Kitobni o'qish: «La ruelle mal assortie», sahifa 5

Le Cavalier Gascon

Bous me labez osté de la vouche.

Vranie

A la verité c'est tout vostre style: mais voyons comme vous me l'eussiez dit, et auec quelle grace vous sçauez proportionner vos paroles à vostre passion. Dites:

Le Cavalier Gascon

Pourquoy velle Reyne de mes menues pensees⁸³, né frutifiez⁸⁴ bous mon cœur d'aprehensions, assaillant et affermissant en sorte la mienne felicité, que puisse bibre sans estre poussedé⁸⁵, pourquoy consentez bous que doute continuel⁸⁶ de bous perdre rende contente ma bie, gloire parfaite et moins accomplie⁸⁷? suis-ie pas cet adorateur de bos Dieu graces, qui empire⁸⁸ bostre renom en perpetuel desirer ce que yé bois, ruiner⁸⁹ ce que i'oys, qui raby de merbeilles né say lequel lire⁹⁰, ou d'estre tous yeux pour bous oüir, ou pour bous regarder tout oureilles.

Vranie

Voylà bon galimatias, et faut confesser qu'il n'y a pas grande peine à vous faire declarer vne beste, auoüant que i'ay tort de vous faire parler, puis que vous auez meilleure⁹¹ grace à vous taire. Il faut donc employer desormais cette belle bouche⁹² à vn autre vsage, et en retirer quelqu'autre sorte⁹³ de plaisir, pardonant à la nature qui employant tout à polir le corps, n'a peu rien reseruer pour l'esprit; gardez ce beau langage pour vos autres maistresses⁹⁴, et tandis que cette ruelle est vuide de ces fascheus qui viendront bien tost interompre nos contentemens, ie veux tirer quelque satisfaction de cette muette qui ne respond point, et n'en pouuant aracher des paroles, ie veux au moins en tirer quelqu'autre douceur. Aprochez-vous donc mon mignon⁹⁵, car vous estes mieux prest que loin; et puis⁹⁶ vous estes plus propre pour satisfaire au goust qu'à l'oüye. Recherchons d'entre vn nombre infiny de baisers celuy qui⁹⁷ sera le plus sauoureux pour le continuer. O qu'ils sont doux et bien assaisonez⁹⁸. Cela me rauit, et n'y a si petite partie en moy qui n'y participe, et ou ne furrette et n'ariue quelque petite etincelle de volupté! mais il en faut mourir: i'en suis toute esmeuë, et en rougis iusques dans les cheueux. Ha, vous excedez vostre permission, et quelqu'vn s'aperceura de vostre priuauté⁹⁹. Hé bien, vous voylà dans vostre element et ou vous paroissez plus qu'en toute autre chose¹⁰⁰. Ha! i'en suis hort d'haleine, ie ne m'en puis rauoir, et il faut (n'en deplaise à la parole) auoüer que, pour beau que soit le discours, cet esbastement le surpasse, Et peut-on bien dire, sans se tromper, que rien ne se trouueroit de si doux, si cela n'estoit point si court¹⁰¹.

FIN