Kitobni o'qish: «Молитвы о мире и покое»

© Оформление. ООО «Издательство «Эксмо», 2023

Вступление

Нам очень нужен мир. Нам нужны мир, покой и любовь. А мы дрожим от страха. Мы боимся не дожить до завтрашнего дня – но приходим в ужас при одной мысли о том, что он нам принесет. Мы кипим от злобы. Мы гневаемся на ближних. Мы ненавидим и всех, и себя. С утра до вечера мы боремся за мир, но мира все меньше, а борьбы все больше, и мы все ближе к тому, чтобы сойти с ума.

И приходит миг, когда мы понимаем: единственное, что нам остается – это молитва, обращенная к Богу. Молитва о спасении души. Молитва о даровании мира.

О мире в сердце. О мире в стране. О мире во всем мире. Да, на все воля Его. Но нам ведь она неизвестна. А если Он ждет, что мы сами сделаем свой шаг Ему навстречу?

И может быть, тогда пороки, в которых мы погрязли от своего безбожия, отпустят нас, и развеется тьма, и сквозь нее пробьется свет, которым нас озарит солнце нового мира.

И может быть, тогда вокруг нас спасутся тысячи.

Молитвы за Отечество

Молитва ко Господу о России

На Отчи́зну на́шу, Росси́ю, изле́й благода́ть Твою́, Бо́же! Да соединя́тся все́ наро́ды, ее населя́ющие, в одну́ семью, Тебя́, Отца́ Небе́сного, единомы́сленно испове́дающую, всю жизнь свою́ единоду́шно по ве́ре устроя́ющую, да бу́дет еди́но ста́до и еди́ный Па́стырь, да бу́дет хлеб насу́щный и духо́вный для всех без изъя́тия. Да бу́дет мир и любо́вь ме́жду все́ми и да бу́дут бесси́льны ко́зни враго́в вну́тренних и вне́шних, злых се́ятелей пле́вел на ни́ве Твое́й, писа́нием, сло́вом или де́лом внося́щих ша́ткость в умы́, го́речь в сердца́, собла́зн, раздо́р и вся́кую скве́рну в жизнь.

Пошли́, Го́споди, де́лателей до́брых на ру́сскую ни́ву Твою́, да оглася́т они́ ее́ глаго́лами пра́вды Твое́й, да просветя́т ее́ приме́ром жи́зни по ве́ре. Пошли́, Го́споди, наро́ду чу́ткость се́рдца, да разуме́ет он святы́е ре́чи избра́нников Твои́х, да разуме́ет он святу́ю во́лю Твою́ и неизме́нно и с ра́достию твори́т ее́, да бу́дет Русь вои́стину свя́та, да соедини́тся она́ единомы́сленно и единоду́шно в одно́ вели́кое Бра́тство Христо́во, мы́слию, сло́вом и де́лом ве́рное Бо́гу и Христу́ Его́. Да бу́дет Русь на́ша по́длинно церко́вной держа́вой, во всех дела́х свои́х руково́дствующейся уче́нием Правосла́вной Це́ркви.

Го́споди, Влады́ко ми́ра! Посети́ страну́ на́шу благода́тию Свое́ю, да облече́тся она́ свя́тостию, я́ко ри́зою, и да бу́дут сы́ны ее́ во смире́нии свое́м досто́йны оде́жды бра́чной, в не́йже вни́ти надлежи́т в черто́г Ца́рствия Твоего́. Ами́нь.

Молитва ко Господу о спасении России

Го́споди Иису́се Христе́, Бо́же наш, приими́ от нас, недосто́йных рабо́в Твои́х, усе́рдное моле́ние сие́ и, прости́в нам вся согреше́ния на́ша, помяни́ всех враго́в на́ших, ненави́дящих и оби́дящих нас, и не возда́ждь им по дело́м их, но, по вели́цей Твое́й ми́лости, обрати́ их: неве́рных – ко правове́рию и благоче́стию, я́ко да ни еди́н от них поги́бнет нас ра́ди, недосто́йных; ве́рных же – во е́же уклони́тся от зла и твори́ти благо́е.

Нас же всех и Це́рковь Твою́ Святу́ю – всеси́льною Твое́ю кре́постию от вся́каго зла́го обстоя́ния ми́лостивно изба́ви, и страну́ Росси́йскую от лю́тых враго́в и вла́сти их свободи́. Ве́рных рабо́в Твои́х – в ско́рби и печа́ли – день и нощь вопию́щих к Тебе́, многоболе́зненный вопль услы́ши, многоми́лостиве Бо́же наш, и изведи́ из истле́ния живо́т их. Пода́ждь же мир и тишину́, любо́вь, и утвержде́ние, и ско́рое примире́ние лю́дем Твои́м, и́хже – Честно́ю Твое́ю Кро́вию – искупи́л еси́.

Но и отступи́вшим от Тебе́, и Тебе́ не и́щущим – явле́н бу́ди, вое́же ни еди́ному от них поги́бнути, но всем спасти́ся и в ра́зум и́стины приити́: да вси в согла́снем единомы́слии и в непреста́нной любви́ просла́вят пречестно́е и́мя Твое́, терпеливоду́шне, незлоби́ве, Го́споди, во ве́ки веко́в. Ами́нь.

Молитва ко Пресвятой Богородице о России

Засту́пнице земли́ Росси́йстей и непреста́нная за нас моли́твеннице, мир наро́ду у Го́спода испроси́, да святи́тся в нас и́мя Бо́жие во ве́ки. Ами́нь.

Молитвы пред иконой Божией Матери «Державная»

Молитва 1-я

Держа́вная Влады́чице Пресвята́я Богоро́дице, на объя́тиих Свои́х держа́щая содержа́щаго всю вселе́нную Царя́ Небе́снаго! Благодари́м Тя за неизрече́нное милосе́рдие Твое́, я́ко благоволи́ла еси́ яви́ти нам гре́шным и недосто́йным сию́ святу́ю и чудотво́рную ико́ну Твою́ во дни сии́ лука́выя и лю́тыя, я́ко вихрь, я́ко бу́ря ве́тренняя наше́дшая на страну́ на́шу, во дни уничиже́ния на́шего и укоре́ния, во дни разоре́ния и поруга́ния святы́нь на́ших от люде́й безу́мных, и́же не то́чию в се́рдце, но и уста́ми де́рзостно глаго́лют: несть Бог; и в де́лех сие́ безбо́жие показу́ют. Благодари́м Тя́, Засту́пнице, я́ко призре́ла еси́ с высоты́ святы́я Своея́ на ско́рби на́ша и го́ре чад правосла́вных, и я́ко со́лнце све́тлое, увеселя́еши изнемо́гшия от печа́ли очеса́ на́ша пресла́достным зре́нием Держа́внаго о́браза Твоего́.

О, преблагослове́нная Ма́ти Бо́жия, Держа́вная Помо́щнице, кре́пкая Засту́пнице! Благодаря́ще Тя со стра́хом и тре́петом, я́ко раби́ непотре́бнии, припа́даем Ти со умиле́нием, с сокруше́нием серде́чным и со слеза́ми, и мо́лим Тя, и стеня́ще вопие́м Ти: спаси́ нас, спаси́! Помози́ нам, помози́! Потщи́ся: погиба́ем! Се живо́т наш а́ду прибли́жися; се обыше́дше обыдо́ша нас греси́ мно́зи, бе́ды мно́зи, врази́ мно́зи.

О Небе́сная Цари́це! Скипе́тром вла́сти Твоея́ Боже́ственныя разсе́й, я́ко прах, я́ко дым, нечести́выя ко́зни враго́в на́ших ви́димых и неви́димых, сокруши́ велеречи́выя помышле́ния их и запрети́ им, и я́ко Ма́ти всех, на путь пра́вый и богоуго́дный наста́ви их. Вкорени́ в сердца́ всех нас пра́вду, мир и ра́дость о Ду́се Свя́те; водвори́ в стране́ на́шей тишину́, благоде́нствие, безмяте́жие, любо́вь друг к дру́гу нелицеме́рную. Держа́вою Твое́ю всеси́льною удержи́, Пречи́стая, пото́ки беззако́ния, хотя́щие потопи́ти зе́млю Ру́сскую в стра́шней пучи́не свое́й. Поддержи́ нас сла́бых, малоду́шных, не́мощных и уны́лых, укрепи́, возста́ви и спаси́: я́ко под держа́вою Твое́ю всегда́ храни́ми, пое́м и велича́ем Пречестно́е и Великоле́пое и́мя Твое́, ны́не и при́сно и во ве́ки веко́в. Ами́нь.

Молитва 2-я

О, ми́ра Засту́пнице, Ма́ти Всепе́тая! Со стра́хом, ве́рою и любо́вию припа́дающе пред честно́ю ико́ною Твое́ю «Держа́вною», усе́рдно мо́лим Тя: не отврати́ лица́ Твоего́ от прибега́ющих к Тебе́. Умоли́, милосе́рдная Ма́ти све́та, Сы́на Твоего́ и Бо́га на́шего, Сладча́йшаго Го́спода Иису́са Христа́, да сохрани́т в ми́ре страну́ на́шу, да утверди́т держа́ву на́шу в благоде́нствии и изба́вит нас от междоусо́бныя бра́ни; да укрепи́т Святу́ю Це́рковь на́шу Правосла́вную, и непозы́блему соблюде́т ю от неве́рия, раско́ла и е́ресей. Не и́мамы бо ины́я по́мощи, ра́зве Тебе́, Пречи́стая Де́во: Ты еси́ всеси́льная христиа́н Засту́пница пред Бо́гом, пра́ведный гнев Его́ умягча́ющая. Изба́ви всех, с ве́рою Тебе́ моля́щихся, от паде́ний грехо́вных, от наве́та злых челове́к, от гла́да, ско́рбей и боле́зней. Да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние согреше́ний на́ших; да вси, благода́рне воспева́юще вели́чия Твоя́, сподо́бимся Небе́снаго Ца́рствия, и та́мо со все́ми святы́ми просла́вим Пречестно́е и Великоле́пое и́мя в Тро́ице сла́вимаго Бо́га: Отца́, Сы́на и Свята́го Ду́ха. Ами́нь.

Молитва о спасении державы Российской и утолении в ней раздоров и нестроений

Го́споди Бо́же, Спаси́телю наш! К Тебе́ припа́даем сокруше́нным се́рдцем и испове́дуем грехи́ и беззако́ния на́ша, и́миже раздражи́хом Твое́ благоутро́бие и затвори́хом щедро́ты Твоя́. Отступи́хом бо от Тебе́, Влады́ко, и за́поведей Твои́х не соблюдо́хом, ниже́ сотвори́хом, я́коже запове́дал еси́ нам. Сего́ ра́ди разгне́вался еси́ я́ростию Твое́ю на нас, и посети́л еси́ жезло́м желе́зным беззако́ния на́ша и ра́нами непра́вды на́ша. Просте́рл еси́ ру́ку Твою́, и воспла́кася земля́, и боле́зни сме́ртныя объя́ша нас. Гла́дом же и ску́достию и нестрое́нием порази́л еси́ нас, и дал еси́ нас на попра́ние враго́м на́шим, и ума́лихомся па́че всех язы́к, и бы́хом в при́тчу поноше́ния сосе́дом на́шим.

Бо́же вели́кий и ди́вный, ка́яйся о зло́бах челове́ческих, возводя́й низве́рженныя и утвержда́яй низпа́дающия! Небе́сную Твою́ си́лу с Небесе́ низпосли́, уврачу́й я́звы душ и теле́с на́ших и воздви́гни нас от одра́ боле́зни, я́ко напо́лнишася разслабле́ния чре́сла на́ша, я́ко боли́м непра́вдою и ражда́ем беззако́ние. Утоли́ шата́ния и раздо́ры в земли́ на́шей, отжени́ от нас за́висти и рве́ния, уби́йства и пиа́нство, разже́ния и собла́зны, попали́ в сердца́х на́ших вся́кую нечистоту́, вражду́ и зло́бу, да па́ки вси возлю́бим друг дру́га и еди́но пребу́дем в Тебе́, Го́споде и Влады́це на́шем, я́коже повеле́л еси́ и запове́дал еси́ нам.

Поми́луй нас, Го́споди, поми́луй нас, я́ко испо́лнихомся уничиже́ния и не́смы досто́йни возвести́ очеса́ на́ша на не́бо. Помяни́ ми́лости, я́же показа́л еси́ отце́м на́шим, преложи́ гнев Твой на милосе́рдие и даждь нам по́мощь от ско́рби. Мо́лит Тя Твоя́ Це́рковь, представля́ющи Тебе́ хода́тайство друго́в Твои́х: преподо́бнаго отца́ на́шего Се́ргия Ра́донежскаго, Петра́, Алекси́я, Ио́ны и Фили́ппа, святи́телей Моско́вских, священному́ченика Ермоге́на и всех святы́х, в земли́ Росси́йстей просия́вших, изря́днее же Пресвяты́я Богоро́дицы и Присноде́вы Мари́и, от лет дре́вних покрыва́вшия и заступа́вшия страну́ на́шу.

Вразуми́ и укрепи́ всех, и́же во вла́сти суть, и возглаго́ли в них блага́я о Це́ркви Твое́й и о всех лю́дех Твои́х. Си́лою Креста́ Твоего́ укрепи́ христолюби́вое во́инство на́ше и изба́ви их от вся́каго наве́та вра́жия. Воздви́гни нам муже́й си́лы и ра́зума и пода́й всем нам ду́ха прему́дрости и стра́ха Бо́жия, ду́ха кре́пости и благоче́стия. Го́споди, к Тебе́ прибега́ем, научи́ нас твори́ти во́лю Твою́, я́ко Ты еси́ Бог наш, я́ко у Тебе́ исто́чник живота́, во све́те Твое́м у́зрим свет. Проба́ви ми́лость твою́ ве́дущим Тя во ве́ки веко́в. Ами́нь.

Молитва ко Господу об Отечестве исповедника Николая (Могилевского), митрополита Алма-Атинского

Го́споди Бо́же, Спаси́телю наш! К Тебе́ припа́даем с сокруше́нным се́рдцем и испове́дуем грехи́ и беззако́ния на́ша, и́ми же раздражи́хом Твое́ благоутро́бие и затвори́хом щедро́ты Твоя́. Сего́ ра́ди пра́ведный суд Твой пости́же нас, Го́споди: раздо́ры и нестрое́ния объя́ша нас, уби́йства и кровопроли́тия, вражда́ и зло́ба умно́жишася до зела́.

Но, Премилосе́рдый Го́споди, при́зри с высоты́ Святы́я Твоея́ на сле́зныя мольбы́ ни́щих ско́рбных люде́й Твои́х, преложи́ гнев Твой на милосе́рдие и даждь нам по́мощь от ско́рби. Ве́мы, я́ко от лет дре́вних в годи́ны искуше́ний страна́ на́ша то́кмо ве́рою Христо́вою от ги́бели спаса́шеся, то́кмо моли́твою и слеза́ми покая́ния от ко́зней и сете́й вра́жиих избавля́шеся.

Сего́ ра́ди во умиле́нии се́рдца вопие́м Тебе́: охрани́ и ны́не Оте́чество на́ше от враго́в, губя́щих е, воспламени́ в сердца́х на́ших любо́вь к Це́ркви Твое́й Свято́й и научи́ нас кре́пко, да́же до сме́рти стоя́ти за ве́ру святу́ю Твою́ и за сла́ву и́мени Твоего́ Свята́го, и та́ко утверди́ и воспросла́ви Це́рковь Твою́ всеси́льною кре́постию Твое́ю и от вся́каго зла́го обстоя́ния изба́ви ю.

О распе́нших Тя моли́вый, Го́споди, и рабо́м Твои́м о вразе́х моли́тися повеле́вый, ненави́дящих и оби́дящих нас прости́, не возда́ждь им, Го́споди, по дело́м их и по лука́вству начина́ния их, не ве́дят бо, что творя́т, но к братолю́бному и доброде́тельному наста́ви жи́тельству, да обратя́тся к Тебе́, своему́ Влады́це, и ку́пно с сына́ми Це́ркви Твоея́ просла́вят Тебе́ Еди́наго в Тро́ице сла́вимаго Бо́га во ве́ки веко́в. Ами́нь.

Молитва по соглашению о спасении России

Го́споди Бо́же наш, Иису́се Хри́сте, Пречи́стыми Твои́ми уста́ми Ты сказа́л нам: «Е́сли дво́е из вас соглася́тся на земле́ проси́ть о вся́ком де́ле, то чего́ бы ни попроси́ли, бу́дет им от Отца́ Моего́ Небе́сного».

С глубо́кой ве́рой в непрело́жность слов Твои́х и безме́рное милосе́рдие Твое́ про́сим Тебя́ услы́шать всех моля́щихся рабо́в Твои́х, согласи́вшихся смире́нно проси́ть Тебя́ об умноже́нии любви́ и искорене́нии вся́кого зла и не́нависти в Росси́и, о спасе́нии и благополу́чии страны́ на́шей, о ве́ре и му́дрости ру́сских прави́телей и любви́ их к своему́ наро́ду.

Одна́ко не как мы хоти́м, а как Ты, Го́споди; да бу́дет на все во́ля Твоя́ свята́я. Ами́нь.

Молитва преподобному Иоанну Кущнику

К преподобному Иоанну Кущнику обращаются с молитвами те, кто живет вдали от родины и тоскует по ней.

О, свяще́нная главо́, преподо́бне о́тче, преблаже́нне а́вво Иоа́нне! Не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х. Моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Молитва преподобному Савве, игумену Сторожевскому, Звенигородскому

Преподобный Савва Сторожевский – один из наиболее известных русских святых. Считается защитником Москвы и покровителем правителей.

О, пречестна́я и свяще́нная главо́! Небе́снаго Иерусали́ма граждани́не, Пресвяты́я Тро́ицы обита́лище, преподо́бне о́тче Са́вво! Ве́лие име́я дерзнове́ние ко Всеми́лостивому Влады́це, моли́ся о ста́де огра́ды твоея́ и о всех по ду́ху ча́дех твои́х. Не премолчи́ за ны ко Го́споду и не пре́зри ве́рою и любо́вию чту́щих тя. Испроси́ предста́тельством твои́м у Царя́ ца́рствующих мир Це́ркви, под зна́мением креста́ вои́нствующей, архиере́ом святи́тельства благоле́пие, мона́шествующим до́брое в по́двизех тече́ние; святе́й оби́тели сей, гра́ду сему́ и всем гра́дом и стра́нам охране́ние; ми́ру безмяте́жие и мир, гла́да и па́губы избавле́ние; ста́рым и немощны́м утеше́ние и подкрепле́ние, ю́ным и младе́нцам благо́е в ве́ре возраста́ние, в Ева́нгельском уче́нии тве́рдое обуче́ние, и в чистоте́ и целому́дрии пребыва́ние; вдови́цам и сиро́там ми́лость и заступле́ние, плене́нным отра́ду и возвраще́ние, боля́щим исцеле́ние, малоду́шным успокое́ние, заблу́ждшим исправле́ние, согреша́ющим дух сокруше́ния, бе́дствующим благовре́менну по́мощь. Не посрами́ нас, к тебе́ с ве́рою притека́ющих, споспе́шествуй, я́ко чадолюби́вый оте́ц ча́дам, и нам понести́ и́го Христо́во во благоду́шии и терпе́нии, и всех упра́ви в ми́ре и покая́нии сконча́ти живо́т свой непосты́дно и пресели́тися со упова́нием во оби́тели Небе́сныя. Иде́же ты, по труде́х и по́двизех, ны́не водворя́ешися со А́нгелы и Святы́ми, зря и прославля́я Бо́га, в Тро́ице сла́вимаго, Отца́, и Сы́на, и Свята́го Ду́ха. Ами́нь.

Молитва преподобному Ферапонту Белоезерскому, Можайскому

Преподобный Ферапонт Белоезерский – великий молитвенник за Русскую землю. Прославился подвигом деятельного служения ближним и духовного просвещения Отечества.

О, всечестны́й и преблаже́нный о́тче наш Ферапо́нте! Тебе́ даде́ся благода́ть моли́тися о нас, и ве́мы, я́ко, предстоя́ Престо́лу Го́спода, при́сно явля́еши любо́вь твою́ к нам непреста́нными о нас твои́ми хода́тайствы. Но поне́же мы ежеча́сно умножа́юще грехи́ на́ша, кра́йняго твоего́ отвраще́ния досто́йни сотвори́хомся, сего́ ра́ди в покая́нии, со слеза́ми припа́дающе, мо́лим тя: не премени́ твое́й ми́лости к нам на гнев за нече́стия и скве́рны на́ша, яви́ у́бо нам ми́лость твою́ до конца́ и согреша́ющих нас очи́сти твои́ми моли́твами, возведи́ к покая́нию, укрепи́ на дела́ блага́я, сохрани́ в Правосла́вии и во вся́кой святы́ни. Да́руй нам пребыва́ти в ми́ре, тишине́ и братолю́бии, испроси́ нам времена́ безмяте́жна и изоби́лие плодо́в земны́х, изба́ви от огня́, и от потопле́ния, и от лю́тых боле́зней, и от смертоно́сныя я́звы.

Посли́ тружда́ющимся благи́й успе́х, путеше́ствующим путь безпреткнове́нный, в мо́ри пла́вающим приста́нище ти́хое, плене́нным осла́бу и освобожде́ние, си́рым по́мощь и заступле́ние, во́инству на́шему ве́рность, му́жество и побе́ду и всем нам вся поле́зная ко вре́менней и ве́чней жи́зни. Да любо́вию твое́ю огражде́ннии, благода́рственная всегда́ пое́м просла́вившему тя Го́споду Иису́су Христу́, Ему́же подоба́ет вся́кая сла́ва и честь со Безнача́льным Его́ Отце́м и с Пресвяты́м и Животворя́щим Его́ Ду́хом во ве́ки веко́в. Ами́нь.

Молитвы о мире всего мира и просвещении народов земли

Молитва о возвращении мирных времен

Куда́ бегу́ от Тебя́, Го́споди наш? В како́й стране́ скро́юсь от лица́ Твоего́? Не́бо – Престо́л Твой, земля́ – подно́жие Твое́, в мо́ре – путь Твой, в шео́ле – влады́чество Твое́. Е́сли бли́зок уже́ коне́ц ми́ра, то не без щедро́т Твои́х да бу́дет кончи́на.

Зна́ешь Ты, Го́споди, что непра́вды на́ши велики́. И мы зна́ем, что велики́ щедро́ты Твои́. Е́сли не уми́лостивят Тебя́ щедро́ты Твои́, поги́бли мы за беззако́ния на́ши. Не оста́вь нас, Го́споди, Го́споди, потому́ что вкуша́ли мы Плоть и Кровь Твою́.

Когда́ дела́ ка́ждого подве́ргнутся испыта́нию пред Тобо́й, Го́споди вся́ческих, в это после́днее вре́мя не отврати́, Го́споди, лица́ Твоего́ от испове́довавших свято́е и́мя Твое́. О́тче, Сы́не и Ду́ше Святый Уте́шителю! Спаси́ нас и сохрани́ ду́ши на́ши!

Умоля́ем бла́гость Твою́, Го́споди, отпусти́ нам ви́ны на́ши, презри́ беззако́ния на́ши, отве́рзи нам дверь щедро́т Твои́х, Го́споди! Да прии́дут к нам времена́ ми́рные, и по щедро́там Твои́м ми́лостиво прими́ моли́тву на́шу, потому́ что ка́ющимся, Го́споди, Ты отверза́ешь дверь (из «Надгробных песнопений» преподобного Ефрема Сирина).

Молитва покаянная, читаемая во дни смуты

Го́споди, Бо́же, Вседержи́телю, при́зри на нас, гре́шных и недосто́йных чад Твои́х, согреши́вших пред Тобо́ю, прогне́вавших бла́гость Твою́, навле́кших гнев Твой пра́ведный на ны, па́дших во глубину́ грехо́вную.

Ты зри́ши, Го́споди, не́мощь на́шу и скорбь душе́вную, ве́си растле́ние умо́в и серде́ц на́ших, оскуде́ние ве́ры, отступле́ние от за́поведей Твои́х, умноже́ние нестрое́ний семе́йных, разъедине́ния и раздо́ры церко́вные, Ты зри́ши печа́ли и ско́рби на́ша, от боле́зней, гла́дов, потопле́ния, запале́ния и междоусо́бныя бра́ни происходя́щия. Но, Преми́лостивый и Человеколюби́вый Го́споди, вразуми́, наста́ви и поми́луй нас, недосто́йных. Испра́ви жизнь на́шу грехо́вную, утоли́ раздо́ры и нестрое́ния, собери́ расточе́нныя, соедини́ разсе́янныя, пода́ждь мир стране́ на́шей и благоде́нствие, изба́ви ю от тя́жких бед и несча́стий.

Всесвяты́й Влады́ко, просвети́ ра́зум наш све́том уче́ния Ева́нгельскаго, возгре́й сердца́ на́ша теплото́ю благода́ти Твоея́ и направи́ я к де́ланию за́поведей Твои́х, да просла́вится в нас всесвято́е и пресла́вное и́мя Твое́, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Молитва преподобного Силуана Афонского

Го́споди, да́руй мир Твой лю́дям Твои́м. Го́споди, да́руй раба́м Твои́м Ду́ха Твоего́ Свято́го, что́бы Он согрева́л сердца́ их любо́вью Твое́ю и наставля́л их на вся́кую и́стину и добро́. Го́споди, да́руй им благода́ть Твою́, что́бы они в ми́ре и любви́ позна́ли Тебя́, и возлюби́ли бы, и сказа́ли бы, подо́бно апо́столам на Фаво́ре: «Добро́ нам, Го́споди, быть с Тобо́ю». Согре́й печа́льные сердца́ люде́й; пусть они́ в ра́дости сла́вят Тебя́, забыва́я ско́рби земли́. Уте́шителю благи́й, сле́зно прошу́ Тебя́, уте́шь ско́рбные ду́ши люде́й Твои́х. Дай всем наро́дам Твои́м разуме́ть любо́вь Твою́ и сла́дость Ду́ха Свято́го, да забу́дут лю́ди го́ре земли́, и да оста́вят все плохо́е и приле́пятся к Тебе́ любо́вью, и да бу́дут жить в ми́ре, творя́ во́лю Твою́ во сла́ву Твою́.

Молитва святого праведного Иоанна Кронштадтского

Сла́ва Тебе́, Бо́гу, Благоде́телю моему́, во ве́ки веко́в! Позна́н бу́ди, Го́споди, в ве́ре Твое́й, всем лю́дям Твои́м и всем племенам земны́м, да все просла́вят Тебя́ еди́неми усты́ и еди́нем се́рдцем от восто́ка со́лнца до за́пада. Бу́ди, бу́ди!

Молитва о мире во всем мире среди людей и народов святителя Николая Сербского

Го́споди Бо́же наш, Влады́ко жи́зни и сме́рти, Тво́рче не́ба и земли́, прими́ на́ше благодаре́ние за все благи́е дары́, кото́рые препода́л Ты нам в сие́ вре́мя. Да́ровал Ты нам и непреста́нно да́руешь то, чего́ никто́ друго́й не мог бы дать: здра́вие, изоби́лие земны́х плодо́в и все про́чее, что ну́жно для на́шего существова́ния на земле́. Ду́хом же Твои́м Святы́м вдохновля́ешь Ты и утвержда́ешь пра́вую ве́ру, освеща́ешь наде́жду, возгрева́ешь любо́вь, ми́луешь ми́лостью, просвеща́ешь и освяща́ешь ду́ши наро́да Твоего́. Благодари́м Тебя́ за то, что бога́тством Свое́й ми́лости превзоше́л Ты па́губное бога́тство людски́х грехо́в, так что – взира́я на на́ши прегреше́ния – еще́ не затвори́л небеса́ над на́ми, и не иссуши́л облака́ от дождя́, и не запрети́л земле́ произраща́ть плоды́, и не повеле́л со́лнцу не осиява́ть бо́льше гре́шников и беззако́нников.

Но, о Всеблаги́й Царю́ и Го́споди, оди́н Твой неотло́жный дар недостае́т нам в сие́ вре́мя – мир, тот свято́й мир, кото́рый да́ровал Ты Свои́м вели́ким Апо́столам, говоря́: Мир вам! Мир оставля́ю вам, мир Мой даю́ вам! О сем ми́ре, об э́том небе́сном да́ре, кото́рый в Твое́й руке́ и то́лько от Тебя́ мо́жет прийти́, мы коленопреклоне́нно Тебе́ мо́лимся. Зна́ем, Тво́рче наш, зна́ем, что не заслужи́ли мы его́ и недосто́йны сего́ да́ра, одна́ко возлага́ем наде́жду на Твою́ безме́рную ми́лость и покая́нно мо́лимся Тебе́ еди́ному: «Да́руй нам его́, да́руй мир всем ве́рным Твои́м по всему́ све́ту, да не поги́бнем до конца́». Го́споди, возмути́лось ны́не и вскипе́ло мо́ре челове́ческой жи́зни, как никогда́. Воцари́лось смяте́ние вку́пе со у́жасом в сердца́х люде́й. Вооружи́лся и восста́л брат на бра́та, сосе́д на сосе́да, наро́д на наро́д, ца́рство на ца́рство.

И вот челове́ческий род стои́т в преддве́рии но́вой войны́, но́вого Ка́инового греха́, но́вого Иу́дина преда́тельства, – той войны́, в кото́рой бу́дут по́праны все Твои́ за́поведи, Твое́ свято́е и́мя подве́ргнется хуле́ниям, Твоя́ же́ртва бу́дет осме́яна и Твоя́ свята́я любо́вь к нам, гре́шным, ста́нет предме́том презре́ния. О всемогу́щий Вседержи́телю, простри́ Свою́ неодоли́мую десни́цу и не допусти́ сего́, не дозво́ль сего́, предотврати́ сие́ Свое́й си́лою и бла́гостью. Как не́когда успокоил Ты Галиле́йское мо́ре и Свои́м всемогу́щим сло́вом усмири́л ве́тры, всели́в мир и ра́дость в ду́ши Свои́х ученико́в, так и ны́не утихоми́рь бу́рю в ду́шах Свои́х люде́й и наро́дов, да́бы вме́сто стра́ха пред войно́й воссия́ла в них отра́да ми́ра. Сохрани́, Го́споди, и́збранных Свои́х от посрамле́ния пред язы́чниками. Соблюди́ Свои́х креще́нных люде́й и Свои́ наро́ды от насме́шек сатаны́ над Твои́ми созда́ниями. Умилосе́рдись по кра́йней ме́ре над Свои́ми святы́ми А́нгелами и не допусти́ им сно́ва в ско́рби взира́ть на безбо́жные дела́ христиа́нских наро́дов. Сми́луйся над Свои́ми святы́ми и пра́ведниками и не попусти́, что́бы па́ки пред Твои́м небе́сным престо́лом опуска́ли они́ глаза́, стыдя́сь свои́х сро́дников и пото́мков здесь, на гре́шной земле́.

Посему́ ра́ди Свои́х А́нгелов и святы́х и пра́ведников на небеса́х – бо́льше, чем ра́ди нас, – поми́луй нас, Многоми́лостивый. И ра́ди любви́ Пресвято́й Твое́й Ма́тери, Богоро́дицы, к Тебе́, Го́споди Иису́се Хри́сте, и к Це́ркви Твое́й на земле́, Твоему́ виногра́днику и насажде́нию, удержи́ на́ши ру́ки от преступле́ний и спаси́ нас от нас сами́х. Спаси́ на́шу со́весть, спаси́ на́ши ду́ши, да́бы и мы, изба́вленные Твое́й ми́лостью, приумно́жили в подоба́ющее вре́мя свято́й Твой наро́д в бессме́ртном Ца́рствии ми́ра, све́та и жи́зни, где из ве́чности в ве́чность живе́шь и ца́рствуешь Ты, Триеди́ный Бо́же наш, Тебе́ же да бу́дет сла́ва и похвала́, благодаре́ние и поклоне́ние от всех святы́х Сил на не́бе от всех родо́в на земле́ во век ве́ка. Ами́нь.

Молитва преподобному Силуану Афонскому

У старца Силуана Афонского просят о помощи в завершении войны и разногласий, примирения с врагами, в скорби и отчаянии, при необходимости принять решение.

О, преди́вный уго́дниче Бо́жий, о́тче Силуа́не! По благода́ти, тебе́ от Бо́га да́нной, сле́зно моли́тися о всей вселе́нней – ме́ртвых, живы́х и гряду́щих – не премолчи́ за нас ко Го́споду, к тебе́ усе́рдно припа́дающих и твоего́ предста́тельства уми́льно прося́щих (имена). Подви́гни, о всеблаже́нне, на моли́тву Усе́рдную Засту́пницу ро́да христиа́нскаго, Преблагослове́нную Богоро́дицу и Присноде́ву Мари́ю, чу́дно призва́вшую тя бы́ти ве́рным де́лателем в Ея́ земно́м вертогра́де, иде́же избра́нницы Бо́жии о гресе́х на́ших ми́лостива и долготерпели́ва бы́ти Бо́га умоля́ют, во е́же не помяну́ша непра́вд и беззако́ний на́ших, но по неизрече́нной бла́гости Го́спода на́шего Иису́са Христа́ уще́дрити и спасти́ нас по вели́цей Его́ ми́лости.

Ей, уго́дниче Бо́жий, с Преблагослове́нною Влады́чицею ми́ра – Святе́йшею Игу́мениею Афо́на и святы́ми подви́жниками Ея́ земна́го жре́бия испроси́ у святы́х святе́йшего Сло́ва святе́й горе́ Афо́нской и боголюби́вым пустынножи́телем ея́ от всех бед и наве́тов вра́жиих в ми́ре сохрани́тися. Да А́нгелы святы́ми от зол избавля́еми и Ду́хом Святы́м в ве́ре и братолю́бии укрепля́еми, до сконча́ния ве́ка о Еди́ней, Святе́й, Собо́рней и Апо́стольстей Це́ркви моли́твы творя́т и всем спаси́тельный путь указу́ют, да Це́рковь Земна́я и Небе́сная непреста́нно славосло́вит Творца́ и Отца́ Све́тов, просвеща́ющи и освеща́ющи мир в ве́чной пра́вде и бла́гости Бо́жией. Наро́дом земли́ всей испроси́ благоде́нственное и ми́рное житие́, дух смиренному́дрия и братолю́бия, добронра́вия и спасе́ния, дух стра́ха Бо́жия. Да не зло́ба и беззако́ние ожесточают сердца́ людски́я, мо́гущие истреби́ти любо́вь Бо́жию в челове́цех и низве́ргнуть их в богопроти́вную вражду́ и братоуби́йство, но в си́ле Боже́ственныя любве́ и пра́вды, я́коже на небеси́ и на земли́ да святи́тся и́мя Бо́жие, да бу́дет во́ля Его́ свята́я в челове́цех, и да воцари́тся мир и Ца́рствие Бо́жие на земли́.

Та́кожде и земно́му Оте́честву твоему́ – земли́ Росси́йстей испроси́, уго́дниче Бо́жий, вожделе́нный мир и небе́сное благослове́ние, во е́же всемо́щным омофо́ром Ма́тере Бо́жия покрыва́ему, изба́витися ему́ от гла́да, губи́тельства, тру́са, огня́, меча́, наше́ствия иноплеме́нников и междоусо́бныя бра́ни и от всех враг ви́димых и неви́димых, и та́ко святе́йшим до́мом Преблагослове́нныя Богоро́дицы до сконча́ния ве́ка ему́ пребы́ти, Креста́ Животворя́щаго си́лою, и в любви́ Бо́жией неоскудева́ему утверди́тися. Нам же всем, во тьму грехо́в погружа́емым и покая́ния те́пла, ниже́ стра́ха Бо́жия не иму́щим и си́це безме́рно лю́бящаго нас Го́спода непреста́нно оскорбля́ющим, испроси́, о всеблаже́нне, у Всеще́драго Бо́га на́шего, да Свое́ю Всеси́льною благода́тию боже́ственне посети́т и оживотвори́т ду́ши на́ша, и вся́ку зло́бу и го́рдость жите́йскую, уны́ние и нераде́ние в сердца́х на́ших да упраздни́т.

Еще́ мо́лимся, о е́же и нам, благода́тию Всесвята́го Ду́ха укрепля́емым и любо́вию Бо́жию согрева́емым, в человеколю́бии и братолю́бии, смиренномудренном сраспина́нии друг за дру́га и за всех, в пра́вде Бо́жией утверди́тися и в благода́тной любви́ Бо́жией благонра́вно укрепи́тися, и сынолю́бне Тому́ прибли́житися. Да та́ко, творя́ще Его́ всясвяту́ю во́лю, во вся́ком благоче́стии и чистоте́ вре́меннаго жития́ путь непосты́дно пре́йдем и со все́ми святы́ми Небе́снаго Ца́рствия и Его́ Агнчаго бра́ка сподо́бимся. Ему́ же от всех земны́х и небе́сных да бу́дет сла́ва, честь и поклоне́ние, со Безнача́льным Его́ Отце́м, Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Молитва святому праведному Иоанну Кронштадтскому

О, вели́кий уго́дниче Христо́в, святы́й пра́ведный о́тче Иоа́нне Кроншта́дтский, па́стырю ди́вный, ско́рый помо́щниче и ми́лостивый предста́телю! Вознося́ славосло́вие Триеди́ному Бо́гу, ты моли́твенно взыва́л: «И́мя Тебе́ Любо́вь: не отве́ргни мене́ заблужда́ющагося. И́мя Тебе́ Си́ла: укрепи́ мене́, изнемога́ющаго и па́дающаго. И́мя Тебе́ Свет: просвети́ ду́шу мою́, омраче́нную жите́йскими страстя́ми. И́мя Тебе́ Мир: умири́ мяту́щуюся ду́шу мою́. И́мя Тебе́ Ми́лость: не престава́й ми́ловати мене́».

Ны́не благода́рная твоему́ предста́тельству всеросси́йская па́ства мо́лится тебе́: Христоимени́тый и пра́ведный уго́дниче Бо́жий! Любо́вию твое́ю озари́ нас, гре́шных и не́мощных, сподо́би нас принести́ досто́йныя плоды́ покая́ния и неосужде́нно причаща́тися святы́х Христо́вых Та́ин: си́лою твое́ю ве́ру в нас укрепи́, в моли́тве поддержи́, неду́ги и боле́зни исцели́, от напа́стей враго́в ви́димых и неви́димых изба́ви: све́том ли́ка твоего́ служи́телей и предстоя́телей алтаря́ Христо́ва на святы́я по́двиги па́стырскаго де́лания подви́гни, младе́нцем воспита́ние да́руй, ю́ность наста́ви, ста́рость поддержи́, святы́ни хра́мов и святы́я оби́тели озари́: умири́, чудотво́рче и прови́дче преизря́днейший, наро́ды страны́ на́шея, благода́тию и да́ром Свята́го Ду́ха изба́ви от междоусо́бныя бра́ни; расточе́нныя собери́, прельще́нныя обрати́ и совокупи́ святе́й собо́рней и апо́стольстей Це́ркви: ми́лостию твое́ю супру́жества в ми́ре и единомы́слии соблюди́, мона́шествующим в дела́х благи́х преспея́ние и благослове́ние да́руй, малоду́шныя уте́ши, стра́ждующих от ду́хов нечи́стых свободи́, в ну́ждах и обстоя́ниих су́щих поми́луй и всех нас на путь спасе́ния наста́ви: во Христе́ живы́й, о́тче наш Иоа́нне, приведи́ нас к невече́рнему све́ту жи́зни ве́чныя, да сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.

Молитва святителю Тихону, патриарху Московскому

О, па́стыре наш до́брый, святы́й вели́кий Патриа́рше Ти́хоне, я́ко град го́рний ты яви́лся еси́ – до́брая дела́ твоя́ и доны́не све́тятся пред челове́ки. Ве́мы, я́ко ты, предстоя́ престо́лу Пресвяты́я Тро́ицы, ве́лие и́маши дерзнове́ние в моли́твах пред Го́сподем.

Воззри́ и ны́не на нас, гре́шных и недосто́йных чад твои́х, к тебе́ бо, я́ко иму́щему ве́лие дерзнове́ние пред Творце́м вся́ческих, ны́не припа́даем и усе́рдно мо́лимся: умоли́ Го́спода, да пода́ст нам реши́мость стяжа́ть благоче́стие отце́в на́ших, его́же ты стяжа́л еси́ от ю́ности твоея́.

Ты в житии́ свое́м ре́вностный защи́титель и храни́тель и́стинныя ве́ры был еси́, помози́ и нам незы́блемо соблюсти́ ве́ру Правосла́вную. Ти́хая душа́ твоя́ зело́ преуспе́ла в боже́ственном смиренному́дрии, научи́ и нас ра́зум наш пита́ти не многомяте́жной му́дростию челове́ческой, но смире́нным позна́нием во́ли Бо́жией. Ты пред лице́м лю́тых враго́в Христо́вых И́стиннаго Бо́га дерзнове́нно испове́дал еси́, моли́твою свое́ю укрепи́ нас, малоду́шных, да и мы всегда́ и всю́ду противоста́нем ду́ху безбо́жия и льсти.

Ей, уго́дниче Бо́жий, не пре́зри нас, моля́щихся тебе́ (имена), и́бо не то́кмо от бед и скорбе́й избавле́ния про́сим, но си́лы и тве́рдости, великоду́шия и любви́ про́сим, да́бы переноси́ть о́ныя напа́сти, востаю́щия на ны. Испроси́ нам неосла́бное терпе́ние да́же до конца́ жития́ на́шего, мир с Го́сподом и грехо́в отпуще́ние.

О́тче святы́й! Укроти́ в стране́ на́шей ве́тры неве́рия и сму́ты, да водвори́т Госпо́дь на земле́ Росси́йстей тишину́ и благоче́стие и любо́вь нелицеме́рную. Моли́твами твои́ми да сохрани́т ю от междоусо́бныя бра́ни, да укрепи́т Святу́ю Це́рковь на́шу Правосла́вную, да не оскуде́ет она́ и́стинными па́стырями, до́брыми де́лателями, пра́во пра́вящими сло́во Ева́нгельской и́стины. Упаси́ и заблу́ждшия о́вцы ста́да Христо́ва.

Наипа́че же моли́ Го́спода сил, да возроди́тся Ру́сская земля́ святы́м покая́нием, и еди́ным се́рдцем и еди́ными усты́ просла́вит Ди́внаго во святы́х Свои́х Бо́га в Тро́ице сла́вимаго, Отца́ и Сы́на и Свята́го Ду́ха во ве́ки веко́в. Ами́нь.

Молитва святым новомученикам и исповедникам Российским

Святи́и новому́ченицы и испове́дницы Це́ркве Росси́йския, услы́шите усе́рдную мольбу́ на́шу! Ве́мы, я́ко не́ции от вас, еще́ о́троцы су́ще, послу́шающе о дре́влих страстоте́рпцех, в се́рдце свое́м помы́слиша, коли́ко прелюбе́зно и доброхва́льно есть таковы́м подража́ти, и́хже ни му́ки, ни смерть не разлучи́ша от любве́ Бо́жия.

Бла́го же вам, я́ко после́довали есте́ ве́ре и терпе́нию тех, о ни́хже слы́шасте и и́хже возлюби́сте. А поне́же на вся́кое вре́мя возмо́жно есть наити́ на ны испыта́нием неча́янным, испроси́те от Го́спода нам му́жества дар, Иже толи́ко благопотре́бен есть в житии́ челове́честем.

Вся концы́ Оте́чества на́шего страда́ньми свои́ми освяти́вшии, я́ко о́бщии за вся ны моли́твенницы, умоли́те Бо́га изба́вити лю́ди Своя́ от и́га, ужа́снейшаго па́че вся́каго ино́го. Да упраздня́тся раско́лы в Це́ркви на́шей, да бу́дут вси еди́но и да изведе́т Госпо́дь на жа́тву де́латели Своя́, си́есть да не оскудева́ет Це́рковь па́стырьми до́брыми, и́же и́мут просвеща́ти све́том и́стинныя ве́ры сто́ль вели́кое мно́жество люде́й, ве́ре ненауче́нных или от ве́ры отврати́вшихся.

Недосто́йни есмы́ ми́лости Бо́жия, оба́че страда́ний ра́ди ва́ших Христо́с Бог наш да уще́дрит и поми́лует всех нас, в по́мощь вас призыва́ющих. Мы же Ему́, Спаси́телю на́шему со Отце́м и со Святы́м Ду́хом, сокруше́ние о гресе́х и благодаре́ние за вся́ всегда́ да прино́сим, сла́вяще Его́ во ве́ки веко́в. Ами́нь.

Молитвы о примирении враждующих

Молитвы ко Господу

Молитва 1-я

Милосе́рдный, ми́лостивый и благи́й Бо́же ми́ра! Мы познае́м и признае́м, како́е вели́кое бла́го и драгоце́нное сокро́вище есть возлю́бленный мир, без кото́рого не мо́жет быть никако́го благослове́ния и успе́ха в како́й-ли́бо земле́, но быва́ет еди́ная па́губа, прокля́тие и злополу́чие. Про́сим мы Тебя́ от всего́ се́рдца: благоволи́ ми́лостию Твое́ю и могу́ществом Твои́м сохрани́ть власти́телей от немиролю́бия и войны́, а владе́ния их от разоре́ния и опустоше́ния, благоволи́ да́ровать и ниспосла́ть всем высо́ким власти́телям ми́рное расположе́ние души́, миролюби́вые сове́ты и сове́тников, созида́ющих мир и бо́лее всего́ лю́бящих и́стину и мир. Да́руй нам послуша́ние сло́ву Твоему́ и властя́м, над на́ми поста́вленным, да не изгоня́ем са́ми от себя́ драгоце́нного ми́ра. Возлю́бленный О́тче! Соде́лай, что́бы мы пребыва́ли в ми́ре, потому́ что Ты не Бог несогла́сия, но Бог ми́ра. Да́руй нам име́ть мир ме́жду собо́ю, да Ты, о Бо́же ми́ра и любви́, пребу́дешь с на́ми. Ами́нь.

Молитва 2-я

Влады́ко Человеколю́бче, Царю́ веко́в и Пода́телю благи́х, разру́шивший вражды́ средосте́ния и мир пода́вший ро́ду челове́ческому, да́руй и ны́не мир рабо́м Твои́м, вкорени́ в них стра́х Твой и друг к дру́гу любо́вь утверди́: угаси́ вся́ку ра́спрю, отыми́ вся разногла́сия и собла́зны. Я́ко Ты еси́ мир наш и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Молитва пред иконой Божией Матери «Владимирская»

О, Всеми́лостивая Госпоже́ Богоро́дице, Небе́сная Цари́це, всемо́щная Засту́пнице, непосты́дное на́ше упова́ние! Благодари́м Тя о всех благодея́ниих, росси́йским лю́дем от Тебе́ бы́вших, отдре́вле и додне́сь от чудотво́рныя ико́ны Твоея́ явле́нных. И ны́не, Преблага́я Влады́чице, при́зри на ны, гре́шныя и недосто́йныя рабы́ Твоя́, яви́ нам ми́лость Твою́ и моли́ Сы́на Твоего́, Христа́ Бо́га на́шего, о е́же изба́витися нам от вся́каго зла и сохрани́тися ца́рствующим градо́м, вся́кому гра́ду и ве́си, и всей стране́ на́шей, от гла́да, губи́тельства, тру́са, пото́па, огня́, меча́, наше́ствия иноплеме́нник и междоусо́бныя бра́ни. Сохрани́ и умудри́ па́стырей Це́ркве, е́же досто́йно пасти́ ста́до Христо́во и пра́во пра́вити сло́во и́стины; укрепи́ христолюби́вое всеросси́йское во́инство, пода́ждь дух сове́та и ра́зума военача́льником, градонача́льником и всем, иже во вла́сти суть; низпосли́ свято́е Твое́ благослове́ние и всем правосла́вным христиа́ном, покланя́ющимся Ти и моля́щимся пред цельбоно́сною Твое́ю ико́ною. Бу́ди нам Засту́пница и Хода́таица пред Престо́лом Всевы́шняго, иде́же предстои́ши. К кому́ у́бо прибе́гнем, а́ще не к Тебе́, Влады́чице? Кому́ принесе́м сле́зы и воздыха́ния, а́ще не Тебе́, Пресвята́я Богоро́дице? Не и́мамы бо ины́я по́мощи, не и́мамы ины́я наде́жды, ра́зве Тебе́, Небе́сная Цари́це. Под Твой покро́в притека́ем: моли́твами Твои́ми низпосли́ нам мир, здра́вие, земли́ плодоно́сие, возду́ха благорастворе́ние, изба́ви ны от вся́ких бед и скорбе́й, от вся́ких неду́гов и боле́зней, от внеза́пныя сме́рти и от всех озлобле́ний враго́в ви́димых и неви́димых. Вразуми́ и научи́ ны, о Всеми́лостивая Засту́пнице, путь земна́го сего́ жития́ безгре́шно прейти́. Ты ве́си не́мощи на́ша, ве́си и согреше́ния на́ша, но и ве́ру ве́си, и упова́ние ви́диши: те́мже да́руй нам исправле́ние грехо́вныя жи́зни и умягчи́ зла́я сердца́ на́ша. Укрепи́ в нас пра́вую ве́ру, вложи́ в сердца́ на́ша дух стра́ха Бо́жия, дух благоче́стия, дух смире́ния, терпе́ния и любве́, в до́брых де́лех преуспе́яние: изба́ви же нас от искуше́ний, от па́губных душевре́дных уче́ний, от неве́рия, развраще́ния и поги́бели ве́чныя. Тебе́ у́бо про́сим, Пречи́стая Влады́чице, и припа́дающе пред свято́ю Твое́ю ико́ною, мо́лимся: умилосе́рдися на ны и поми́луй ны, в Стра́шный же день Суда́ хода́тайством и заступле́нием Твои́м сподо́би ны ста́ти одесну́ю Сы́на Твоего́, Христа́ Бо́га на́шего, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и Пресвяты́м и Благи́м и Единосу́щным Его́ Ду́хом, ны́не и при́сно, и во ве́ки веко́в. Ами́нь.

Молитва пред иконой Божией Матери «Донская»

О, Пресвята́я Влады́чице, Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве́ и стране́ на́шей, чудотво́рным Образом Твои́м Донски́м всегда́ явля́емое: в бе́гство обраща́ются полки́ чу́ждих, гра́ды и ве́си невреди́ми сохраня́ются, лю́дие же от лю́тыя сме́рти избавля́ются. Осуша́ются о́чи слезя́щия, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиих, возрожде́ние наде́жды, о́браз му́жества, исто́чник ми́лости, и в ско́рбных обстоя́ниих неистощи́мое терпе́ние нам да́руй. Пода́ждь коему́ждо по проше́нию и по нужде́ его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия ободри́ и немощну́ю ста́рость поддержи́. Посети́ в боле́знех и печа́лех су́щия, зла́я сердца́ умягчи́, братолю́бие укрепи́, ми́ра и любве́ всех нас испо́лни. Примири́, благосе́рдая Ма́ти, вражду́ющия и оправда́й оклеве́танныя. Истреби́ поро́ки, да не восхо́дят грехи́ на́ша пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемо́щным Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ина́го злострада́ния. Упова́ем моли́твами Твои́ми получи́ти от Всевы́шняго Бо́га грехо́в проще́ние и изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и по сконча́нии жи́зни на́шея одесну́ю Престо́ла Бо́жия ста́ти, иде́же Ты, о Всепе́тая Де́во, Святе́й Тро́ице в ве́чней сла́ве предстои́ши. Удосто́й и нас с ли́ки А́нгел и святы́х та́мо восхвали́ти пречестно́е и́мя Сы́на Твоего́ со Безнача́льным Его́ Отце́м и Всесвяты́м и Благи́м и Животворя́щим Его́ Ду́хом во ве́ки веко́в. Ами́нь.

Молитва пред иконой Божией Матери «Отчаянных единая надежда»

О, Пречи́стая Влады́чице Богоро́дице! К Тебе́, изнемога́юще от уны́ния и расслабле́ния, и свое́ю со́вестию облича́емыя, в се́рдце сокруше́нном припа́даем и со умиле́нием вопие́м Ти: не отступи́ от нас, многогре́шных, зря́ще безчи́сленныя грехопаде́ния на́ша, и́миже преогорчи́хом Триипоста́снаго Бо́га и Тебе́, Цари́це Небе́сная.

Изба́ви нас, о Засту́пнице на́ша, от привы́чек грехо́вных и пле́на страсте́й, и́миже плени́ли враги́ во́лю на́шу, связа́ли ю кре́пкими пу́тами, понужда́я нас рабо́тати греху́. Мно́жицею приступи́ли мы свои́м хоте́нием за́поведи Творца́ своего́, те́мже и лиши́лися за грехи́ на́ша благода́ти Сы́на Твоего́, е́юже защища́ет Бог лю́бящих Его́ от сете́й лука́ваго. Не има́мы, Влады́чице, сил разреши́тися от ве́рвия сего́ бесо́вскаго. Изнемо́гла бо во́ля на́ша без благода́ти Сы́на Твоего́ и ве́домы е́смы а́може не хо́щем, и я́коже рабо́в свои́х враг понужда́ет ны рабо́тати ему́.

Не оста́ви нас, Всеми́лостивая, без Твоея́ по́мощи, яко не има́мы ины́я наде́жды то́кмо Тебе́, Пренепоро́чная. А́ще не умоли́ши Сы́на Твоего́ поми́ловати ны, вси поги́бнем во гресе́х на́ших. Изведи́ ны от ра́бства сего́ грехо́внаго, бу́ди нам Свободи́тельница и уз бесо́вских Реши́тельница. Просвети́ ум наш, да па́мять има́мы, я́коже вся, я́же суть на земли́, прах и пе́пел есть, наипа́че плоть на́ша, е́йже, я́ко и́долу, понужда́ет ны служи́ти враг.

Пробуди́, Влады́чице, к покая́нию усну́вшую со́весть на́шу, опали́ ю стра́хом предлежа́щаго Стра́шнаго Суди́лища Бо́жия, иде́же отве́т има́мы да́ти о всех деле́х и словесе́х, и помышле́ниих на́ших. Разжжи́ ду́ши на́ша огне́м ре́вности по Бо́зе, его́же в нача́ле возже́г в нас Бог. Мы же дар сей не соблюдо́хом и нераде́нием свои́м погуби́хом; ны́не же, я́ко пять дев юро́дивых сиди́м во тьме́, не иму́щи что возже́щи в сре́тение Жениха́ Христа́.

О, Ма́терь Све́та, Цари́це Небе́сная, Наде́ждо отча́янных и обремене́нных грехми́ мно́гими, ниспошли́ нам по́мощь от Сы́на Твоего́ и Бо́га на́шего, умоли́ Сладча́йшего Го́спода Иису́са Христа́, да не прогне́вается на ны зело́, но изведе́т ны от ра́бства грехо́внаго, да укрепи́т во́лю на́шу благода́тию Свое́ю, я́ко изба́вльшеся Твои́м заступле́нием от се́ти вра́жия, просла́вим в Тро́ице сла́вимаго Бо́га Отца́ и Сы́на и Свята́го Ду́ха во ве́ки веко́в. Ами́нь.

Молитвы пред иконой Божией Матери «Нерушимая стена»

Молитва 1-я

О, благода́тная Влады́чице на́ша Богоро́дице, Присноде́во! Прии́ми от нас сие́ благода́рственное хвале́бное пе́ние и вознеси́ ко Творцу́ и Зи́ждителю на́шему те́плыя моли́твы Твоя́ за нас недосто́йных, да прости́т Он, Милосе́рдый, нам вся грехи́ на́ша, по́мыслы лука́выя и нечи́стыя, дела́ скве́рныя. О, Госпоже́ Пресвята́я! Умилосе́рдися и низпосли́ дар по коего́жде потре́бе: боля́щия исцели́, скорбя́щия уте́ши, заблу́ждшия вразуми́, охрани́ младе́нцы, воспита́й и научи́ ю́ныя, ободри́ и наста́ви му́жи и же́ны, поддержи́ и согре́й ста́рыя, бу́ди нам и зде, и в жи́зни ве́чней Стено́ Неруши́мая, изба́ви от вся́ких бед и напа́стей и от ве́чнаго муче́ния, да всегда́ воспева́юще Твою́ матери́нскую любо́вь, восхваля́ем всем се́рдцем Сы́на Твоего́, со Отце́м Его́ и Святы́м Ду́хом, во ве́ки веко́в. Ами́нь.

Молитва 2-я

И Ты, Влады́чице, не напра́сно имену́емая «Неруши́мой Стено́й», бу́ди для всех вражду́ющих про́тив меня́ и замышля́ющих па́костная твори́ти мне, вои́стину не́коей прегра́дой и неруши́мой стено́й, огражда́ющей мя от вся́кого зла и тя́жких обстоя́ний. Ами́нь.

Молитвы пред иконой Божией Матери «Тучная Гора»

Молитва 1-я

О, всеми́лостивая Влады́чице на́ша Пресвята́я Богоро́дице Мари́е! При́зри на ны погиба́ющия рабы́ Твоя́, бе́хом бо мы ме́рзкия, бе́хом бо мы блу́дныя, бе́хом бо мы злоречи́выя, а па́че всего́ го́рдыя, ны́не же ви́дехом всю ме́рзость на́шу пред очеса́ми Го́спода и уже́ несмь досто́йны предста́ти пред лице́м Его́, и то́кмо Тя Влады́чице, я́ко Многоми́лостивую себе́ Засту́пницу призыва́ем. О Ма́ти Бо́жия, во гресе́х су́щих не оста́ви нас. Наде́ждо на́ша несумне́нная, обнови́ нас в покая́нии, возста́ви ко исполне́нию за́поведей Бо́жиих, учини́ нас в Це́ркве Свя́тей и сотвори́ досто́йными Свята́го Прича́стия Животворя́щим и Боже́ственным и Стра́шным Та́йнам; Ты бо при́сно мо́лиши за ны Сы́на Своего́ и Бо́га, ве́мы я́ко мно́го бо мо́жет моле́ние ма́тернее. И да испроси́ у Христа́ Бо́га здра́вия нам теле́сного, и я́ко Ми́лостивая, облагодати́ ду́ши на́ша, посли́ мир и благо́е поспе́шение всем бли́жним на́шим, при́зри на град наш храни́мый покро́вом Твои́м, ему́же яви́ ско́рое заступле́ние от чудотво́рныя и благоле́пныя святы́я Твое́я ико́ны, ю́же ны́не благода́рне лобыза́ем, и сохрани́ его́ и вся ини́и гра́ди и ве́си и ве́сь род правосла́вный от вся́ких напра́сных бе́дствий; и отрази́ ересе́й наше́ствие от язы́к иноплеме́нных на нас находя́щия, раско́лы разори́, ра́спри и ины́я разделе́ния в Це́ркви Бо́жией, я́ко еле́ем Твои́м целе́бным, любо́вию нелицеме́рной умасти́в, наде́жно упра́ви, да ми́рное и благочести́вое житие́ бу́дет в уде́л нам, и да сподо́бимся до́брыя глаго́лы от Сы́на Твоего́ и Судии́ на́шего слы́шати под Судо́м Его́ пра́вым, Ему́же сла́ва и честь и поклоне́ние со безнача́льным Его́ Отце́м и Всеблагода́тным Его́ Ду́хом ны́не и при́сно и во ве́ки веко́в. Ами́нь.

Молитва 2-я

К Тебе́, Влады́чице, пред ико́ною Твое́ю, во умиле́нии преклони́в вы́ю свою́ го́рдую, взыва́ю: Се аз, гре́шный, от несу́щего к су́щему воззва́н бых, но ско́ро за моя́ безчи́сленныя и ме́рзкия согреше́ния вновь в несу́щее во а́довых бе́зднах обраще́н бу́ду; но из тьмы злово́нныя грехо́в мои́х молю́ся Ти, Преблага́я: спаси́ мя, умоли́ Сы́на Твоего́ пожда́ти па́ки, да не пожре́т мя днесь напра́сныя смерть, и да по вели́цей ми́лости Его́ и при благоприя́тной Твое́й, Пречи́стая, по́мощи, обращу́ся от тьмы к Свету, от самолю́бия к боголю́бию, от неве́рия к ве́ре, от зла ко бла́гу, от богоме́рзости греха́ к преподо́бию; а́ще бо что челове́ку невозмо́жно бысть, то Бо́гу возмо́жно, и да отны́не послужу́ ко прославле́нию Сы́на Твоего́, предадя́ ся всеблаго́й во́ле Его́, да́бы и мне приити́ по Стра́шнем Суди́ще Христо́вом ко благи́м и возлю́бленным о́вцам па́жити Его́ в ра́дость при́сную и жизнь ве́чную. Ами́нь.