdır: həyatda nə ilə məşğul olacağım və universitet təhsilimin bunu anlamağa nə kömək edəcəyi haqqında heç bir təsəvvürüm yox idi. Həm də valideynlərimin həyatları boyunca topladıqları pulların hamısı təhsilə xərclənirdi. Ona görə də təhsilimi dayandırmaq və hər şeyin hansısa bir şəkildə yoluna düşəcəyinə ümid etmək qərarına gəldim.

O zaman bu qərarımdan qorxsam da, dönüb geriyə baxanda görürəm ki, bu, həyatımda verdiyim ən düzgün qərar idi. Universitetdən çıxan andan məni maraqlandırmayan dərsləri dayandırdım və məni maraqlandıran dərslərə başladım.

Əlbəttə, bu o qədər də asan deyildi. Yataqxanada otağım yox idi. Dostlarımın otağında döşəmədə yatırdım. Mən “kola” şüşələrini beş sentə təhvil verirdim ki, özümə yemək alım və həftədə bir dəfə yaxşı yemək yeyə bilmək üçün Hare Krişna məbədinə piyada təxminən 11 kilometr yol gedirdim.

Maraq və intuisiyama güvənərək seçdiyim yolda çəkdiyim əziyyət və qarşılaşdığım çətinliklərin dəyərini sonralar anladım. İzninizlə bir nümunə gətirim: Rid Universiteti o zamanlar kalliqrafiya sahəsində ən yaxşı təhsil müəssisəsi idi. Tələbə şəhərciyindəki bütün divar şəkilləri, afişalar, posterlər əllə, bütün kalliqrafiya qaydalarına əməl edilməklə yazılmışdı. Mən universiteti tərk etdiyim üçün məcburi dərsləri oxumaya bilərdim. Ona görə də kalliqrafiyanı öyrənmək qərarına gəldim. Şrift dəstləri (serif, sans-serif), müxtəlif hərf birləşmələri arasındakı məsafələrin dəyişdirilməsi, ümumiyyətlə mətbəə qrafikasını gözəlləşdirən hər şey haqqında çox şey öyrəndim. Bu məşğələlərdə elm üçün əlçatmaz olan bir gözəllik, tarix, incəlik var idi… və o məni məftun edirdi.

Bütün bunların həyatımda hər hansı bir təcrübi, tətbiqi əhəmiyyəti olacağına ümid belə yox idi. Ancaq on il sonra, biz Makintoş kompüterini dizayn edəndə, bütün bunlar mənə lazım oldu. Biz bütün bunları “Mac” kompüterində birləşdirdik. Bu gözəl şriftli ilk kompüter idi. Əgər universitetdə məni maraqlandıran yeganə kursu öyrənməsəydim, bugün “Mac” kompüterlərində müxtəlif şrift dəstlərindən istifadə etmək imkanı və şriftlərin mütənasib ara məsafələri olmayacaqdı. Windows da “Mac”ın surəti olduğundan indi dünyadakı heç bir kompüterdə bu keyfiyyətlər olmayacaqdı. Əgər universiteti atıb yalnız kalliqrafiya kursuna getməsəydim, güman ki, müasir kompüterlərin gözəl şriftləri olmayacaqdı.

Əlbəttə, mən universitetdə oxuyanda gələcəkdə nöqtələrin bu cür birləşəcəyini ehtimal etmək mümkün deyildi, amma on il sonra məlum oldu ki, onlar birləşməyə bilməzlərmiş.

Bir daha deyirəm: irəliyə baxaraq nöqtələri birləşdirmək mümkün deyil. Siz yalnız dönüb geriyə baxanda, onları əlaqələndirə bilərsiniz. Sadəcə, inanmalısınız ki, nöqtələr gələcəkdə hansısa bir yolla birləşəcəklər. Siz nəyəsə – Tanrıya, taleyə, həyata, karmaya, nəsə bir şeyə inanmalısınız. Bu yanaşma məni heç vaxt uğursuzluğa düçar etməyib və həyatımdakı bütün dəyişikliklərin səbəbi olub.

İkinci hekayəm sevgi və itki haqqındadır

Bəxtim onda gətirdi ki, həyatda nəyi etməkdən zövq aldığımı tez müəyyənləşdirdim. Voz (Stiv Voznyak) və mən “Apple”ı valideynlərimin qarajında, iyirmi yaşım olanda başladıq.

Biz çox çalışdıq və 10 ilə “Apple” qarajda çalışan iki nəfərdən 2 milyard dollarlıq büdcəsi və 4 mindən artıq işçisi olan şirkətə çevrildi. Yaratdığımız ən mükəmməl şeyin – “Macintosh”un təqdimatından heç bir il keçməmişdi. Onda mənim 30 yaşım var idi. Və sonra mən işdən çıxarıldım. İnsan özü yaratdığı bir şirkətdən necə qovula bilər? Bəli, “Apple” böyüdükcə bacarığına inandığım bir nəfəri işə götürdük ki, şirkəti mənimlə birlikdə idarə etsin. İlk vaxtlar hər şey yolunda idi. Ancaq sonralar məlum oldu ki, gələcəyə baxışlarımız fərqlidir və biz ayrılmalıyıq.

Bu baş verəndə idarə heyəti onun tərəfini tutdu və mən 30 yaşımda işdən kənarlaşdırıldım. Özü də çox hay-küylü şəkildə. Mənim həyatımın mərkəzi, məqsədi dağıldı və bu çox kədərli idi.

Mən həqiqətən də ilk aylar nə edəcəyimi bilmirdim. Hesab edirdim ki, özümdən öncəki mütəxəssislərin mənə ötürdüyü estafet çubuğunu yerə salmışam. Mən David Pakard və Bob Noysla görüşdüm və etdiyim səhvlərə görə üzr istədim.

Mən ictimaiyyətin gözündə məğlub bir adam idim və hətta buralardan qaçıb getməyi də düşünürdüm. Ancaq nə isə bir şey məni saxlayırdı, mən hələ də əvvəlki işimi sevirdim. “Apple”də baş vermişlər heç nəyi dəyişməmişdi. Mən qovulmuşdum, amma əvvəlki işimi hələ də sevirdim. Mən yenidən başlamağa qərar verdim.

O vaxtlar belə yanaşmasam da, indi görürəm ki, “Apple”dan qovulmağım nə vaxtsa başıma gəlmiş ən yaxşı şeydir. Uğurlu olmağın ağırlığı hər şeyə daha az inanan yeni başlayanın yüngüllüyü ilə əvəz olundu. Bu, həyatımın ən yaradıcı dövrünə başlamaq imkanı yaratdı.

Növbəti beş ildə mən “NeXT” və “Pixar” adlı şirkətlər qurdum və gələcəkdə həyat yoldaşım olacaq gözəl bir xanıma vuruldum. “Pixar” dünyanın ilk kompüter animasiya filmini – “Oyuncaq hekayəsi”ni (Toy Story) hazırladı və bu gün dünyanın ən uğurlu animasiya studiyasıdır.

Vəziyyət elə dəyişdi ki, “Apple” “NeXT”i satın aldı və mən yenidən “Apple”a döndüm. Bizim “NeXT”də inkişaf etdirdiyimiz texnologiya bu gün “Apple”dakı intibahın özəyini təşkil edir. Lorin və mən də birlikdə gözəl həyat sürürük.

Əminəm ki, əgər «Apple»dan atılmasaydım, bunların heç biri baş verməzdi. Bu xoşagəlməz dad verən bir dərman idi, lakin xəstənin buna ehtiyacı var idi. Bəzən həyat bizə daş atır, o da düz başımıza dəyir. Ancaq inamınızı heç vaxt itirməyin.

Mən inanıram ki, məni həmişə yoluma davam etməyə vadar edən şey gördüyüm işi sevməyim və buna inanmağım olub. Siz nəyi sevdiyinizi, nəyi etməkdən məmnun olduğunuzu tapmalısınız. Sizin gördüyünüz işə olan sevginiz sevdiyiniz insana olan məhəbbətiniz qədər həqiqi olmalıdır.

Sizin işiniz həyatınızın böyük bir qismini təşkil edir və bundan məmnun qalmağın yeganə yolu onun doğruluğuna inanmağınızdır. Doğru olanı edib yaxşı bir şey yaratmağın da yeganə yolu işinizi sevməkdir.

Əgər bunu hələ də tapmamısınızsa, axtarışa davam edin. Sevmədiyiniz işə özünüzü məhkum etməyin. Siz nə etmək istədiyinizi tapanda, bunu qəlbinizlə hiss edəcəksiniz. Bütün böyük münasibətlər kimi bu da illər ötdükcə daha yaxşı olacaq. Belə ki, istədiyinizi tapana qədər axtarışa davam edin, təslim olmayın.

Üçüncü hekayəm ölüm haqqındadır

17 yaşımda belə bir aforizm oxumuşdum: “Əgər siz hər günü son gün imiş kimi yaşayırsınızsa, bir gün həqiqətən də haqlı olacaqsınız.” Bu mənə çox təsir etmişdi və o gündən sonra düz 33 il hər səhər yuxudan duranda güzgüyə baxıb özümə bu sualı verirdim: “Əgər bu gün həyatımın son günü olsaydı, planlaşdırdığım işləri görmək istərdimmi?”

Cavab hər dəfə “Xeyr” olanda, mən hələ çox yaşayacağıma inanırdım və buna görə də düşünürdüm ki, həyatımda dəyişiklik etməliyəm. Tezliklə öləcəyimi xatırlamaq həyatımın ən vacib qərarlarını verməkdə həmişə mənə kömək olub. Çünki hər şey, bütün gözləntilər, qürur, məğlubiyyət qorxusu – bunlar hamısı ölümün kölgəsində yox olub gedir və yerdə yalnız həqiqətən vacib olan şeylər qalır. Öləcəyini xatırlamaq həyatda itirəcəyin bir şey olmadığını anlamağa kömək edir. Sən artıq çılpaqsan. Qəlbinin səsini dinləməmək üçün heç bir səbəb yoxdur.

Təxminən bir il öncə mənə xərçəng diaqnozu qoyuldu. Səhər səkkizin yarısında skan edildim və mədəaltı vəzimdə şiş olduğu müəyyən edildi. Mən heç bilmirdim mədəaltı vəz nədir.

Həkim bunun sağalmayan xərçəng şişlərinin bir növü olduğunu dedi və altı aydan artıq yaşamayacağımı söylədi. Dedi ki, evə gedib işlərimi yoluna qoyum. Bu, həkim dilində “ölməyə hazırlaş” demək idi.

Deməli, növbəti 10 ildə uşaqlarıma deyəcəyimi düşündüyüm şeyləri indi, bir-iki ay ərzində deməliydim. Yəni hər şeyin yaxşı olmağından əmin olmalıydım ki, ailəm üçün də asan olsun. Yəni əlvida söyləməliydim.

Bütün günü bu diaqnoz ilə yaşadım. Axşam boğazımdan aşağı endoskop saldılar və mədəmdən keçib mədəaltı vəzimdəki şişdən iynə vasitəsilə hüceyrə nümunələri götürdülər.

Məni yatırtmışdılar, amma yoldaşım yanımda oturmuşdu və ayılanda mənə dedi ki, həkimlər mikroskopla o hüceyrələrə baxanda ağlamağa başlayıblar, çünki bu, mədəaltı vəzi xərçəngi şişinin çox xüsusi, nadir bir növü idi və ancaq cərrahiyə əməliyyatı ilə müalicə edilə bilərdi. Əməliyyat olundum və çox şükür ki, indi yaxşıyam.

Bu ölümə ən yaxın olduğum an idi. Ümid edirəm, növbəti onilliklərdə ölümə bundan daha yaxın olmayacağam. Bu hadisəni yaşadığım üçün sizə indi daha əminliklə deyə bilərəm ki, ölüm nəinki bir az faydalı, eyni zamanda sırf intellektual bir anlayış idi.

Heç kəs ölmək istəmir, hətta cənnətə getmək istəyən kəslər belə ölüb buna qovuşmaq istəmir. Lakin ölüm hər birimizin bölüşdüyü taledir. Bu taledən heç kəs, heç vaxt yayına bilməyib. Və yəqin ki, belə də olmalıdır, çünki ölüm, böyük ehtimal ki, həyatın yeganə ən yaxşı kəşfidir.

Bu həyatın dəyişmə nöqtəsidir, köhnəni silir ki, yenisi üçün yer açsın. Hazırda yenilər sizlərsiniz. Lakin çox keçməyəcək ki, siz də yaşlanacaq və silinəcəksiniz.

Dramatikləşdirdiyim üçün üzr istəyirəm, ancaq bu, həqiqətdir. Sizin zamanınız məhduddur, bunu başqa birilərinin həyatını yaşayaraq puç etməyin. Başqalarının fikirlərinin nəticəsi ilə yaranmış doqmaların tələsinə düşməyin.

Başqalarının fikirlərinin, səsinin sizin içinizdəki səsi, intuisiyanızı batırmasına imkan verməyin. İntuisiyanız və hisləriniz artıq sizin həqiqətən kim olmaq istədiyinizi bilir. Qalan hər şey ikinci dərəcəlidir.

Mən cavan olanda “The Whole Earth Catalogue” (“Bütöv Dünya Kataloqu”) adlı möhtəşəm bir jurnal vardı. Bu, bizim nəslin incillərindən biri idi. Onu Stüart Brend adlı bir şəxs burdan az aralıda, Menlo Parkda hazırlayır və özünün poetik ilhamı ilə canlandırırdı. Bu, 60-cı illərdə fərdi kompüter və masaüstü nəşr olmayanda idi, hər şey çap maşını, qayçı və köhnə Polaroid fotoaparatları ilə hazırlanırdı. Bu, bir növ kağız üzərində Google idi, əsl “Google”dan 35 il öncə. Bu, səliqəli “alətlər” və böyük ideyalarla ağzına qədər dolu bir nəşr idi.

Stüart və komandası “The Whole Earth catalogue”un bir neçə nüsxəsini nəşr etdilər. Layihə axıra yaxınlaşanda isə son sayını buraxdılar. Bu, 70-ci illərin ortaları mənim sizin yaşda olduğum zamanlar idi. Jurnalın son nəşrinin arxa səhifəsində səhər tezdən çəkilmiş kənd yolunun şəkli vardı; bir qədər zirək olsanız bu yolu avtostopla gedə bilərdiniz.

Şəklin altında bu sözlər vardı: “Ac qalmağa davam et. Səfeh qalmağa davam et”. Bu, onların əlvida sözləri idi. Ac qalmağa davam et. Səfeh qalmağa davam et. Bunları hər zaman özümə arzulamışam və indi, sizin buradan məzun olub yeni bir həyata başladığınız bir vaxt eyni şeyləri sizə arzulayıram.

Ac qalmağa davam et. Səfeh qalmağa davam et.

Hamınız çox sağ olun.

VİLNÜS BİOSOSİAL TERAPİYA MƏRKƏZİNİN DİREKTORU E.BUSUN OĞLU ALEKSANDRA NƏSİHƏTLƏRİ

İnsan və həyat

1. Ürəyini hər yetənə açma. Ehtiyat igidin yaraşığıdır.

2. Ağıllı adamlarla dostluq et. Çünki bu dostluq qarşılıqlı surətdə faydalıdır.

3. Mədəniyyətsiz adamdan kobudluq və əxlaqsızlıq görərsən.

4. Ağlını köməkçilərinin müdrikliyi ilə birləşdir və bunu xeyirxah məqsədlərə yönəlt.

5. Çox şey arzulama; həyat sənin xəyalların qədər yüyrək deyil.

6. Əgər bu gün səni layiqincə qiymətləndirmirlərsə, fikir eləmə. Gələcək müdrikliyindir, onun üstünlüyü də bundadır.

7. Əgər gördüyün iş hamının xoşuna gəlirsə, sevinmə. Kütləvi tərif məntiqdən uzaqdır. Kütləni heyran edən möcüzələr səni heyrətləndirməsin; müdriklik hər kəsə qismət olmur.

8. Yolun aydın deyilsə, müdrik və ehtiyatlı adamların ətəyindən yapış. Onlar səni haqqın yoluna çıxararlar.

9. Vaxtını hədər şeylərə sərf etmə. Bəlkə də, vaxt sənin ən qiymətli sərvətindir. Sənin xoşbəxt gələcəyinə zəmanəti o verə bilər.

10. Asanlıqla əldə edilən müvəffəqiyyət ağır məğlubiyyətdir. Rahat yollar axtarma: onlar səni iztirablara və peşmançılığa aparıb çıxarar.

11. Həddən ziyadə hayıl-mayıl olma. Müəyyən bir şəxsə, işə verilən yüksək qiymət, adətən, təsdiq edilmir və boşa çıxmış ümidlər nifrətlə cəzalandırılır.

12. Böyük adamın məqsədləri də böyük olur. Lakin onu bu məqsədlərə aparan yol uzun, adamlar isə o qədər səbirsizdirlər ki, çoxları heç yolun yarısını da qət edə bilmir. O işin ki, öhdəsindən gəlmək mümkün deyil, onu boynuna çəkmə. Belə etməsən, götürdüyün öhdəliklər səni elə buxovlayar ki, bu çətin yolda heç addım da ata bilməzsən.

13. Sevinəndə də, kədərlənəndə də mötədil ol. Ağıl-kamal ürəyin böyüklüyündən, ürəyin böyüklüyü isə ruhun ucalığından xəbər verir.

14. Tələsmək, səbirsiz olmaq axmaqların xüsusiyyətidir. Astagəllik də ağıl-kamal nişanəsi deyil. Qədim kişilərin dedikləri kimi, işi görəndə cəld ol, amma tələsmə. Belə etsən tale həmişə üzünə gülər.

15. Fiziki cəhətdən güclüsənsə, çox yaxşı. Amma çox zaman ruhən güclü olanlar uğur qazanırlar.

16. Kiminin əvvəli, kiminin axırı demişlər. Kütlənin alqışları altında hər adam dayanar. Peşman olmuş, ümidləri boşa çıxmış kütlənin arasından sağ-salamat çıxmaq isə hər kəsə müyəssər olmur. Yolun əvvəlində sonunu düşün.

17. Alçaq köməkçilərin xidmətindən istifadə etmə. Onların əməllərinin ağırlığı da sənin çiyninə düşəcəkdir.

18. Bəd xəbərləri xatırlama. Onlar sənin beynin və qəlbin üçün zəhərdir.

19. İfrata varma. Əhvalın necəliyi işə mane olmamalıdır.

20. Həyat elədir ki, çox zaman xahişlərə əməl etmək olmur. Lakin qəti rədd cavabı verməkdən çəkinmək lazımdır. Bu, səthi intellekt əlamətidir. Xahişi qəti şəkildə yerə salmaqla insanın qəlbini yaralayarsan.

21. Mürəkkəb vəziyyətdən zarafatla çıxmaq ağıllı və dahi adamlara xas olan əlamətdir.

22. Hər bir şəxsin yaxşı və pis cəhətləri var. Adamla münasibətlərdə səbirli ol, hər kəslə dil tapmağı bacar. Yalnız bu yolla adamların ləyaqətini qiymətləndirə bilərsən.

23. Biz az görür, çox eşidirik. Gördüklərimiz həqiqətdir, başqalarından eşitdiklərimiz isə, adətən, yalan. Bunları ayırd edə bilmək böyük istedaddır. Nəyi və kimi isə (sənin özünü də) tərifləyirlərsə ehtiyatlı ol, tənqid edirlərsə ikiqat ehtiyatlı ol.

24. Nifrətdə və məhəbbətdə həddini aşma. Portağalı çox sıxsan axırda acısı çıxacaq. Özünü xırda işlərə sərf etmə, çox tez əldən düşərsən. Əgər yanması üçün üstünə bir şey atmasan ən böyük tonqal da sönəcəkdir.

25. Qoy, sənin kiçik qüsurların olsun. Bu qüsurlar sənə paxıllıq edənlər üçün təsəllidir. Xırda nöqsanlar onların zəhərini öz canına çəkər və sən özünü böyük işlər üçün qoruyub saxlayarsan.

26. Əgər güclüsənsə, düşmənlərin səylərindən də istifadə edib irəli get. Sənin nöqsanlarını və zəif cəhətlərini düşmənlər aşkar edəndə onları özün də görəcəksən. Yaltaqların tərifindən qaç: belə təriflər səfehlərin ruhunu oxşayır.

27. Hamıya xoş gəlməyə çalışma, vaxtından tez solarsan.

28. Beynini əhəmiyyətsiz şeylərlə zibilləmə, hər xırda bir şeydən ötrü, xüsusilə də sənə yaxın olanlara, irad tutma. Xırdalığa varmamaq ürəyin genişliyindən xəbər verir.

29. Həyatda doğru yol tutmusansa, ömrün də uzun olacaqdır.

30. Əgər işin uğurla nəticələnəcəyinə şübhən varsa, bir daha götür-qoy et. Əsl kişiyə, işə başlayandan sonra, tərəddüd yaraşmır.

31. Öz imkanlarının həddini heç kim bilmir. Ətrafındakılara belə düşünməyə imkan vermə ki, guya onlar sənə tamam-kamal bələd olmuşlar. Onda sən onların qəlbinə ümidsizlik toxumu səpər, dostların inamını itirər, yuxarılardan kömək görməzsən.

32. Xırdaçılıq etmə. İş görəndə də böyük iş gör. Təsəvvür et ki, qumar oynayırsan – masaya böyük pullar qoymalısan.

33. Təmkinli ol. Nəyə qadir olduğunu bilsələr, dostların və düşmənlərin sənə mane olacaqlar. Düşmənlərin sənin öhdəndən gəlmək üçün tədbir görəcəklər, dostların isə yaltaqlıq edib səni çaşdıracaqlar.

34. O yerdə böyük uğurlar qazana bilərsən ki, orada başqalarından daha az asılı olasan.

35. Hər bir iş bir çox amillərdən asılıdır. Bəzən zaman və məkan müəyyən bir iş üçün əlverişli olmur. Ona görə də işi görə bilməyəcəksənsə, söz vermə.

36. Yaxşı və yaman günü unutma. Yaydan sonra qış gəlir. Qışa qabaqdan hazırlaşmaq lazımdır. Onda peşman olmazsan.

37. Dünya dostlardan və düşmənlərdən ibarətdir. Çalış dost qazan. Onların hansının sənə daha yaxın, sədaqətli olduğunu zaman göstərəcək.

38. Mübarizə heç vaxt namuslu olmur. Qalib özünü göylərə qaldırıb məğlubu alçaldır. Məğlub qalibdə nöqsan axtarmağa başlayır və şübhən olmasın: o, qalibin qüsurlarını eşələyib çıxaracaqdır. Düşmənlərinə xeyirxah münasibət bəsləsən, peşman olmazsan.

39. O şəxs müdrikdir ki, özünü tərifləyib şişirtmir. Danışanda düşünüb danış, məclisdəkilər haqda danışma.

40. Dostlarına və düşmənlərinə hörmətlə yanaş. Onların ikisi də bunu qiymətləndirəcək və çox güman ki, dostlarının sayı artacaqdır.

41. Zövq və dəb məsələsində zamanla ayaqlaş. Mədəniyyətdə və əxlaqda köhnə fikirli olmaqdan çəkinmə. İllər ötdükcə dünya daha ziddiyyətli olur. Alçaqlıq isə heç bir əndazəyə sığmır. Sanki dünyanı irəliyə aparan yalnız bunlardır.

42. Başqalarının günahlarını axtarma – öz ruhunu məhv edərsən.

43. Hamının günahı var, hamı səhv edir. Öz səhvlərini heç kəsə, hətta öz dostuna da etibar etmə. Bu günün dostları sabah sənə düşmən ola bilərlər.

44. Bulaq birdirsə iki olsun. Yardımçın birsə iki olsun. Həyat, şöhrət və səadət elə dəyişkən, yol isə elə mürəkkəbdir ki, yalnız bir bulağın suyu, bir haminin köməyilə keçinmək çətindir.

45. Yalnız səfehlər dostluğu düşmənçiliyə çevirməklə, insan zəkasını heyvani hisslərin əsiri etməklə daim ziddiyyət axtarır.

46. Baş yola çıxmaqdan ötrü daim həyatın cığırlarında dolaşmaq vacib deyil. Özünü və səfər yoldaşlarını yora bilərsən. Dostlarını itirər, düşmənlər qazanarsan.

47. Ətraf mühitdə qayda-qanun yaratmağa tələsmə. Bu işi təbiət və zamana həvalə et. Onlar bizdən müdrikdirlər. Bulanıq sular sənsiz də durulacaqdır.

48. Özünün nə zəif, nə də güclü cəhətlərini büruzə ver. Düşmənlərin və paxıllığını çəkənlər daha ağrılı zərbələr endirmək üçün zəif yerlərini axtarıb tapanacan sən zirvəyə onlardan tez qalxarsan.

49. Mahiyyəti müəyyən etməyə tələsmə, çünki adətən irəlidə həqiqət donuna bürünmüş yalan gedir. Həqiqətin özü isə arxada sürünür.

50. Qoy, sənin işin zahirən qeyri-adi görünsün. Adamları maraqlandırar və … qiyməti artırarsan.

51. Sabahkı problemlərini bu gün görməyi və həll etməyi bacarmalısan. İşıqlı gələcək naminə çətinliklərə dözməlisən. Şirin üstündə yatmaq, onun altında oyanmaqdan yaxşıdır.

52. Qəzəbli anlarında böyük məsələləri həll etməyə çalışma. Özünü vaxtında saxlamağı bacar. Fırtına vaxtı gəmiyə yalnız axmaq minər.

53. Sənin barəndə ətrafındakılara görə fikir yürüdəcəklər. Dost seçməyi bacar. Həyatda çox şeyə nail olmaqdan ötrü görkəmli şəxslərlə yaxınlıq et.

54. Söhbət zamanı uzunçuluq etmə. Müdafiə olunmaq üçün enerji saxlarsan.

55. Sənə kədər üz versə dəyanətli, fərəhli anlarında isə mötədil ol. Yalnız bu yolla qabağa gedərsən.

56. Kiçik bir səhv sənin bütün yaxşı işlərini kölgədə qoyar. Əldə etdiyin minlərlə uğur səni məst etməsin, o kiçik səhvi düzəltmək haqda düşün.