KİRPİNİN ZƏRİFLİYİ

Zəngin bir ailənin on üç yaşlı ağıllı və savadlı qızı… Fəlsəfi əsərlər oxuyan, Motsartı dinləyən, əsl kimliyini çalışdığı rezidansın bütün sakinlərindən gizləyən yaşlı qapıçı qadın… İllər sonra Parisin dəbdəbəli rezidanslarından birində məskunlaşan varlı bir yapon… Bir-birindən fərqli olan bu üç insanı birləşdirən ümumi bir şey var… Amma nə? Təsadüfən bir-birilərini tapdıqdan sonra bu üç insanın həyatında nə kimi dəyişikliklər olur?

Bəzən bir insan həyatımıza günəş tək doğar, qaranlıq həyatımızı aydınlaşdırar və gözlərimiz bu aydınlıqdan qamaşarkən bizi təqib edən o qaranlığı unudub, özümüzü bu günəşin ağuşuna atırıq. Bəs illər sonra madam Mişelin həyatında doğan günəş onu həmişəlik olaraq qaranlıqdan qurtara bilirmi? Bəs bu günəş həyatına son verməkdə qəti qərarlı olan bir qızı necə, yolundan döndərə bilirmi? Çoxdan bəri aradığı aydınlığı bir Paris rezidansında tapan zəngin yapon bu günəşlə öz həyatını da aydınlada bilirmi? Günəşmi qalib gəlir, yoxsa qaranlıq?

Cəmiyyətdəki sinif fərqlərindən, sadə insanların ruhundakı aristokratlıqdan, zənginlərin mənəvi kasıblığından, hamı kimi olmamağın, hamı kimi düşünməməyin insanın həyatında yaratdığı çətinliklərdən, ruhən yaxın olan insanların arasındakı səmimi hisslərdən bəhs edən möhtəşəm bir əsər…

Bu kitabı mənimlə birgə yazan Stefana